2 Pitala 1 - IBAYIBOLO 2024

¹ Ane ne Simoni Pitala, umubombi, sona nu mutumiwa uwa Yesu Kilisitu. Nkubasimbila ukalata uyu abantu babo bapokelite ulwitiko lulo tukapokela ukwendela mubugholosu ubwa Chala witu, sona nu Mupoki u Yesu Kilisitu.

² U Chala abapelele ichisa nukubapa umutende uwakufikapo pachifukwa icha kumumanya yuyo, sona nu Yesu u Mwene witu.

Ukwitiziwa nukusaliwa

³ U Chala na maka ghache akatupa ivintu vyosi ivyakutwavwilizya ukuti tubanje nubumi ubwa nyiputo pakutumanyisya nizya yuyo. Akatwitizya ukuti tugabane nawe ubuchindamu nu bwiza bwache ubukulu.

⁴ Ichi cho chifukwa akatupa ivintu ivikulu nkani ni vyapamwanya, vivyo akatulayizya aswe, umwakuti namwe bulo mupone ivinyonywa ivya muchisu ichapasi, sona nukuti mupokele ubumi ubwa Chala.

⁵ Polelo muyezye pakwiyula nkani ukonjelezya inkalo yinyu inyiza palwitiko lwinyu, pa bwiza bwinyu monjelezyepo amahala,

⁶ pa mahala ghinyu monjelezyepo kwilema, pa kwilema kwinyu monjelezyepo ubufisalyoyo, sona pabufisalyoyo bwinyu monjelezyepo ukumwiputa u Chala.

⁷ Pakumwiputa kwinyu u Chala monjelezyepo ichisa icha bukamu, sona pachisa icha bukamu monjelezyepo ulughano.

⁸ Pakuti nanti muli navyo ivintu vyosi vinivi mubwinji bwache, vitakwiza pakubapela pakuba mwe bantu abakata, sona vikwiza pakubapa amahala aghakumumanyila u Mwene witu u Yesu Kilisitu.

⁹ Loli nanti umuntu ate navyo ivintu vinivi, kokuti mufwamaso nukuti atangennya pabutali, sona aluvizye ukuti imbibi zyache izyakale zikaswefiwa.

¹⁰ Polelo bakamu bane muyezye nkani ukuchilapo pakusimikizya ukuti naloli u Chala akabitizya sona akabasala. Nanti mungabomba bunubu, te mukawepo nalumolumo.

¹¹ Polelo mukwiza pakupokeliwa akiza bo mukwinjila mu Bumwene ubwa bwila na bwila ubwa Mwene witu, sona nu Mupoki witu u Yesu Kilisitu.

¹² Po nkwiza pakubakumbusyanga bwila na bwila ivintu vinivi, napapo muvimenye kale, sona nukuti mwimite nkani pa bwanaloli bubo mukapokela nu moyo winyu ghosi.

¹³ Nkwinong'ona ukuti chizapo pakubakumbusya ivintu vinivi, bo inchili indi muchisakasa icha muchisu ichapasi.

¹⁴ Pakuti inzimenye ukuti akabalilo kane akakwepelamo mu Chisakasa ichi kali papipi ukuyana namumo u Mwene witu u Yesu Kilisitu andanjizizye pabuzelu.

¹⁵ Po nkwiza pakuyezya nkani umwakuti bo nepamo, akabalilo kosi mukumbukaye ivintu vinivi.

Abakaboni aba buchindamu ubwa Kilisitu

¹⁶ Pakuti aswe tutakakonkagha utupangwi, bo tukumanyisya nizyamaka nukwiza sona ukwa Mwene witu u Yesu Kilisitu, loli tukabwennya bukulu bwache na maso ghitu na ghitu.

¹⁷ Bo u Chala u Tata witu akumupa umuchizi nu buchindamu, izyu ilya buchindamu ubukulu likivwika kukwache ukuti, “Uyu Mwana wane umughaniwa, yuyo nhobokite nkani nawe!”

¹⁸ Aswe twebene tukivwa izyu linili kumwanya, bo tuli poka nawe pighamba izelu.

¹⁹ Polelo tuzimenye ukuti amazyu agha balaghuzi ghanaloli. Chingaba chizapo ukuti ilelo mughasende pakuba lukozyo, lulo lukulama muchisi mupaka kubuche, bo ulutondwa ulwa kubuche lwanda pakulama mumoyo ghinyu.

²⁰ Loli pamwanya pavyosi mubaghiye mumanyaye ukuti nayumo umuntu yuyo angalingannya mwene ubulaghuzi ubwa Masimbo.

²¹ Pakuti butalipo ubulaghuzi nabumobumo bubo bukiza nu bwighane ubwa muntu. Loli abantu bakalaghula ukwendela mwa Muzimu Umuzelu amazyu agha Chala.