2 Samuweli 11 - IBAYIBOLO 2024

U Devedi nu Batisheba

¹ Pakabalilo kako amakwi ghakalembagha amani, sona bo abamwene bakubuka pakulwa ubwite, u Devedi akamutuma u Yowabu, na basongo aba basilikali, poka naba Izilayeli bosi. Bakabapota aba Amoni nukukazyungulila akaya akakulu nkani aka Laba. Loli u Devedi akasyalikila mu Yelusalemu.

² Isiku limo pachamabwila, u Devedi akanyamuka pachitala chache, nukwanda pakugholola ivinama muchipinda ichapamwanya icha nyumba yache iya bumwene. Bo ali palapala akamwennya umukolo yumo ali pakogha. Umukolo yula akabonekagha akiza nkani,

³ po u Devedi akamutuma umuntu pakubuzikizya nizya mukolo yula. Umuntu yula akamubuzya akati, “Umukolo yunuyu we Batisheba, umwana uwa Eliyamu, yuyo akaba muchi uwa Uliya umu Hiti.”

⁴ U Devedi akatuma intumi pakumusenda umukolo yula. Akiza nawe kwa Devedi, po u Devedi akaghonana nawe. Pakabalilo kalakala umukolo yula akaba ukuti aswefiwa bulo ichakumwezi, po umukolo yula akabwela.

⁵ Bo umukolo yula ennya ukuti amela ulwanda, akamutumila u Devedi amazyu aghakuti, “Indi nu lwanda.”

⁶ U Devedi akamutuma u Yowabu na mazyu aghakuti, “Untumile u Uliya umu Hiti. Po u Yowabu akamutuma u Uliya yula kwa Devedi.”

⁷ Bo u Uliya iza, u Devedi akamulalusya nanti u Yowabu akaba akiza, nanti abasilikali bosi bakaba akiza, sona nanti ubwite bukendelelagha akiza.

⁸ U Devedi akamubuzya u Uliya akati, “Bukagha kunyumba, pakutuzya.” Po u Uliya yula akepako kunyumba iya bumwene yila, sona u mwene akamutumila u Uliya ichabupi.

⁹ Loli u Uliya akaghona pantanda iya nyumba iya bumwene poka na bambombo abamwene, sona atakabuka kunyumba.

¹⁰ Abantu bakamubuzya u Devedi bakati, “U Uliya atakabuka kunyumba.” Po u Devedi akamulalusya akati, “Nkimba choni chicho utakabuka kunyumba? Pakuti awe wafuma pabulendo ubutali nkani.”

¹¹ U Uliya akamubuzya u Devedi akati, “Ibokosi ilya Lufingo, naba Izilayeli, sona naba Yuda bali muvisakasa, sona usongo wane u Yowabu, na basilikali abamwene wane bakughona kuzi. Nkimba ningabuka bulibuli kunyumba pakulya nukung'wela, sona nukughona nu muchi wane? Naloli ntangabomba ichintu ichibibi chinichi.”

¹² U Devedi akamubuzya akati, “Ulinde kuno ilelo, po indabi nkwiza pakukwitikizya ukuti ubukaye.” U Uliya yula akalinda mu Yelusalemu pisiku lilalila mupaka ni lyandabi yache.

¹³ U Devedi akamwitizya u Uliya, po akalya nukung'wela poka nawe. U Devedi akamupela u Uliya ukuti akolwe. Loli pachamabwila u Uliya akaghona pachitala chache poka na bambombo aba mwene wache, atakabuka kunyumba yache.

¹⁴ Pandabindabi u Devedi akamusimbila u Yowabu ukalata nukumutuma nu Uliya.

¹⁵ Mwakalata yula akasimbamo ukuti, “Umubike u Uliya mumuzele uwa kuntazi, kuko kuli ubwite ubwakoghofya nkani. Po umuleke mwene ukuti aghoghiwe.”

¹⁶ Bo u Yowabu akazyungulila akaya akakulu nkani kala, akamubika u Uliya pabuzilo bubo akamanya ukuti pakaba abalwani abamaka nkani.

¹⁷ Bo abasilikali aba mukaya kala bafuma kuzi pakulwa ubwite nu Yowabu, abasilikali bamo aba Devedi bakaghoghiwa, po wepe u Uliya umu Hiti yula akaghoghiwa.

¹⁸ U Yowabu akamutumila u Devedi ipangwi lyosi ilya bwite.

¹⁹ Akayibuzya intumi akati, “Bo wamala bulo pakumupangila u mwene nizya bwite,

²⁰ po nanti u mwene akalala nukulalusya ukuti, ‘Nkimba choni chicho mukabuka papipi nakaya pakulwa ubwite? Fwandi mutakamanya ukuti bangasumba utulasilo ukufuma muvibumba ivya lupaso?

²¹ Nkimba wewenu yuyo akamughogha u Abimeleki umwana uwa Yelubi Besheti? Fwandi atakaba mukolo, yuyo akasumba ulwala ukufuma palubumba, umwakuti akafwila mu Thebezi? Nkimba choni chicho mukapalamila kuvibumba?’ Nanti akukulalusya bunubu, umubuzye uti, ‘Wepe uwambombo wako u Uliya umu Hiti yula, aghoghiwa.’ ”

²² Intumi yila yikabuka, bo yafika yikamupangila u Devedi vyosi vivyo u Yowabu akamubuzya.

²³ Intumi yila yikamubuzya u Devedi yikati, “Abalwani bitu bakatupota, bakiza kuzi ukwa kaya pakulwa naswe ubwite, loli aswe tukabachimbizizya kumulyango uwa kaya kala.

²⁴ Po abasilikali babo bakaba nu tulasilo bakasumba utulasilo twabo ukufuma muvibumba ivya kaya kala, sona abantu bako bamo baghoghiwa. Wepe uwambombo wako u Uliya umu Hiti yula, aghoghiwa.”

²⁵ U Devedi akayibuzya intumi yila akati, “Umubuzye u Yowabu uti, ‘Utakapasye nazyo zinizi, pakuti utakuzimanya ukuti wewenu yuyo angafwa kubwite. Jimba umoyo pakulwa ubwite nakaya kala nukukapota.’ Po buka umukazye u Yowabu.”

²⁶ Bo umuchi uwa Uliya ivwa ukuti umulume wache aghoghiwa, akamulila.

²⁷ Bo akabalilo aka chililo kamala, u Devedi akamusendela kunyumba yache pakuba muchi wache, po akapapa nawe umwana umulumendo. Loli zizyo u Devedi akabomba zitakamuhobosya u Mwene.