2 Samuweli 13 - IBAYIBOLO 2024

Nizya Amunoni nu Tamala

¹ U Abisalomu umwana uwa Devedi akaba nu muyemba uwakuboneka akiza nkani yuyo akaba we Tamala. Po u Amunoni umwana uwa Devedi akamughana nkani u Tamala yula.

² U Amunoni atakaghonagha utulo, umwakuti akabinagha pachifukwa icha muyemba wache u Tamala yula, pakuti akaba mulindu yuyo atakaghonanapo nu mwanavuli, sona chikaba chipala nkani ukuti u Amunoni abombe nawe zimo.

³ Loli u Amunoni akaba nu mumanyani wache u Yonadabu, umwana uwa Shimeya, uwamwabo uwa Devedi. U Yonadabu akaba muchevu nkani.

⁴ Po akamulalusya u Amunoni akati, “Wee mwana uwa mwene, nkimba choni chicho ukuba we musulumannye isiku ni siku? Choni chatamya?” U Amunoni akamubuzya akati, “Imughanite nkani u Tamala, umuyemba uwa wamwitu u Abisalomu.”

⁵ U Yonadabu akamubuzya akati, “Bukagha pakulambalala pachitala nukuba ngati po ubinite. Nanti uwise iza pakukwennya umubuzye uti, ‘Nalondagha nkani umuyemba wane u Tamala ngali iza nukumpa ichakulya chimo ukuti indye. Ampiyile bo nkumwennya, umwakuti indyele ichakulya chila munyobe zyache.’ ”

⁶ Po u Amunoni akalambalala nukuba ngati po abinite. Bo u mwene iza pakumwennya, akamubuzya akati, “Nalondagha nkani ukuti umuyemba wane u Tamala ngali iza pakumpiyila ivibama pamaso papane, umwakuti indyele munyobe zyache.”

⁷ U Devedi akamutumila u Tamala amazyu aghakuti, “Bukagha kumpanga iya muyemba wako u Amunoni nukumupiyila ichakulya.”

⁸ Po u Tamala akabuka kumpanga iya muyemba wache u Amunoni, yuyo akalambalalagha pachitala. Akasenda ichinyenya nukumupiyila ivibama pamaso papache.

⁹ U Tamala akasenda ichakukazingila nukumupa ivibama vila, loli u Amunoni akakana pakulya. U Amunoni yula akati, “Ubabuzye abantu bosi bepemo muno.” Po abantu bosi bakepamo.

¹⁰ U Amunoni akamubuzya u Tamala akati, “Mpanga ichakulya kuchipinda kuno, umwakuti indyele munyobe zyako.” U Tamala yula akasenda ivibama vivyo akapiya nukubuka navyo kwa muyemba wache kuchipinda kula.

¹¹ Loli bo amupalamizizya u Amunoni ichakulya chila, akamulema u Tamala nukuti, “Wee muyemba wane, zagha ingonane nawe.”

¹² U Tamala akamula akati, “Awe, muyemba wane, utakanfyenge. Ichintu ichamusamu ichi chitabaghiye pakubombiwa mu Izilayeli muno. Utakabombaye ichintu ichabupunganu chinichi.

¹³ Nkimba ane ntakwiza pakuba ni soni pakasi pabantu? Nkimba awe utakwiza pakuboneka muntu mupunganu pakasi paba Izilayeli? Nalamba nenezannya nu mwene, po atangankanizya ukuti imbanje ne muchi wako.”

¹⁴ Loli u Amunoni atakamuteghelezya u Tamala yula. U Amunoni akaba na maka nkani ukumuchila u Tamala, umwakuti akamulema pamaka.

¹⁵ Pisinda pache u Amunoni akamubenga nkani u Tamala ukuchila namumo akamughanila pakwanda pala. U Amunoni akamubuzya u Tamala akati, “Epamo muno.”

¹⁶ U Tamala akamwamula akati, “Awe, ukwiza pakunanga nkani nanti wanchimbizya bunubu ukuchila vivyo wambombela.” Loli u Amunoni atakamuteghelezya u Tamala yula.

¹⁷ U Amunoni akamwitizya uwambombo wache nukumubuzya ukuti, “Mufumye kuzi umukolo uyu nukwighalila kumulyango.”

¹⁸ Po uwambombo wache yula akamufumya kuzi nukwighalila kumulyango. U Tamala akavwalagha inkazo yiyo yikaba ni vyakwibonesekezya akiza, pakuti ghunughu ghukaba mwenda ghugho umwana umulindu uwa mwene yuyo ataghonitepo nu mwanavuli akavwalagha.

¹⁹ U Tamala akinyafila itoyi kumutu nukuzepula inkazo yache pachifukwa icha chitima. Akalema inyobe zyache kunkonto nukubuka, bo akulila nkani.

²⁰ Umuyemba wache u Abisalomu akamulalusya akati, “Nkimba choni chicho u Amunoni akunyazya bunubu? Puma muyemba wane. Wepe u Aminoni muyemba wako. Utakapasyanje nkani.” Po u Tamala akikala bulo mwene munyumba iya muyemba wache u Abisalomu.

²¹ Bo u mwene u Devedi ivwa zyosi zinizi, akakalala nkani.

²² U Abisalomu atakanenapo nachimochimo ichintu ichiza pamo ichibibi kwa Amunoni. Loli akamubenga nkani u Amunoni pachifukwa icha zizyo akamubombela umuyemba wache u Tamala.

U Abisalomu akumutanizya u Amunoni

²³ Bo ghachilapo amaka mabili, u Abisalomu akaba poka na bantu bache babo bakadumulilagha ameya agha ng'ozi zyache mu Baala Hazoli papipi ni mpaka iya chisu icha Efulayimu. Po akabitizya abana bosi abalumendo abamwene ukuti bize kulakula.

²⁴ U Abisalomu akabuka kwa mwene nukumubuzya ukuti, “Wee mwene, ne wambombo wako, poka na bantu bane tukubuka pakudumulila ameya agha ng'ozi zyane. Nkimba chitangakuhobosya awe we mwene na makambala ghako ukuti mubukaye poka nane?”

²⁵ U mwene akamwamula akati, “Awe mwana wane. Te chiza ukuti tubuke twebosi, lumo tungakutamya bulo.” Napapo u Abisalomu akamulambilizya nkani, u Devedi akakana, loli akamusaya bulo.

²⁶ Po u Abisalomu akati, “Nanti utakubukako, buli umwitikizye uwamwitu u Amunoni ukuti abuke poka naswe.” U mwene akamulalusya akati, “Choni chicho ukulonda ukuti u Amunoni abuke poka nawe?”

²⁷ Loli u Abisalomu akamulambilizya nkani, po u Devedi akamwitikizya u Amunoni poka na bana abanji abamwene ukuti babuke poka nu Abisalomu.

²⁸ U Abisalomu akabalamula abantu bache akati, “Ivwa kuno! Nanti u Amunoni akolwa nkani nu vinyo, sona nanti nababuzya ukuti, ‘Mukome u Amunoni,’ po mumughoghe. Mutakanyilaye pachifukwa ichakuti nene nabalamula. Mujimbaye sona mutakazyelaye.”

²⁹ Po abantu aba Abisalomu bakamubombela u Amunoni vivyo u Abisalomu akabalamula. Abana bosi abamwene bakavundumuka nukukwela abana aba mpunda, po bakachimbila.

³⁰ Bo bali pakuchimbila, u Devedi akivwa ukuti, u Abisalomu abaghogha abana bosi abamwene, nayumoyumo uwakupona.

³¹ U mwene akimilila, nukuzepula amenda ghache, po akalambalala pasi, sona abambombo bosi, babo bakimilila papipi bope bakazepula amenda ghabo pachifukwa icha chitima.

³² Loli u Yonadabu umwana uwa Shimeya, yuyo akaba we wamwabo uwa Devedi akati, “Wee mwene wane, utakinong'onaye ukuti abana bosi abamwene baghoghiwa, loli u Amunoni mwene weyuyo afuye. Pakuti chinichi u Abisalomu akaba nacho kumoyo, ukwandila pisiku lilyo u Amunoni akamulema pamaka umuyemba wache u Tamala.

³³ Wee mwene wane, utakapasyanje ukuti abana bako bosi bafuye. Loli u Amunoni mwene weyuyo afuye.”

³⁴ Pakabalilo kalakala u Abisalomu akaba ukuti achimbila. Bo umulindilili yuyo akalindililagha pilinga atalankannya, akennya abantu abinji mumusebo kubwinjililo bwizuba bakwika pighamba. Umulindilili yula akamubuzya u mwene akati, “Nkubennya abantu mumusebo uwa Holonayimu, mulubazu mwighamba.”

³⁵ U Yonadabu akamubuzya u mwene akati, “Ennya, abana abamwene bafika ukuyana namumo ane ne wambombo wako nkanenela.”

³⁶ Bo amala bulo pakunena, abana abamwene bakafika, bo bakulila nkani. Wepe u mwene, poka na bambombo bache bosi bakalila nkani.

³⁷ U Abisalomu akachimbilila kwa Talimayi, umwana uwa Amihudi, yuyo akaba we mwene uwamu Geshuli. Loli u mwene u Devedi akamulila umwana wache isiku ni siku.

³⁸ Bo u Abisalomu achimbilila ku Geshuli, akikala kulakula amaka matatu.

³⁹ Bo u mwene aluvya nizya bufwe ubwa Amunoni, akamusamba nkani u Abisalomu.