2 Imbili 8 - IBAYIBOLO 2024

Imbombo izinji izya Solomoni

¹ U Solomoni akasenda amaka 20 pakuzenga Inyumba iya Mwene, poka ni nyumba yache iya bumwene.

² U Solomoni akazenga sona utwaya tuto u Hilamu akamupa, po akabikazya aba Izilayeli mulamula.

³ U Solomoni akabuka ku Hamati Zoba nukukafyula akaya kala.

⁴ Akakazenga sona akaya aka Tadimoli munkolongo, nutwaya tosi utukulu nkani utwakusungilamo ivintu tuto akatuzenga mu Hamati.

⁵ Akakazenga sona akaya akakulu aka Beti Holoni aka kumitu naka kuntende ukuti tubanje malinga ghache nukubika imilyango iya ndatikilo

⁶ naka Balati poka nutwaya utukulu nkani utwakusungilamo ivintu vyache nutwaya tosi utukulu nkani utwakusungilamo ingolo zyache izya bwite ni falasi zyache, kokuti ivintu vyosi vivyo akalondagha pakuzenga mu Yelusalemu na mu Lebanoni, poka na muchigaba chosi chicho akalaghilagha.

⁷ Loli pakabapo abantu aba inko izyakulekanalekana babo bakasyala muchisu chila. Abantu banaba bakaba ba Hiti naba Amoli naba Pelezi naba Hivi sona naba Yebusi, babo batakaba ba Izilayeli,

⁸ kokuti abaluko lwabo bo babo bakasyala muchisu chila. Aba Izilayeli bakapotwa pakubazimizya, po u Solomoni akababombezya abantu banaba imbombo izyakufyenga bulo ngati mumo zibeyele nilelo bulo.

⁹ Loli u Solomoni atakababombezya aba Izilayeli imbombo izyakufyenga bulo, pakuti banaba bakaba basilikali bache na balindilili bache na makambala ghache na basongo aba basilikali na bakwendezya ingolo zyache izya bwite sona na bakukwela pafalasi.

¹⁰ Pakabapo sona amakambala agha Solomoni 250, ghagho ghakaba bo bakapitawa abakwenelezya abantu bala.

¹¹ U Solomoni akamusenda umwana umulindu uwa Falabo kukaya akakulu aka Devedi kunyumba yiyo akamuzengela, pakuti akati, “Umuchi wane atangikala munyumba iya mwene u Devedi uwamu Izilayeli, pachifukwa ichakuti ubuzilo bubo muli Ibokosi ilya Lufingo ilya Mwene buzelu.”

¹² Pachighemo icha Mwene chicho akazenga kuntazi ukwa ntanda, u Solomoni akabikapo ivyakwiyipa ivyakocha kwa Mwene,

¹³ ngati namumo vikalondeliwanga isiku ni siku ukuyana namumo u Mozesi akalamulila nizya Isiku Ilyakutuzya nu Kupanta ukwa Mwezi nu lusekelo lulo lukabombiwanga katatu pa mwaka nu Lusekelo ulwa Chibama chicho chite ni chilungo nu Lusekelo ulwa Nyinulo sona nu Lusekelo ulwa Visakasa.

¹⁴ Uwise u Devedi akamulamula u Solomoni pakubagabila abaputi naba Levi imbombo muvigaba ukuti balongozyanje inyimbo izyakupalizikizya nukubavwa abaputi ukuyana ni mbombo iya isiku ni siku. Akabasala sona abalindilili ukuyana nu tubukatila twabo ukuti balindililaye pamilyango iyakulekanalekana pachifukwa ichakuti ivi vikaba bulo ukuyana namumo u Devedi umubombi uwa Chala akalamulilagha.

¹⁵ Batakazisula nalumolumo zizyo u mwene akabalamula abaputi, pamo aba Levi ukonjelezyapo indaghilo nizya nyumba izyakusungilamo ivintu.

¹⁶ U Solomoni akabomba imbombo yosi ukwandila pisiku lilyo akala ulwalo ulwa Nyumba iya Mwene mupaka akamalizya pakuzenga Inyumba yosi yila. Po Inyumba iya Mwene yila yikamala pakuzengiwa.

¹⁷ Po u Solomoni akabuka ku Eziyoni Gebeli naku Elati mulubazu ulwa nyanja inkulu nkani muchisu icha Edomu.

¹⁸ U Hilamu akamutumila amabwato amakulu nkani umwakulongoziwa na makambala ghache, ghagho ghakamanya akiza nkani ukwenda panyanja. Amakambala ghanagha poka na bambombo aba Solomoni bakabuka ku Ofili pakusenda amakilogalamu 18,000 agha golide nukwiza nagho kwa mwene u Solomoni.