2 Samuweli 1 - IBAYIBOLO 2024

U Devedi ivwa nizya bufwe ubwa Sabuli nu Yonatani

¹ Pakabalilo kalakala u Sabuli akafwa. U Devedi akaba ukuti abapota aba Amaleki, po akanyokela mukaya akakulu nkani aka Zikilagi nukwikala kulakula amasiku mabili.

² Pisiku ilyabutatu umulumendo yumo akafuma kuvisakasa ivya Sabuli, bo avwalite amenda amazepunkane, sona akikupulila ulufumbi pamutu pachifukwa icha chitima. Umulumendo yula akafika kwa Devedi, po akisumba pasi munyayo zyache nukumuchindika.

³ U Devedi akamulalusya akati, “Wafuma kwiyi?” Akamwamula akati, “Natoloka bulo kuvisakasa ivya ba Izilayeli.”

⁴ U Devedi akamulalusya akati, “Mbuzya, nkimba kwawachi?” Umulumendo yula akamwamula akati, “Abantu bachimbila kubwite, sona abinji baghoghiwa. U Sabuli poka nu mwana wache u Yonatani bope baghoghiwa.”

⁵ U Devedi akamulalusya sona akati, “Nkimba wazimanya bulibuli ukuti u Sabuli poka nu mwana wache u Yonatani bafuye?”

⁶ Umulumendo yula akamwamula akati, “Ane nkaba pighamba ilya Gilibowa, po nkamwennya u Sabuli eghamiye kumpalala yache, bo ingolo izya bwite, sona na bantu babo bakakwela pafalasi bamwavwaniye.

⁷ Bo u Sabuli aghalabuka nukunyennya akanyitizya. Nkitika nkati, ‘Indi pano!’

⁸ “Akandalusya akati, ‘Nkimba wewenu?’ “Po nkamwamula nkati, ‘Ane ne mu Amaleki.’

⁹ “Akambuzya akati, ‘Zagha ungoghe! Pachifukwa ichakuti navulaziwa nkani, sona indi papipi pakufwa.’

¹⁰ “Po nkamughogha, pakuti nkazimanya ukuti bo awa pasi bulo akwiza pakufwa. Nkamuvula impumpu iya bumwene ni koza munyobe yache, po niza navyo kukwako we mwene wane.”

¹¹ U Devedi akazepulannya amenda ghache pachifukwa icha chitima, sona bope abantu bache bakabomba bunubu.

¹² Bakalila nukutuzya pakulya mupaka pachamabwila pachifukwa icha bufwe ubwa Sabuli, poka nu mwana wache u Yonatani. Bakabalila sona aba Izilayeli, abantu aba Mwene pakuti bakaghoghiwa kubwite.

¹³ U Devedi akamulalusya umulumendo yula akati, “Nkimba wafuma kwiyi?” Umulumendo yula akamwamula akati, “Ane ne mu Amaleki, umuntu umuyeni muchisu chinyu.”

¹⁴ U Devedi akamulalusya sona akati, “Nkimba choni chicho utakanyilagha pakumughogha umupakiwa uwa Mwene?”

¹⁵ U Devedi akamwitizya weka uwa bantu bache nukumubuzya ukuti, “Mughoghe!” Po umuntu yula akamughoghela palapala.

¹⁶ U Devedi akamubuzya umu Amaleki yula akati, “Wighogha wemwene pakwitika ukuti, ukamughogha umupakiwa uwa Mwene.”

U Devedi akumulila u Sabuli nu Yonatani

¹⁷ U Devedi akimba ulwimbo pamfwa iya Sabuli, poka nu mwana wache u Yonatani.

¹⁸ Akabalamula abantu aba mu Yuda ukuti bamanyile ulwimbo lunulu, lulo lukwitiziwa Ulwimbo ulwa Bwele lulo lusimbiwe mwibuku ilya Yashala ulwakuti:

¹⁹ “Wee Izilayeli, ubuchindamu bwako bwamalila mumaghamba. Abantu abamaka nkani batuleka.

²⁰ “Mutakazinenaye zinizi mu Gati, sona mutakazifumusyanje mumisebo mu Ashikeloni. Lumo abana abalindu aba ba Filisiti bangahoboka, lumo abana abalindu aba bantu babo batasilimuliwe bangasekela.

²¹ “Mwee maghamba agha mu Gilibowa, inganda yitakawanje sona ivula yitakatimaye papinyu. Patakabanje amaghunda ghagho ghangabapa ivikomwa. Pakuti kulakula abantu bakazisamula ingulu izya bantu abamaka. Ingulu iya Sabuli yitakapakiwa na mafuta.

²² Ubwele ubwa Yonatani butakanyokako bulo, ukusita ukukupula ibanda ilya bantu abakughoghiwa, pamo ukwefya amafuta agha bantu abamaka. Upanga uwa Sabuli atakanyokako bulo.

²³ “U Sabuli nu Yonatani mubumi bwabo bakaghaniwa, sona bakaba bakuboneka akiza. Bakaba poka bo bachili bumi, sona bakaba poka bo bafuye. Bakaba bantu balubilo nkani ukughachila amazwanga. Bakaba bamaka nkani ukuzichila inkalamu.

²⁴ “Mwee bakolo aba mu Izilayeli, mumulile nkani u Sabuli. Pachifukwa icha yuyo amwe mukavwalagha amenda amachesamu na matonte, pakuba ghakuboneka akiza nkani ni vyakwibonesekezya akiza ivya golide.

²⁵ “Abantu abamaka nkani batuleka, sona u Yonatani ali lambalala mumaghamba.

²⁶ Nkukulila awe we wamwitu Yonatani, pakuti ukaba we wapamoyo wane. Ulughano lwako papane lukaba lwakufikapo, sona lwakuswighisya ukuluchila ulughano ulwa bakolo.

²⁷ “Abantu abamaka nkani batuleka. Ivilwilo vyabo ivya bwite vyananganika!”