2 Pitala 3 - IBAYIBOLO 2024

Isiku ilya Mwene

¹ Mwe bamanyani bane abaghaniwa, nkubasimbila ukalata uwabubili uyu. Mubakalata bane babili aba nalondagha pakubakumbusya ukuti mubanje ni nyinong'ono izyanaloli.

² Nkulonda ukuti mukumbukaye amazyu ghagho ghakaneniwa kale na balaghuzi abazelu, sona na malamulo ghosi u Mwene nu Mupoki witu akabapa ukwendela mu batumiwa binyu.

³ Ichakwanda pavyosi, mubaghiye pakwivwisya ukuti mumasiku aghabumalilo abantu abalobezyo bakwiza pakuboneka babo bakukonka ivinyonywa vyabo ivibibi.

⁴ Bakwiza pakubobezya ukuti, “Nkimba u Mwene atakalayizya ukuti akwiza sona? Po ilelo fwandi, ali ko kwiyi? Abanyenya bitu bakafwa kale, loli ivintu vyosi vichili vili bulabula mumo u Chala akavipelela ukwandila ko kubwandilo.”

⁵ Abene bakuluvya bulo madinko ukuti kale u Chala akapela kumwanya ni chisu ichapasi na mazyu ghache. Ichisu ichapasi chikapangiwa ukufuma ku mizi, sona na mizi.

⁶ Po ghakaba mizi ghanagha, ghagho akabombezya pakuchidwibisya nukuchizimizya ichisu ichapasi ichakale.

⁷ Loli na mazyu ghanagha u Chala akuchisunga ichisu ichakumwanya ni chisu ichapasi ichi, umwakuti avinangannye numoto. Akuvisunga mupaka pisiku lilyo akwiza pakubalonga abantu, bo abantu babo batakumunyila u Chala bakwiza pakuzimila.

⁸ Mwee bamanyani bane abaghaniwa, loli mutakaluvyanje ichintu choka ichakuti: Pamaso pa Mwene isiku lyoka lili ngati gho maka 1,000, sona amaka 1,000 ghali ngati lyo lisiku lyoka.

⁹ U Mwene atakuzyelazyela pakukwanilisya zizyo akalayizya, ukuyana namumo abantu bamo bakwinong'onela. Mubuzilo bwache, we mufisalyoyo namwe pakuti atakulonda ukuti nayumo umuntu azimile, loli ukuti umuntu wesi apinduke nukuzileka imbibi zyache.

¹⁰ Loli isiku ilya Mwene likwiza ngati mwiba. Pisiku lilalila ivintu vyosi ivya kumwanya vikwiza pakumala ni chongo ichakoghofya. Ivintu vyosi vikwiza pakusunguluka numoto, sona ichisu ichapasi chope ni vintu vyosi vikwiza pakuba pabuzelu.

¹¹ Pakuti ivintu vyosi vikwiza pakusunguluka bunubu, po nkimba amwe mubaghiye pakuba bantu boni? Mubaghiye mubanje mwe bantu abazelu, sona na bakumunyila u Chala,

¹² bo mukulindilila Isiku ilya Chala, sona muyezye nkani ukuti lyize lubilolubilo. Pisiku lilalila kumwanya kukwiza pakwaka nukunanganika, sona ivintu ivya kumwanya vikwiza pakusunguluka numoto.

¹³ Loli ukuyana ni vintu vivyo u Chala akatulayizya, tukulindilila kumwanya ukupya ni chisu ichapasi, kako kaya aka bugholosu.

¹⁴ Polelo bamanyani bane abaghaniwa, bo mukulindilila isiku lila, muyezye nkani ukuti mubanje bantu abazelu na basita chilema nachimochimo pamaso pa Chala, sona mubanje mumutende nawe.

¹⁵ Mukumbukaye ukuti ubufisalyoyo ubwa Mwene witu ko kubapa ulusako abantu abanji ukuti bapone ukuyana namumo u Pabuli umughaniwa witu yula akabasimbila pakubombezya amahala ghagho u Chala akamupa.

¹⁶ Mubakalata bache bosi akusimba nizya fundo yiniyi. Mubakalata bamo muli ivintu vivyo vipala nkani ukuvyivwisya, sona abantu babo batamanyiye na babo amoyo ghabo ghali mumwanyamwanya bakubanyongannya ukuyana namumo bakunyonganizizya Amasimbo ghamo. Pakubomba bunubu bakwipalaghulila bene ukunanganika.

¹⁷ Polelo bamanyani bane abaghaniwa, pakuti muzimenye kale zinizi, muchebaye ukuti mutakasovyiwe ni mbibi izya bantu ababibi umwakuti mutakawe papo mwimite nkani.

¹⁸ Loli endelela pakukula muchisa na mumahala agha Mwene, yuyo Mupoki witu u Yesu Kilisitu. Ubuchindamu bubanje kukwache ilelo mupaka bwila na bwila! Ameni.