2 Pitala 2 - IBAYIBOLO 2024

Nizya bamanyisi abamyasi

¹ Kale abalaghuzi abamyasi bakabapo pakasi papinyu. Umwakuyana bulo, abamanyisi abamyasi bakwiza pakubapo pakasi papinyu. Bakwiza mubusyefu ni vimanyisyo ivyabumyasi ivyakunangannya mupaka na pakumukana u Mwene wabo yuyo akabatabula. Po bakwiza pakwipalaghulila bene ukunanganika ukwa kuchenusya bulo.

² Abantu abinji bakwiza pakukonka inkalo yabo nkozyasoni, po abantu bakwiza pakuyisamula izila iya bwanaloli pachifukwa icha zizyo bakubomba.

³ Pachifukwa icha kunyonywa ubukabi abene bakwiza pakubapela amwe pakuba mwe zila iyakukabilamo pakubombezya amazyu aghabuzimbuli. Loli ubulongi bwabo buyaniziwe kale, sona ukuzimila kwabo kukubalindilila.

⁴ Pakuti u Chala atakabaleka bulo abantumi bala babo bakananga, loli akabasumbila mu Gehena, mumo basungiwe bo bapinyilile ukulindilila isiku, lilyo u Chala akwiza pakubalonga abantu.

⁵ U Chala atakachileka bulo ichisu chila, loli akachizimizya ichisu ichapasi na mizi aghakwizula sona na bantu babo batakamunyilagha u Chala. Loli akamupoka mwene u Nowa, yuyo akalumbililagha nizya bugholosu poka na bantu abanji seveni.

⁶ U Chala akatufunda utwaya utwa Sodomu nu Gomola pakutuzimizya numoto, umwakuti chibanje chifwanikizyo icha vintu vivyo vikwiza pakubabonekela abantu babo batakumunyila u Chala.

⁷ Loli akamupoka u Loti, umugholosu yuyo akatamiwa nkani ubwamalaya ubwa bantu babo batakamunyilagha u Chala.

⁸ Umugholosu yula akikalagha pakasi papabo, po isiku ni siku akatamiwanga nkani mumoyo wache, bo akwennya nukwivwa inkalo yabo imbibi.

⁹ Po u Mwene amenye namumo akubapokela munjelo abantu babo bakumunyila nukubafunda abantu babo batakumunyila mupaka pisiku lilyo u Chala akwiza pakubalonga abantu.

¹⁰ Nkaninkani akwiza pakubafunda abantu babo bakukonka ivinyonywa ivibibi ivya mubili nukubusamula ubulaghili ubwa Chala. Abamanyisi abamyasi banaba bate nubogha, bamituvyo, loli bakubasamula abachindamu aba kumwanya.

¹¹ Na bantumi bulo aba kumwanya, babo bamaka nkani, sona basongo ukubachila abamanyisi abamyasi aba, batakubasamula pamaso pa Mwene.

¹² Loli abantu banaba bali ngati po vinyamana bulo, ivipeliwa vivyo vite na mahala, vivyo vikapapiwa ukuti vilemiwanje nukughoghiwa. Bakuvisamula na vivyo batakuvimanya. Po bakwiza pakuzimila poka ni vinyamana vila

¹³ nukufundiwa ukuyana nu bubibi bwabo. Chicho chizapo kukwabo ko kubomba izyakughahobosya amabili ghabo pamusanya. Abene bayanite ni vintu ivinyazu, sona bakukozya isoni pakuti bakuhoboka nkani pakubazimbula, bo mukulya poka nabo.

¹⁴ Bakulowa na maso ghabo bulo, sona ni vinyonywa vyabo vitakumala. Bakubategha abantu babo amoyo ghabo ghali mumwanyamwanya. Amoyo ghagho ghamanyiye pakuba mapafu, sona baghuniwa nu Chala!

¹⁵ Bayileka izila ingolosu, sona basobela pakukonka izila iya Balamu umwana uwa Beyoli, yuyo akazighana nkani indalama, zizyo akakaba pachifukwa ichakubomba imbibi.

¹⁶ Loli akachemeliwa pachifukwa icha mbibi zyache. Impunda, ichinyamana chicho chitanganena, yikanena ngati muntu pakumukanizya umulaghuzi yula ukuti atakabombe ivyabupunganu.

¹⁷ Abantu banaba bayanite bulo ni mbwibwi zizyo zite na mizi, sona bayanite bulo nu kabefu yuyo akuputiwa ni impepo iyamaka. U Chala abasungiye ubuzilo ubwa chisi ichakoghofya nkani.

¹⁸ Abene bakunena amazyu aghamituvyo, na ghabupunganu, sona ni vinyonywa vyabo ivibibi ivya mubili bakubategha abantu babo bapona bulo pakasi pabantu aba nkalo imbibi.

¹⁹ Bakulayizya pakubapa abantu ubwabuke, bo abene bazya ba mbibi. Pakuti umuntu akuba muzya uwa chintu chosi chicho chamupota.

²⁰ Nanti abantu bapona amaka agha vintu ivibibi ivya muchisu ichapasi, nukwanda pakumumanya u Mwene witu, sona nu Mupoki witu u Yesu Kilisitu, pisinda pache nukulemiwa nukupotiwa sona navyo, pabumalilo abantu banaba bakuba babibi nkani ukuchila namumo bakabela pakwanda.

²¹ Chikaba chizapo ukuti abantu banaba ngali batayimenyepo nalumolumo izila ingolosu nukuchila ukuyimanya, pisinda pache nukusita ukulikonka ilamulo ilipaghuliwa, lilyo u Chala akabapa.

²² Ichi chikababonekela pakukwanilisya ichili ichakuti, “Imbwa yikunyokela sona ku matapisi ghache,” ni chinji ichakuti, “Ingulube bo bayozya, yikunyokela sona pakughalaghata mumatope.”