2 Samuweli 14 - IBAYIBOLO 2024

U Abisalomu anyokela ku Yelusalemu

¹ U Yowabu umwana uwa Zeluya akazimanya ukuti u mwene akamusamba nkani u Abisalomu.

² Po u Yowabu akamutuma umuntu ku Tekowa pakumusenda umukolo yumo uwamahala kulakula. Akamubuzya akati, “Ubanje ngati po uli pachililo nukuvwala amenda agha pachililo. Utakapakalaye amafuta. Loli ubanje ngati po mukolo yuyo ikala amasiku aminji nkani ukumulila umuyazi.

³ Ubuke kwa mwene nukumubuzya amazyu ghanagha.” U Yowabu akamubuzya umukolo yula amazyu aghakuti anene.

⁴ Bo umukolo uwamu Tekowa yula abuka kwa mwene, akafughama bo icheni chache chikotamiye pasi. Po akati, “Wee mwene, nyavwako.”

⁵ U mwene akamulalusya akati, “Choni chatamya?” Umukolo yula akamula akati, “Ane ne mufwilwe. Umulume wane afuye.

⁶ Ane ne wambombo wako nkaba na bana abalumendo babili. Abana bala bakalwanga mumughunda, sona patakabapo nayumo umuntu uwa kubalesannya, umwakuti yumo akamukoma uwamwabo, po akafwa.

⁷ Losi ulu, uluko losi lwansambukila ane ne wambombo wako, sona bakuti, ‘Mubike munyobe zyitu umwana wako yuyo akamughogha uwamwabo, umwakuti wepe tumughoghe, pachifukwa icha wamwabo yula. Bunubu tukwiza pakumughogha uwampyana yula.’ Abantu banaba bakwiza pakumughogha umwana wane yuyo asyalako. Po itabwa ilya mulume wane likwiza pakuzimila, sona atakwiza pakuba nu mwizukulu nayumoyumo pachisu ichapasi.”

⁸ U mwene akamubuzya umukolo yula akati, “Bwelagha, nkwiza pakubombapo zimo.”

⁹ Umukolo uwamu Tekowa yula akamubuzya u mwene akati, “Wee mwene wane, leka inongwa yiniyi yibanje papane, na bamunyumba iya tata. Loli awe we mwene, poka na bamunyumba yako mubanje mwe basita nongwa.”

¹⁰ U mwene akamwamula akati, “Nanti umuntu yumo akukoghofya, wize nawe kuno, po atangachela sona pakukutamya.”

¹¹ Umukolo yula akati, “Wee mwene, umulabe u Mwene u Chala wako ukuti abakamu bako, babo bakulonda pakutanizya, batakamughoghe umwana wane uyunji yula.” U Devedi akati, “Nkulapa pamaso pa Mwene ukuti atalipo nayumoyumo yuyo akwiza pakumuvulazya umwana wako.”

¹² Po umukolo yula akati, “Wee mwene, nalamba unyitikizye ane ne wambombo wako ukuti inene izyu loka bulo.” U mwene yula akamwamula akati, “Nena.”

¹³ Umukolo yula akalalusya akati, “Nkimba choni chicho winong'ona pakubabombela bunubu abantu aba Chala? Pakubomba bunubu nkimba kokuti awe wemwene ukwipalaghulila inongwa, pakuti utakulonda ukuti umwana wako yuyo akachimbila anyokele sona?”

¹⁴ Naloli twebosi tubaghiye pakufwa, pakuti tuli ngati mizi ghagho ghakupukila pasi, po ghatanganyokela sona. U Chala atakwefya ubumi ubwa muntu, loli akupela izila iyakuti umuntu yuyo bakamuchimbizya anyokele sona.

¹⁵ “Niza pakunena nawe nizya fundo yiniyi pachifukwa ichakuti abantu bakunyoghofya. Loli ne wambombo wako nkati, ‘Nkwiza pakunena nawe u mwene wane, pamo wemwene ukwiza pakubomba chicho uwambombo wako akakulaba.

¹⁶ Lumo u mwene angitika pakumpoka ne wambombo wache munyobe izya muntu yuyo akulonda pakutughogha ane poka nu mwana wane ukuti atwefyepo pachilingo chicho u Chala akatupa.’

¹⁷ “Po losi ulu ane ne wambombo wako nkuti, ‘Amazyu agha mwene wane ghampanje ukutuzya, pakuti u mwene wane ali ngati wantumi uwa Chala pakulesannya ichintu ichiza ni chibibi. U Mwene u Chala wako abanje nawe.’ ”

¹⁸ Po u mwene akamubuzya umukolo yula akati, “Utakanvindaye ichintu nachimochimo nanti nkukulalusya.” Umukolo yula akati, “Wee mwene wane, ane ntangakuvinda ichintu nachimochimo.”

¹⁹ U mwene akamulalusya akati, “Nkimba te we Yowabu yuyo akubuzizye zyosi zinizi?” Umukolo yula akamula akati, “Nkulapa pamaso pa mwene wane. Nayumoyumo umuntu angamuvinda u mwene wane pazizyo anena. Momumo, uwambombo wako u Yowabu weyuyo akambuzya amazyu ghosi ghanagha.”

²⁰ “Uwambombo wako u Yowabu abomba bunubu ukuti ivintu vitakabe sona bulabula. Awe we mwene wane uli na mahala ngati wantumi uwa Chala, pakuti uzimenye zyosi zizyo zikubombiwa muchisu ichi.”

²¹ U mwene akamubuzya u Yowabu akati, “Chiza bulo, nkwiza pakubombapo zimo. Buka pakumusenda umulumendo u Abisalomu.”

²² U Yowabu akafughama, bo icheni chache chikotamiye pasi, nukumusaya u mwene. U Yowabu akati, “Ilelo ane ne wambombo wako inzimenye ukuti wampelela ichisa, pakuti witika ukulaba kwane.”

²³ Po u Yowabu akabuka ku Geshuli pakumusenda u Abisalomu nukwiza nawe ku Yelusalemu.

²⁴ Loli u mwene akati, “Abukaye kunyumba iyache ni yache, sona atakize pamaso papane.” Po u Abisalomu akabuka kunyumba iyache ni yache, sona atakiza pamaso pa mwene.

U Devedi asayana sona nu Abisalomu

²⁵ Muchisu chosi icha Izilayeli mutakabamo umwanavuli uyunji uwakuboneka akiza ngati we Abisalomu. Ukwandila ko kumutu mupaka kunyayo, atakaba ni chilema nachimochimo.

²⁶ U Abisalomu akamwanga isisi zyache lyoka bulo pamwaka. Nanti azipima, zikang'wamagha amakilogalamu mabili ukuyana ni chipimilo icha bumwene.

²⁷ U Abisalomu akaba na bana abalumendo batatu nu mwana umulindu weka. Umwana umulindu yula akaba we Tamala, sona akaba wakuboneka akiza nkani.

²⁸ U Abisalomu akikala amaka mabili mu Yelusalemu, sona atakiza pamaso pa mwene.

²⁹ Po u Abisalomu akamwitizya u Yowabu ukuti amutume kwa mwene, loli u Yowabu atakizako. Akamwitizya sona akabubili, pope bulo u Yowabu atakizako.

³⁰ Po u Abisalomu akababuzya abambombo bache akati, “Umughunda uwa Yowabu ghupalamanite nu wane, sona muli amapemba. Bukagha kulakula mughoche.” Abambombo aba Abisalomu bakocha umughunda uwa Yowabu ghula.

³¹ Po u Yowabu akabuka kunyumba iya Abisalomu nukumulalusya ukuti, “Nkimba choni chicho abambombo bako bakocha umughunda wane?”

³² Abisalomu akamubuzya u Yowabu akati, “Nkakutumila amazyu aghakuti, Zagha kuno ukuti nkutume kwa mwene pakumulalusya ukuti, Nkimba choni chicho nanyokako ku Geshuli? Chikaba chiza ukuti ngali nikala bulo kulakula. Nkulonda pakubuka pamaso pa mwene, nanti nananga ichintu chimo, u mwene angoghe.”

³³ U Yowabu akabuka kwa mwene nukumubuzya amazyu ghanagha. U mwene akamwitizya u Abisalomu, po u Abisalomu akiza pamaso pa mwene nukufughama, bo icheni chache chikotamiye pasi. U mwene akamupokela akiza u Abisalomu pakumufyofyonta.