2 Imbili 7 - IBAYIBOLO 2024

Ukupaghuliwa ukwa Nyumba iya Chala

¹ Bo u Solomoni amala pakwiputa, umoto ghukika kumwanya nukuchilungulizya ichakwiyipa ichakocha ni vyakwiyipa, po ubuchindamu ubwa Mwene bukizula mu Nyumba yila.

² Abaputi batakinjila mu Nyumba mula pachifukwa ichakuti ubuchindamu ubwa Mwene bukizulamo.

³ Bo aba Izilayeli bosi bennya umoto ghukwika sona nu buchindamu ubwa Mwene pamwanya pa Nyumba yila, bakafughama pamabwe bo ivyeni vyabo vikotamiye pasi. Po bakamwiputa nukumupalizya u Mwene bakati, “We mwiza. Ulughano lwako lwa bwila na bwila.”

⁴ Po u mwene u Solomoni, poka na bantu bosi bakabika ivyakwiyipa pamaso pa Mwene.

⁵ U mwene u Solomoni akabika ichakwiyipa icha ng'ombe 22,000 ni ng'ozi ni mbuzi 120,000. Po u mwene poka na bantu bosi bakayipaghula Inyumba iya Chala.

⁶ Abaputi bakimilila mubuzilo bwabo, ngati mumo bakabombela aba Levi babo bakaba ni vyimbilo ivya Mwene, vivyo u mwene u Devedi akapanga ukuti vibanje vyakumupalizikizya u Mwene, sona vivyo bakabombezyanga pakumupalizya, bo bakuti, “Ulughano lwako lwa bwila na bwila.” Umwakwenannya naba Levi bala, abaputi bakalizyanga amapati ghabo, po aba Izilayeli bosi bakimililagha.

⁷ U Solomoni akayipaghula sona intanda yiyo yikaba kuntazi ukwa Nyumba iya Mwene. Palapala akabika ivyakwiyipa ivyakocha na mafuta agha vyakwiyipa ivyabupoka, pachifukwa ichakuti ichighemo icha mukuba chicho akapangagha chikaba chinandi nkani ukukwanapo ivyakwiyipa ivyakocha, ni vyakwiyipa ivya busu sona ni vigaba ivya mafuta.

⁸ Pakabalilo kalakala u Solomoni poka naba Izilayeli bosi, babo bakaba palapala bakaba nu lusekelo ulwa amasiku seveni. Lukaba lukomano ulukulu nkani umwakuti abantu aba ku Lebo Hamati mupaka kukasoko kumpaka iyakumitu iya Ijiputi bakiza.

⁹ Pisiku ilya eyiti bakaba nulukomano, pakuti bakaba nu lusekelo ulwa masiku seveni ulwakuchipaghulila ichighemo sona nu lusekelo ulunji ulwa masiku aghanji seveni.

¹⁰ Pisiku ilya 23 ilya mwezi waseveni akababwezya abantu, bo bahoboka nukusekela ukukulu nkani pachifukwa icha vyiza vivyo u Mwene akamubombela u Devedi nu Solomoni sona na bantu bache aba Izilayeli.

U Mwene akumubonekela u Solomoni

¹¹ Bo u Solomoni amala pakuzenga Inyumba iya Mwene ni nyumba iya bumwene, nukumalizya pakubomba vyosi vivyo akinong'ona pakubomba mu Nyumba iya Mwene, niya bumwene,

¹² u Mwene akamubonekela pabusiku nukuti, “Nalwivwa ulwiputo lwako sona nabusala ubuzilo ubu ukuti yibanje Nyumba yane iyakubikilamo ivyakwiyipa.

¹³ “Nanti nighalila kumwanya ukuti ivula yitakatimaye, pamo ukulamula umakanta ukuti anangannye ichisu, pamo nanti abantu bane nabawisizya ichiwaya,

¹⁴ po nanti abantu bane babo bakwitiziwa ni tabwa lyane, biyisya bene nukwiputa pakubomba vivyo vikunhobosya sona nanti bakuzileka imbibi zyabo, ane nkwiza pakubivwa kumwanya nukubahobokela imbibi zyabo sona nkwiza pakuchipoka ichisu chabo.

¹⁵ Po nkwiza pakwighula amaso na makutu ghane nukuteghelezya inyiputo zizyo bakwiputa pabuzilo ubu.

¹⁶ Nayisala nukuyipaghula Inyumba yiniyi ukuti abantu banchindikilayemo bwila na bwila. Ane nkwiza pakwikalaghamo akabalilo kosi.”

¹⁷ “Loli nanti awe ukumbombela mubwanaloli ngati mumo ughuso u Devedi akabombelagha nukubomba zyosi zizyo nkukulamula pakughakonka amalamulo ni ndaghilo zyane,

¹⁸ nkwiza pakubwikazya ubumwene bwako ukuyana namumo nkafingila nu ghuso u Devedi bo namubuzya ukuti, utakwiza pakusobelwapo umuntu nayumoyumo uwakwikala pachitengo icha bumwene mu Izilayeli.”

¹⁹ “Loli nanti waghasula amalamulo ni ndaghilo zyane, zizyo nkupiye nukubabombela abachala abanji pakubiputa,

²⁰ po nkwiza pakubanyunkulamo aba Izilayeli muchisu chane chicho nabapiye. Nkwiza pakuyikana Inyumba yiyo nayipaghula ukuti inchindikiliwanjemo. Nkwiza pakuyipela pakuba kapangwi bulo sona ni chakusekiwa pakasi pabantu bosi.

²¹ Napapo inyumba iyi nyiza nkani, abantu bosi babo bakudumusannya pano bakwiza pakuswigha nukulalusya ukuti, ‘Nkimba choni chicho u Mwene achibombela bunubu ichisu ichi ni Nyumba iyi?’

²² Po abantu bakwiza pakwamula ukuti, ‘Pachifukwa ichakuti bakamukana u Mwene u Chala uwa banyenya babo, yuyo akabefya mu Ijiputi. Bakilondela bene abachala abanji nukubiputa sona nukubabombela. Ichi cho chifukwa u Mwene abawisizya intamyo zyosi zinizi.’ ”