2 Samuweli 12 - IBAYIBOLO 2024

U Natani akumuchemela u Devedi

¹ U Mwene akamutuma u Natani kwa Devedi. Bo afika akamwilikila ichili akati, “Mukaya kamo akakulu mukabamo abantu bamo babili, yumo akaba mukabi, uyunji akaba mupina.

² “Umukabi yula” akaba ni ng'ozi ni ng'ombe inyinji nkani.

³ Umupina yula atakaba nacho nachimochimo, loli umwana awa ng'ozi mwene yuyo akaghula. Akamusungilila mupaka akakula ali munyobe zyache na bana bache. Akamulyesya ichakulya chache, nukung'wesezya mulubako lwache, sona akamupakatila munyobe zyache ngati po mwana wache umulindu.

⁴ “Isiku limo umuyeni akiza kunyumba iya mukabi yula, po umukabi yula atakalonda pakusenda ing'ozi pamo ing'ombe yoka pamudimo wache ukuti amupiyile umuyeni wache yula. Loli akasenda umwana uwa ng'ozi uwa mupina yula nukumupiyila umuyeni wache.”

⁵ U Devedi akamukalalila nkani umukabi yula nukumubuzya u Natani ukuti, “Nkulapa pamaso pa Mwene ukuti umuntu yuyo akabomba bunubu afwanje.

⁶ Amunyosezye abana abang'ozi folo pa mwana uwa ng'ozi weka yula, pachifukwa ichakubomba bunubu umwakusita ichisa.”

⁷ Po u Natani akamubuzya u Devedi akati, u Mwene u Chala uwa ba Izilayeli, ati, “Umuntu yunuyu wewe! Ane nkakupakazya amafuta pakuba we mwene uwa ba Izilayeli, sona nkakupoka munyobe izya Sabuli.

⁸ Nkayibika inyumba iya mwene wako, na bachi bache, na bamunyumba iya Izilayeli naba Yuda munyobe zyako. Nanti vinivi vitakakukwana, ngali nkupiye ivintu vimo ivinji.

⁹ Nkimba choni chicho waghasamula amazyu agha Mwene pakubomba ichintu ichibibi pamaso papache? Wamughogha nupanga u Uliya umu Hiti yula, nukumusenda umuchi wache pakuba muchi wako. Ukamughogha pakubombezya upanga uwa ba Amoni.

¹⁰ Po ubwite butakwiza pakuleka nalumo munyumba yako, pachifukwa ichakuti wansamula, nukumusenda umuchi uwa Uliya umu Hiti yula pakuba muchi wako.”

¹¹ U Mwene akati, “Nkwiza pakuwisya intamyo munyumba yako. Nkwiza pakubasenda abachi bako nukumupa umumanyani wako nkani, po akwiza pakughona nabo pamusanya, bo ukwennya na maso ghako.

¹² Awe ukabomba zinizi kubusyefu, loli nkwiza pakuzibomba zinizi pamusanya pamaso paba Izilayeli bosi.”

¹³ Po u Devedi akamubuzya u Natani akati, “Namunangila u Mwene.” U Natani akamwamula akati, “U Mwene akuhobokela, sona utakwiza pakufwa.

¹⁴ Awe wamusamula nkani u Mwene pakubomba bunubu, po umwana wako yula akwiza pakufwa.”

¹⁵ Bo u Natani abwela, u Mwene akamufunda umwana yuyo u Devedi akapapa nu muchi uwa Uliya, umwakuti umwana yula akabinagha nkani.

¹⁶ U Devedi akamulambilizya u Chala pachifukwa icha mwana yula. Akatuzya pakulya, akinjila munyumba yache nukulambalala pasi busiku bosi.

¹⁷ Amakambala ghache ghakimilila mulubazu lwache ukuti ghamunyamusye, loli u Devedi akakana, sona atakalya nachimochimo ichakulya poka na bantu bala.

¹⁸ Pisiku ilyaseveni umwana yula akafwa. Abambombo aba Devedi bakanyilagha nkani pakumubuzya u Devedi yula ukuti umwana yula afuye, pakuti bakinong'ona bakati, “Bo umwana yula achili mumi, tukanena nu Devedi, loli atakatuteghelezya. Po tungamubuzya bulibuli ukuti umwana wache afuye? Lumo angivulazya mwene.”

¹⁹ U Devedi akazyaghannya ukuti abambombo bache bakuteketelana, sona akazyaghannya ukuti umwana yula afuye. Po akalalusya akati, “Nkimba umwana afuye?” Bakamwamula bakati, “Momumo afuye.”

²⁰ Po u Devedi akanyamuka pasi papo akalambalala, akogha, nukupakala amafuta, sona akavwala amenda aghanji. Akinjila mu Nyumba iya Mwene pakumwiputa. Pisinda pache akabwela kunyumba yache, abambombo bache bakamupa ichakulya, po akalya.

²¹ Abambombo bache bakamulalusya u Devedi bakati, “Nkimba choni chicho ukubomba bunubu? Bo umwana yula achili mumi, awe ukatuzya pakulya nukulila, loli ilelo bo umwana afuye, awe ukanyamuka nukulya ichakulya.”

²² U Devedi akamula akati, “Bo umwana yula achili mumi, nkatuzya pakulya nukulila. Nkinong'onagha ukuti, ‘Lumo u Mwene angampelela ichisa nukumuleka umwana yula mumi.’

²³ Loli ilelo pakuti umwana yula afuye, nkimba choni chicho intuzyanje pakulya? Fwandi ningamunyosya sona? Ane ningabuka kuko aliko, loli umwana yula atanganyokela kukwane.”

²⁴ U Devedi akamupumizya umuchi wache u Batisheba, po akaghona nawe. U Batisheba akapapa umwana umulumendo nukumwita ukuti we Solomoni. U Mwene akamughana nkani umwana yula,

²⁵ umwakuti akamutumila amazyu ukwendela mu mulaghuzi u Natani ukuti amwite umwana yula ukuti we Yedidiya, pachifukwa ichakuti u Mwene akamughana nkani umwana yula.

Devedi amulema u Laba

²⁶ Pakabalilo kalakala u Yowabu akalwa ubwite nakaya akakulu nkani aka ba Amoni naka Laba nukukafyula.

²⁷ Po u Yowabu akamutumila intumi u Devedi pakumubuzya ukuti, “Nalwa ubwite nakaya akakulu nkani aka Laba nukubufyula ubuzilo bwache ubwakusungilamo amizi.

²⁸ Losi ulu ubabungannye abasilikali abanji bosi babo bakasyalikila. Wize kuno nukuzenga ivisakasa umwakukazyungulila akaya kala nukukafyula. Lumo ningakafyula nukukita itabwa lyane.”

²⁹ Po u Devedi akababungannya poka abasilikali bache nukubuka pakulwa ubwite nakaya akakulu aka Laba nukukafyula.

³⁰ U Devedi yula akamufyula u mwene uwa ba Amoni impumpu. Ubung'wamu bwache bukaba amakilogalamu 35 agha golide, sona yikaba na mabwe aghamutengo. Po bakamuvwika u Devedi. Akavifyula ivintu ivyinji nkani ivya mukaya akakulu kala,

³¹ nukubefyamo abantu aba mukaya kala. Po akababombezya imbombo iyakupala amatabwa na bapiki ni ntemo sona bakababombezya imbombo iyakukoma injelwa. Akatubombela bunubu utwaya tosi utukulu utwa ba Amoni. Po u Devedi na basilikali bache bosi bakabwela ku Yelusalemu.