2 Samuweli 15 - IBAYIBOLO 2024

Ukusambuka ukwa Abisalomu

¹ Bo pachilapo akabalilo, u Abisalomu akilondela mwene ingolo izya bwite ni falasi, sona na bantu 50 abakumusindikila.

² U Abisalomu akalamusya pandabindabi nukwimilila mulubazu ulwa musebo uwakwinjilila mukaya akakulu nkani kala. Nanti umuntu yumo iza ninongwa kwa mwene, u Abisalomu akamwitizya nukumulalusya ukuti, “Nkimba wafuma kwiyi?” Umuntu yula akamulagha akatinji, “Ane ne wambombo wako nafuma muluko loka pakasi panko izya Izilayeli.”

³ Po u Abisalomu akatinji, “Ifundo yako nyiza nkani, sona ngolosu, loli atalipo umwimilili uwa mwene uwakuti alonge inongwa yako.”

⁴ U Abisalomu akatinji, “Nanti bakansalagha pakuba ne mulongi uwa chisu ichi, kokuti umuntu wesi yuyo ali ninongwa, pamo intamyo, nukwiza nayo kukwane ngali namulongela inongwa yache mubwanaloli.”

⁵ Sona nanti umuntu wesi iza papipi nawe nukumufughamilila, u Abisalomu akagholosya inyobe yache nukumulema umuntu yula, sona akamulamuka pakumufyofyonta.

⁶ U Abisalomu akababombelagha bunubu aba Izilayeli bosi, babo bakizagha ninongwa zyabo kwa mwene. Po bunubu aba Izilayeli bakapalamasiwa nkani nu Abisalomu.

⁷ Bo pachilapo amaka folo, u Abisalomu akamubuzya u mwene akati, “Unyitikizye ukuti imbukaye ku Hebuloni pakukwanilisya ichilapo chicho nkalapa kwa Mwene.

⁸ Ane ne wambombo wako bo inchili indi mu Geshuli muchisu icha Siliya, nkalapa ichilapo ichakuti, ‘Nanti u Mwene anyitikizya pakunyokela sona ku Yelusalemu, nkwiza pakumwiputa mu Hebuloni.’ ”

⁹ U mwene akamubuzya akati, “Wende akiza.” Po u Abisalomu akabuka ku Hebuloni.

¹⁰ U Abisalomu akabatuma abatendezi ku inko zyosi izya ba Izilayeli nukuti, “Nanti mwivwa bulo amapati, po mutinji, ‘U Abisalomu we mwene uwamu Hebuloni.’ ”

¹¹ Abantu 200 aba mu Yelusalemu bakabuka poka nu Abisalomu. Abantu banaba bakitiziwa bulo, umwakuti bakabuka umwakusita kumanya ichintu nachimochimo.

¹² Bo u Abisalomu ali pakubika ivyakwiyipa, akamwitizya u Ahitofeli uwa mukaya aka Giloni, yuyo akamulingannyanga amahala u Devedi. Po ukusambuka kunuku kukaba kwa maka nkani, sona abantu babo bakamukonka u Abisalomu bakaba binji nkani.

U Devedi akumuchimbila u Abisalomu

¹³ Isiku limo intumi yikiza kwa Devedi pakumubuzya ukuti, “Aba Izilayeli bosi bali poka nu Abisalomu.”

¹⁴ Po u Devedi akaghabuzya amakambala ghache ghosi ghagho ghakaba mu Yelusalemu akati, “Zagha, tuchimbile, lumo nayumoyumo pakasi papitu yuyo akwiza pakupona. Lubilo, zagha tumuchimbile u Abisalomu, lumo angiza umwalubilolubilo nukulwa naswe ubwite nukutughogha twebosi mukaya akakulu aka.”

¹⁵ Amakambala agha mwene ghakamwamula ghakati, “Aswe twe bambombo bako tukwiza pakubomba chosi chicho awe we mwene witu ukulonda.”

¹⁶ U mwene akanyamuka poka na bamunyumba yache bosi, loli akabaleka abachi bache abazya 10 ukuti basungilile inyumba iya mwene.

¹⁷ U mwene akanyamuka poka na bantu bache bosi, po bakima pa nyumba yabumalilo iya mukaya kala.

¹⁸ Abantu bosi aba Devedi bakanda pakwenda pantazi papache, sona aba Keleti naba Peleti bosi bakaba poka nawe. Aba Giti 600 aba mu Gati babo bakamukonka bakenda pantazi pa mwene.

¹⁹ U mwene akamulalusya u Itayi umu Giti akati, “Nkimba choni chicho ukulonda pakubuka poka nane? Nyokela, wikale nu mwene u Abisalomu. Awe we muyeni, we muzya sona ukachimbila kukwinyu.

²⁰ Awe wizite bulo ulutazi. Po nkimba choni chicho ukuti ilelo wembele poka nane? Nyokela poka na bantu bako. Ichisa nubusubiliwa ubwa U Mwenevibanje nawe.”

²¹ Loli u Itayi akamwamula u mwene akati, “Nkulapa pamaso pa Mwene, sona na pamaso papako ukuti kosi kuko awe we mwene wane ukubuka, manyi bufwe, manyi bumi, ane ne wambombo wako nkwiza pakuba kulakula.”

²² U Devedi akamubuzya u Itayi akati, “Chiza bulo, twende tubukaye.” Po u Itayi umu Giti akabuka na bantu bache bala, poka na bamunyumba babo bosi.

²³ Abantu bosi aba mukaya kala bakanda pakulila, bo u mwene na bantu bache bakubuka. U mwene akaloboka ikombe ilya Kidiloni, sona abantu bosi bakamukonka, bo akubuka kunkolongo.

²⁴ Wepe u Zadoki akaba palapala, sona aba Levi babo bakaba poka nawe bakanyamula Ibokosi ilya Lufingo ulwa Chala. Po bakalitula pasi Ibokosi lila mupaka abantu bosi bakamala pakwepamo mukaya akakulu nkani kala, bo u Abiyatala akubika ivyakwiyipa.

²⁵ U mwene akamubuzya umuputi u Zadoki akati, “Nyamula Ibokosi ilya Lufingo ulwa Chala nukunyokela mukaya akakulu nkani. Nanti u Mwene angampelela ichisa, akwiza pakunyosya, po nkwiza pakwikala sona mulamula.

²⁶ Loli nanti atangampelela ichisa, chiza bulo, abombaye chicho chingamuhobosya.”

²⁷ U mwene akamubuzya sona umuputi u Zadoki akati, “Nkimba awe te we mwenelezyi? Nyokela mukaya akakulu nkani mumutende, poka nu mwana wako u Ahimazi nu Yonatani umwana uwa Abiyatala.

²⁸ Ane nkwiza pakulindilila piloboko munkolongo mupaka mumbuzye namumo ivintu vibeleye.”

²⁹ Po u Zadoki nu Abiyatala bakanyamula Ibokosi ilya Lufingo lila nukunyokela mu Yelusalemu nukwikala mulamula.

³⁰ Loli u Devedi akendelela nu bulendo bwache ubwa kwi Ghamba ilya Misyunguti, bo akulila. Akivwinka kumutu, sona atakavwala inkwato. Abantu bosi babo bakaba nawe bope bakivwinka kumitu, sona bakalilagha, bo bakubuka.

³¹ U Devedi akabuziwa ukuti, “U Ahitofeli ali pakasi pabantu abakusambukila bala poka nu Abisalomu.” Po u Devedi akiputa akati, “Wee Mwene ughapele amahala agha Ahitofeli ukuti ghabe mapunganu.”

³² Bo u Devedi afika pamwanya pighamba, papo abantu bakamwiputilaghapo u Chala, u Hushayi umu Alikiti akaba palapala ukuti akomane nu Devedi, bo inkazo yache yizepukite, sona kumutu wache kukaba ulufumbi.

³³ U Devedi akamubuzya akati, “Nanti ukubuka poka nane, ukwiza pakuba ntamyo kukwane.

³⁴ Loli nanti ukunyokela mukaya akakulu nkani nukumubuzya u Abisalomu ukuti, ‘Wee mwene, ane nkwiza pakuba ne wambombo wako. Kale ane nkaba ne wambombo uwa wise, loli ilelo nkwiza pakuba ne wambombo wako,’ ukwiza pakunyavwa pakumuvulungannya u Ahitofeli.

³⁵ Nkimba umuputi u Zadoki nu Abiyatala batakwiza pakuba kulakula poka nawe? Ubabuzye abaputi bala zyosi zizyo ukwivwa munyumba iya mwene.

³⁶ Abana babo babili, u Ahimazi umwana uwa Zadoki, sona nu Yonatani umwana uwa Abiyatala bope bali kulakula poka nabo. Po untumile zyosi zizyo ukwivwa ukwendela mubantu banaba.”

³⁷ Po Hushayi, umumanyani uwa Devedi akafika mu Yelusalemu, bo u Abisalomu akwinjila mukaya akakulu nkani kala.