2 Imbili 5 - IBAYIBOLO 2024

¹ Bo u Solomoni amala imbombo yosi iyakuzenga Inyumba iya Mwene akiza ni vibombelo vyosi vivyo uwise u Devedi akavipaghula. Ivintu vyache vikaba vyo ivi: Usiliva nu golide sona ni vibombelo ivinji, po akavibika muvipinda ivyakusungilamo ubukabi ubwa mu Nyumba iya Chala.

U Solomoni iza ni Bokosi ilya Lufingo ku Nyumba iya Chala

² Po u Solomoni akabitizizya ku Yelusalemu abasongo aba mu Izilayeli na balongozi aba inko na balongozi abanyumba, ukuti babuke pakulisenda Ibokosi ilya Lufingo ilya Mwene ku Ziyoni, kako kakaba kaya akakulu nkani aka Devedi.

³ Po aba Izilayeli bosi bakabungana poka pamaso pa mwene pakabalilo aka lusekelo mumwezi uwaseveni.

⁴ Bo abalongozi bosi aba ba Izilayeli bafika, aba Levi bakanyamula Ibokosi ilya Lufingo lila

⁵ nukwiza nalyo mu Nyumba iya Chala. Aba Levi na baputi bakanyamula sona Ibokosi ilya Mwene ni Chisakasa icha Mwene, poka ni vibombelo vyache vyosi ivipaghuliwa.

⁶ Po u mwene u Solomoni poka ni chilundilo chosi icha ba Izilayeli bakabungana pantazi pa Bokosi ilya Lufingo nukubika ing'ozi poka ni ng'ombe inyinji nkani insita kubelengiwa.

⁷ Po abaputi bakiza ni Bokosi ilya Lufingo ilya Mwene mu Nyumba iya Chala nukulyikazya mu Buzilo Ubuzelu Nkani, kusi kuvipapande ivya bakelubi.

⁸ Abakelubi bala bakakuzulila ivipapande vyabo pi Bokosi ilya Lufingo nukulivwinka, poka na makwi ghache aghakunyamulila.

⁹ Amakwi aghakunyamulila ghala ghakaba matali nkani umwakuti isonga zyache zikabonekela mu Buzilo Ubuzelu, loli zitakabonekela kuzi ukwa Buzilo Ubuzelu. Amakwi ghanagha ghachili ghaliko mupaka nilelo bulo.

¹⁰ Mu Bokosi mulamula mutakabamo ichintu nachimochimo, loli ghene amabwe mabili amapapate ghagho u Mozesi akaghabika pighamba ilya Sinayi, kuko u Mwene akafingana naba Izilayeli, bo bakwepamo mu Ijiputi.

¹¹ Po abaputi bakepamo mu Chipinda Ichizelu mula. Abaputi bosi babo bakaba mulamula bakipaghula bene ukusita ukubelengela ukuti bakaba pambombo pamo awe.

¹² Aba Levi bosi babo bakaba bimbi kokuti u Asafu nu Hemani nu Yedutuni na bana babo poka na bakamu bakimilila kulubazu ulwakubufumilo bwizuba ubwa chighemo, bo bavwalite amenda amatonte nukulizya malimba ni vinanda na mapango. Abantu banaba bakaba poka na baputi 120, babo bakalizyanga amapati.

¹³ Abalizya amapati na bimbi bakaba poka pakumupala nukumupalizya u Mwene. Abantu babo bakalizyanga amapati nu malimba ni vyimbilo ivinji bakakwezya amazyu ghabo pakumupala u Mwene nukwimba ukuti, “U Chala mwiza, ulughano lwache ulwa bwila na bwila.” Ibingu likizula mu Nyumba iya Mwene,

¹⁴ po abaputi bakapotwa pakubomba imbombo yabo pachifukwa icha libingu lila, pakuti ubuchindamu ubwa Mwene bukizula mu Nyumba iya Chala.