2 Imbili 36 - IBAYIBOLO 2024

U mwene u Yehowahazi akulaghila mu Yuda

¹ Abantu aba mu Yuda bakamusenda u Yehowahazi umwana uwa Yosiya bakamupakazya amafuta nukumwimika pakuba we mwene mu Yelusalemu pakumupyana uwise.

² U Yehowahazi akaba na maka 23 bo anda pakulaghila sona akalaghila amezi matatu bulo bo ali mu Yelusalemu.

³ U mwene u Neko uwamu Ijiputi akamwefyapo pabumwene mu Yelusalemu nukubalamula abantu aba mu Yuda ukuti basonkaye umusonko amakilogalamu 3,400 agha siliva sona na makilogalamu 34 agha golide.

⁴ U mwene uwamu Ijiputi akamwimika u Eliyakimu uwamwabo uwa Yehowahazi pakuba we mwene uwamu Yuda na mu Yelusalemu, po akalyandula itabwa lyache pakuba we Yehoyakimu. Loli u Neko akamusenda u Eliyakimu uwamwabo uwa Yehowahazi nukubuka nawe ku Ijiputi.

U mwene u Yehoyakimu akulaghila mu Yuda

⁵ U Yehoyakimu akaba na maka 25 bo anda pakulaghila, sona akalaghila amaka 11 bo ali mu Yelusalemu. U Yehoyakimu akamunangila u Mwene u Chala wache.

⁶ U mwene u Nebukadineza uwamu Babiloni akiza pakulwa ubwite nu Yehoyakimu, po akamupinya ni minyololo iya mukuba nukubuka nawe ku Babiloni.

⁷ U Nebukadineza akasenda sona ivibombelo ivya mu Nyumba iya Mwene nukubuka navyo pakuvibika munyumba yache iya bumwene mu Babiloni.

⁸ Imbombo zyosi izinji, ni vintu ivibibi vivyo u Yehoyakimu akabombagha sona na vyosi ivyakususannya nawe visimbiwe mwibuku ilya Mbili iya bamwene aba ba Izilayeli naba ba Yuda. Po umwana wache u Yehoyakini akamupyana pakuba we mwene.

U mwene u Yehoyakini akulaghila mu Yuda

⁹ U Yehoyakini akaba na maka 18 bo anda pakulaghila mu Yuda sona akalaghila bulo amezi matatu na masiku 10 bo ali mu Yelusalemu. U Yehoyakini akananga nkani pamaso pa Mwene.

¹⁰ Bo amakwi ghakulemba, u mwene u Nebukadineza akabatuma abantu pakumulema nukwiza nawe ku Babiloni poka ni vibombelo ivyamutengo ivya mu Nyumba iya Mwene, po bakamwimika uwise umunandi uwa Yehoyakini, u Zedekiya pakuba we mwene uwamu Yuda na mu Yelusalemu.

U mwene u Zedekiya akulaghila mu Yuda

¹¹ U Zedekiya akaba na maka 21 bo anda pakulaghila, sona akalaghila amaka 11 bo ali mu Yelusalemu.

¹² U Zedekiya akamunangila u Mwene u Chala wache, sona atakiyisya pamaso pa mulaghuzi uwa Mwene u Yelemiya yuyo akamusokagha.

¹³ Akamusambukila sona u mwene u Nebukadineza napapo akamulapizya ichilapo mwitabwa ilya Chala. Akaba numoyo umukafu nkani umwakuti atakanyokela kwa Mwene u Chala uwa Izilayeli.

¹⁴ Ukonjelezyapo, abalongozi bosi aba baputi poka na bantu batakaba basubiliwa sona bakakonka inkalo imbibi iya inko izinji, nukuyinyazya Inyumba iya Mwene yiyo akayipaghula mu Yelusalemu.

Ukumongoliwa ukwa kaya akakulu nkani aka Yelusalemu

¹⁵ U Mwene, u Chala uwa banyenya babo, akabatumila amazyu ukwendela muntumi zyache, pachifukwa ichakuti akabapelela ichisa abantu bache sona ni Nyumba yache.

¹⁶ Loli bakazyobezya intumi zyache nukughasulannya amazyu ghache sona bakabasamula abalaghuzi bache, po u Mwene akabakalalila nkani abantu bache, umwakuti patakabapo nayumoyumo uwakupona.

¹⁷ Akiza nu mwene uwamu Babiloni, yuyo akabaghogha abana babo abalumendo muchipinda ichizelu, umwakuti atakabapo nayumoyumo umulumendo pamo umulindu pamo abasongo pamo umughosi yuyo akamuleka mumi. U Chala akababika bosi banaba munyobe izya Nebukadineza.

¹⁸ Akasenda ivibombelo vyosi nu bukabi ubwa mu Nyumba iya Chala, manyi vikulu manyi vinandi sona nu bukabi ubwa munyumba iya bumwene ni nyumba izya makambala ghache nukubuka navyo ku Babiloni.

¹⁹ Bakayocha Inyumba iya Chala nukumongolannya ulupaso ulwa Yelusalemu. Bakocha inyumba zyosi izya bumwene nukunangannya ivintu vyosi ivyamutengo vivyo vikaba mulamula.

²⁰ Akabasenda abantu bosi babo bakasyala bumi nukubuka nabo ku Babiloni pakuba bazya bache sona na bambombo aba bana bache abalumendo mupaka ubumwene ubwa Peleziya bukanda pakulaghila.

²¹ Izi zikabombiwa pakukwanilisya amazyu agha Mwene ghagho akamubuzya u Yelemiya ukuti, “Ichisu chikwiza pakuba na Maka Aghakutuzya sona chikwiza pakuba nkolongo amaka 70 ukuyana namumo umulaghuzi akanenela.”

U mwene u Sayilasi akubalamula aba Yuda ukuti babwelaye

²² Mumwaka uwakwanda bo u mwene u Sayilasi uwamu Peleziya akulaghila, u Mwene akakwanilisya zizyo akamubuzya umulaghuzi u Yelemiya pakunyamusya umoyo uwa Sayilasi ukuti asimbe indaghilo nukuzifumusya mubumwene bwache bosi izyakuti:

²³ U mwene u Sayilasi uwamu Peleziya ati, “ ‘U Mwene u Chala uwakumwanya anyimika ukuti imbanje ne mulaghili uwa chisu chosi ichapasi sona ansalite ukuti imuzengele Inyumba mu Yelusalemu muchisu icha Yuda. U Mwene u Chala abanje nu muntu wesi pakasi papinyu sona amwitikizye ukuti abukaye.’ ”