2 Imbili 4 - IBAYIBOLO 2024

Ivibombelo ivya mu Nyumba iya Chala

¹ U mwene u Solomoni akapanga ichighemo icha mukuba chicho mubutali chikaba amamita 9, mububaba chikaba amamita 9 sona mumwanya chikaba amamita folo nu hafu.

² Akapanga sona isonta inkulu iya mukuba iyakuzyungulila. Isonta inkulu yikaba amamita folo nu hafu ukudumusannya pakasi, ubwibizu bwache bukaba amamita mabili bulo sona ukuzyungulila yikaba amamita 13 nu hafu.

³ Mulubazu muntende ukuzyungulila kosi na kosi mukaba vifwani ivya nkambaku vivyo vikaba amamita 13 nu hafu. Ivifwani ivya nkambaku vila vikaba mumizele mibili vivyo bakavipangila poka ni sonta yila.

⁴ Isonta yila akayikazya pamwanya pa ng'ombe 12 izya mukuba. Zitatu zikennya kumitu, zitatu zikennya kubwinjililo bwizuba, izinji zitatu zikennya kuntende, zitatu zikennya kubufumilo bwizuba sona imisinda iya ng'ombe zila yikaba mukasi.

⁵ Ubupapate ubwa sonta yila bukaba ngati chikufi, mulubazu yikagholoka bulo umwakuzyungulila sona yikabonekagha ngati bwezya. Musonta yila mukinjila amalita 60,000 agha mizi.

⁶ U Solomoni akapanga amabeseni 10 aghakoghelamo nukughabika amabeseni fayivi kuntende, sona aghanji fayivi kumitu. Muma beseni mulamula bakasukilaghamo ivintu vyosi vivyo bakabombezyanga pa vyakwiyipa ivyakocha, loli abaputi bakoghela musonta inkulu yila.

⁷ Akapanga ivyakubikapo inyale 10 ivya golide ukuyana namumo akamulanjizizya akapangile kache nukuvibika mu Nyumba iya Chala, fayivi akavibika kuntende, ivinji fayivi akavibika kumitu.

⁸ Akapanga amatebulo 10 nukughabika mu Nyumba iya Chala, fayivi akaghabika kuntende, aghanji fayivi akaghabika kumitu. Akapanga sona amabeseni aghakunyafilila 100 agha golide.

⁹ U Solomoni akazenga intanda iya baputi, ni ntanda inkulu nkani sona ni nyiyi izya ntanda zila nukuzipaka nu mukuba.

¹⁰ Akayibika isonta inkulu yila kuntende pankuto kubufumilo bwizuba.

¹¹ Akapanga sona isonta, na mafosholo, sona na mabeseni aghakunyafilila. Po pabumalilo u Hilamu akamalizya pakupanga ivintu vyosi vivyo u mwene u Solomoni akalondagha ukuti vibanje mu Nyumba iya Chala. Ivintu vila vikaba vyo ivi:

¹² Impanda zibili, sona ni ntaliko zibili pamwanya pa mpanda zila sona na vimo vyakuboneka ngati vilepa vivyo vikaba pamwanya pa mpanda zila

¹³ ni vifwani 400 ivya seke izya manyele nukuzibika pavilepa vibili vila, kokuti imizele mibili iya manyele pa chilepa choka ukulabannya intaliko zizyo zikaba pamwanya pa mpanda zila.

¹⁴ Akapanga sona ivyakubikapo amabeseni poka na mabeseni ghache,

¹⁵ ni sonta inkulu poka ni ng'ombe 12 zizyo zikaba muntende umwa sonta inkulu yila,

¹⁶ ni sonta na mafosholo poka ni vibombelo vyache. Ivibombelo vyosi vivyo u Hilamu Abi akamupangila u mwene Solomoni ukuti vibanje vya mu Nyumba iya Mwene vikaba vya mukuba.

¹⁷ U mwene akapangisya vyosi vinivi mwikombe ilya Yolodani, pakasi pa kaya akakulu aka Sukoti naka Zeleda.

¹⁸ Ivibombelo vyosi vivyo u Solomoni akapanga vikaba vyinji nkani umwakuti ubung'wamu ubwa mukuba butakamanyikwa.

¹⁹ U Solomoni akapanga sona ivibombelo vyosi vivyo vikaba mu Nyumba iya Chala ngati ivi: Ichighemo icha golide, na matebulo aghakubikilapo ivibama ivyakupeghiwa kwa Chala,

²⁰ ni vyakubikapo inyale ivya golide umwenecho poka ni nyale zyache, ukuti zyakaye kuntazi mukasi mu Buzilo Ubuzelu Nkani ukuyana ni ndaghilo zyache,

²¹ nu bwezya ubwa golide ni nyale ni vyakuzimizizya inyale, vyosi vikaba vya golide umwenecho,

²² nu twakuzimizizya inyale utwa golide umwenecho, na mabeseni aghakunyafilila ni mbale inkulu ni vyakufukizizya utwakununkila ni milyango iya golide iya Nyumba iya Chala ni milyango iya mukasi mu Chipinda Ichizelu Nkani sona ni milyango iya chipinda ichikulu.