2 Imbili 6 - IBAYIBOLO 2024

U Solomoni akunena na bantu

¹ U Solomoni akiputa akati, “U Mwene anena ati umwenecho asala pakwikala mwibingu ifitu nkani.

² Ilelo nakuzengela Inyumba iya buchindamu iyakuti wikalayemo bwila na bwila.”

³ Bo ichilundilo chosi icha ba Izilayeli chimiliye palapala, u Solomoni akaghalabukila ku bantu bala nukubasaya.

⁴ Po akati, “U Mwene, u Chala uwa Izilayeli apaliwanje, yuyo akwanilisya zizyo akamulayizya nu mulomo wache utata wane u Devedi. Pakuti akati,

⁵ ‘Ukwandila pisiku lilyo nkabefezya abantu bane aba Izilayeli mu Ijiputi, intasalitepo akaya akakulu nkani pakasi panko izya Izilayeli ukuti banzengele inyumba iyakuti inchindikiliwanjemo, pamo intamusalitepo nayumoyumo umuntu ukuti abanje mulongozi uwa bantu bane aba Izilayeli.

⁶ Loli ilelo nakasala akaya akakulu nkani aka Yelusalemu ukuti nikalaye mulamula sona namusala u Devedi ukuti abanje mulongozi uwa bantu bane aba Izilayeli.’

⁷ “Po utata wane u Devedi akinong'onagha pakumuzengela Inyumba u Mwene, u Chala uwa ba Izilayeli ukuti achindikiliwanjemo.

⁸ Loli u Mwene akamubuzya utata wane u Devedi akati, ‘Ukinong'onagha ichintu ichiza nkani ukuti unzengele inyumba iyakuti lichindikiliwanjemo itabwa lyane.

⁹ Te wewe ukwiza pakunzengela Inyumba, loli umwana wako weyuyo akwiza pakunzengela Inyumba ukuti inchindikiliwanjemo.’

¹⁰ “U Mwene abomba zizyo akalayizya. Namupyana utata wane u Devedi, sona nkwikala pachitengo icha bumwene ubwa Izilayeli ukuyana namumo akalayizizya. Namuzengela Inyumba u Mwene u Chala uwa ba Izilayeli ukuti achindikiliwanjemo.

¹¹ Mulamula nalibika Ibokosi ilya Lufingo ilya Mwene, lulo akafingana naba Izilayeli.”

Ulwiputo ulwa Solomoni

¹² Po u Solomoni akimilila pantazi pachighemo icha Mwene pamaso pa chilundilo chosi icha ba Izilayeli, bo agholosizye inyobe zyache mumwanya.

¹³ Pakabalilo kalakala akapanga ichighemo icha mukuba chicho mubutali chikaba amamita mabili, mububaba chikaba imita yoka, sona mumwanya chikaba amamita folo nukuchibika pakasikasi muntanda. Po akakwela pachighemo pala nukufughama pamaso pa chilundilo chosi icha ba Izilayeli, bo agholosizye inyobe zyache mumwanya.

¹⁴ Akati, “Wee Mwene u Chala uwa ba Izilayeli ataliko u Chala uyunji yuyo ayanite nawe kumwanya pamo pachisu ichapasi. Pakuti awe ukusunga ulufingo lulo ukafingana na babombi bako, babo bakuzikonka indaghilo zyako na moyo ghabo ghosi.

¹⁵ Awe wabomba zizyo ukamulayizya umubombi wako utata wane u Devedi. Zyosi zizyo ukamulayizya nu mulomo wako, ilelo wazikwanilisya ni nyobe yako.

¹⁶ “Wee Mwene, u Chala uwa Izilayeli, ilelo kwanilisya zizyo ukamulayizya umubombi wako utata wane u Devedi, bo ukumubuzya ukuti, ‘Utakwiza pakusobelwapo nalumolumo umuntu uwakwikala pamaso papane pachitengo icha bumwene mu Izilayeli, nanti abana bako bakubomba akiza pakuzikonka indaghilo zyane ngati mumo wabombelagha.’

¹⁷ Wee Mwene u Chala uwa Izilayeli, polelo kwanilisya zizyo ukamulayizya umubombi wako u Devedi.

¹⁸ “Wee Chala, nkimba naloli ungikala poka na bantu pachisu ichapasi? Nanti kumwanya pamo kumwanya nkani kutangakukwana, po zingaba bulibuli ni nyumba inandi yiyo nakuzengela?

¹⁹ Wee Mwene u Chala wane, loli ivwa ulwiputo lwane ne mubombi wako nukumpelela ichisa. Ivwa ukulila kwane nu lwiputo lwane, bo nkwiputa pamaso papako.

²⁰ Uyilindililaye Inyumba iyi umusanya nu busiku, ubuzilo bubo ukatinji, ‘Ane nkwiza pakuchindikiliwangamo.’ Ivwa ulwiputo lwane ne mubombi wako, bo nkwiputa pabuzilo ubu.

²¹ Ivwa inyiputo izya mubombi wako, sona nizya bantu bako aba Izilayeli, bo bakwiputa pabuzilo ubu. Ivwa uko kumwanya kuko ukwikala nukutuhobokela.

²² “Nanti umuntu amunangila umupalamani wache, po chikulondiwa ukuti alape, sona nanti alapa ichilapo chilachila pantazi pachighemo chako mu Nyumba iyi,

²³ ivwa uko kumwanya kuko ukwikala nukubombapo zimo nukulonga inongwa iya pakasi pa babombi bako. Umuntu yuyo aghiwa ninongwa umulamule ukuti ananga, sona umufunde ukuyana nukunanga kwache. Loli umuntu yuyo atanangite umulamule ukuti ate ninongwa nukumupa umuvwalo uwa bugholosu bwache.

²⁴ “Nanti abalwani bakubapota abantu bako aba Izilayeli pachifukwa ichakuti bakunangiye, po bakulitambula itabwa lyako mu Nyumba iyi, nukwiputa umwakukulambilizya,

²⁵ ivwa uko kumwanya kuko ukwikala, po uzihobokele imbibi izya bantu bako aba Izilayeli nukubanyosezya kuchisu chicho ukabapa poka na banyenya babo.

²⁶ “Nanti wayilema ivula pachifukwa ichakuti abantu bako bakunangiye, po nanti bakwiputa mu Nyumba iyi pakulitambula itabwa lyako, nukuzileka imbibi zyabo pachifukwa ichakuti wabafunda,

²⁷ po ivwa uko kumwanya kuko ukwikala nukubahobokela imbibi zyabo ababombi bako aba Izilayeli. Ubamanyisyanje inkalo inyiza, sona ubawisizye ivula muchisu chicho ukabapa abantu bako pakuba mpyana yabo.

²⁸ “Nanti izala pamo ichiwaya vyawa muchisu ichi, pamo ububine ubwa vimelwa pamo ichuku pamo umakanta pamo impazi pamo nanti abalwani babo babalema mutwaya twabo utukulu nkani pamo intamyo impalapala pamo ububine bwabawila,

²⁹ po nanti abantu bako aba Izilayeli bakwiputa umwakulambilizya, sona nanti umuntu wesi azimanya intamyo zizyo zyamuwila nukukwezya inyobe zyache mumwanya pakwiputa mu Nyumba iyi,

³⁰ ivwa uko kumwanya kuko ukwikala nukubahobokela abantu bako sona bombapo zimo ukuyana na zyosi zizyo umuntu wesi abomba, pakuti awe uzimenye inyinong'ono izya bantu.

³¹ Bunubu bakwiza pakukunyila nukuzikonka indaghilo zyako pakabalilo kosi kako bakwikala muchisu chicho ukabapa abanyenya babo.

³² “Nanti muyeni bulo, yuyo ate wabamo uwa ba Izilayeli iza ukufuma kuchisu ichakubutali pachifukwa icha itabwa lyako ikulu, sona ni vintu ivikulu ni vyamaka vivyo wababombela abantu bako nanti akwiza pakwiputa mu Nyumba iyi,

³³ ivwa uko kumwanya kuko ukwikala nukuvibomba vivyo umuyeni yula akukulaba, umwakuti abantu bosi aba pachisu ichapasi bangakumanya nukukwivwila, ukuyana namumo abantu bako aba Izilayeli bakubombela. Bunubu bakwiza pakumanya ukuti Inyumba yiyo nayizenga mumo ukwiza pakuchindikiliwangamo.

³⁴ “Nanti wabalamula abantu bako ukuti babuke pakulwa ubwite na balwani babo, sona nanti bakwiputa kukwako mukaya akakulu nkani kako wakasala, ni Nyumba yiyo nakuzengela,

³⁵ ivwa uko kumwanya inyiputo nukulambilizya kwabo, po ubape ubupoti.

³⁶ “Nanti abantu bako bakukunangila, pakuti atalipo nayumoyumo yuyo atakunanga, sona nanti ukubakalalila, bo wababika munyobe izya balwani, babo bakubalema nukubuka nabo pakuba bazya muchisu ichakubutali pamo papipi,

³⁷ loli nanti bapinduka nukuzileka imbibi bo bali muchisu icha buzya nukubalambilizya abantu babo bakabalema pakuba bazya nukuti, ‘Twananga, twabomba imbibi sona twapulumpa.’

³⁸ Nanti abantu bako bapinduka nu moyo wabo ghosi nu muzimu wabo ghosi muchisu icha buzya sona nanti bakwiputa bo bakwennya kuchisu chicho ukabapa abanyenya babo, nakaya akakulu kako wakasala sona ni Nyumba yiyo nakuzengela,

³⁹ po ivwa inyiputo uko kumwanya kuko ukwikala nukulambilizya kwabo sona ubapelelaye ichisa. Ubahobokele abantu bako babo bakunangiye.

⁴⁰ “Polelo we Chala wane, leka amaso ghako ghennye, sona amakutu ghako ghateghelezye inyiputo zizyo abantu bako bakwiputa pabuzilo ubu.

⁴¹ Po wee Mwene u Chala, nyamuka zagha kubuzilo bwako ubwakutuzizyapo, poka ni Bokosi lyako ilya Lufingo lilyo maka ghako. Wee Mwene u Chala, abaputi bako bavwalaye ubupoki, sona ababombi bako abazelu basekelaye pachifukwa icha ubwiza bwako.

⁴² Wee Mwene u Chala, utakamukanaye umupakiwa wako. Kumbuka ulughano lwako ulukulu, lulo ukamulayizya umubombi wako u Devedi.”