2 Imbili 34 - IBAYIBOLO 2024

U mwene u Yosiya akulaghila mu Yuda

¹ U Yosiya akaba na maka eyiti bo anda pakulaghila sona akalaghila amaka 31 bo ali mu Yelusalemu.

² Akamuhobosya u Mwene pakubomba ingolosu sona akabombagha zyosi zizyo umunyenya wache u Devedi akabombagha, po atakapaghukila kundilo pamo kumongo.

³ Mumwaka uwa eyiti bo akulaghila sona bo achili mwana munandi, akanda pakumwiputa u Chala uwa munyenya wache u Devedi. Mumwaka uwa 12 akanda pakwefya apakwiputilapo ivifwani mu Yuda na mu Yelusalemu ni vifwani ivya Ashela ni vifwani ivyakubiza sona ni vifwani ivya chela.

⁴ Bo alamula, abantu bakavimongolannya ivighemo vyosi ivya Baala ni vighemo ivyakufukizizyapo utwakununkila. Akavidumulannya ivifwani ivya Ashela nukufwantannya amapumpa agha babo bakabikagha ivyakwiyipa kukwabo.

⁵ Akocha amafupa agha baputi pavighemo vyabo, umwakuti akachiswefya ichisu icha Yuda, nakaya akakulu nkani aka Yelusalemu.

⁶ Akabomba bunubu na mutwaya utukulu utwa muchisu icha Manase nicha Efulayimu nicha Simiyoni mupaka kuchisu icha Nafutali sona na muvisami ivyakuzyungulila utwaya tunutu.

⁷ Akamongolannya ivighemo ni vifwani ivya Ashela nukusya ivifwani sona akamongolannya ivighemo ivyakufukizizyapo utwakununkila mu Izilayeli mosi. Po akanyokela ku Yelusalemu.

Ibuku ilya Ndaghilo lyaghiwa

⁸ Mumwaka uwa 18 bo u Yosiya akulaghila, akamutuma u Shafani umwana uwa Azaliya nu Maseya umulongozi uwa kaya akakulu nkani poka nu Yowa umwana uwa Yowahazi umusimbi, pakuyannya sona Inyumba iya Mwene u Chala wache umwakuti achiswefye ichisu sona ni Nyumba iya Chala.

⁹ Bakabuka ku muputi usongo u Hilikiya nukumupa indalama zizyo abantu biza nazyo ku Nyumba iya Chala, zizyo aba Levi, babo bakalindililagha pamulyango bakapokela kubantu aba muchisu icha Manase nicha Efulayimu sona na bosi babo bakasyalikila mu Izilayeli na bantu bosi aba mu Yuda naba muchisu icha Benjamini poka na babo bakikalagha mu Yelusalemu.

¹⁰ Bakabapa indalama zinizi abantu babo bakwenelezya imbombo iyakuzenga Inyumba iya Mwene. Abantu banaba bakabalipilagha abambombo babo bakabombagha imbombo iyakuyannya sona Inyumba iya Chala.

¹¹ Bakabalipila sona abapalamatabwa na bazengi abanyumba ukuti baghule amabwe aghakubiza na matabwa agha ndatikilo nagha mitaliko iya nyumba zizyo abamwene aba mu Yuda bakazileka ukuti zibanje chisami.

¹² Abantu bala bakasubiliwa nkani pakubomba imbombo yila. Abakapitawa babo bakaba bo aba: U Yahati nu Obadiya, aba Levi abaluko ulwa Melali nu Zekaliya nu Meshulamu, abaluko ulwa Kohati, kokuti aba Levi bosi babo bakamanya nkani pakwimba.

¹³ Aba Levi abanji bakabenelezyanga abambombo abakunyamula ivyakuzengela nukubalongozya abambombo pambombo izyakulekanalekana. Aba Levi abanji bakaba basimbi na bamanya ndaghilo sona na balindilili aba pamulyango.

Ibuku ilya Ndaghilo lyaghiwa

¹⁴ Bo bakwefya kuzi indalama zizyo zikaba mu Nyumba iya Mwene, umuputi u Hilikiya akalyagha Ibuku ilya Ndaghilo lilyo u Mwene akamupa u Mozesi.

¹⁵ U Hilikiya akamubuzya u Shafani umusimbi akati, “Nalyagha Ibuku ilya Ndaghilo mu Nyumba iya Mwene. Po akamupa u Shafani ibuku lila.”

¹⁶ U Shafani akabuka ni buku lila kwa mwene nukumubuzya ukuti, “Amakambala ghako ghakubomba imbombo yosi yiyo ukaghapa ukuti ghabombaye.

¹⁷ Ghalipila indalama zizyo zikaba mu Nyumba iya Mwene nukubapa bakapitawa na bambombo.”

¹⁸ U Shafani umusimbi akamubuzya u mwene akati, “Umuputi u Hilikiya ampiye ibuku.” Po u Shafani akalibelenga pamaso pa mwene.

¹⁹ Bo u mwene ivwa amazyu agha Ndaghilo, akazepula inkazo yache pachifukwa icha chitima.

²⁰ Po akamulamula u Hilikiya nu Ahikamu umwana uwa Shafani nu Abidoni umwana uwa Mika nu Shafani umusimbi sona nu Asaya uwambombo uwa mwene akati,

²¹ “Buka mumbuzikizyeko kwa Mwene sona na mubuzilo ubwa bantu bosi babo bakasyala mu Izilayeli na mu Yuda ukuyana na zizyo zisimbiwe mwibuku lilyo lyaghiwa. Pakuti ubukali ubwa Mwene bubo bukwaka papitu bukulu nkani, pachifukwa ichakuti abanyenya bitu batakivwila zizyo u Mwene akanena sona batakazikonka zizyo zisimbiwe mwibuku ili.”

²² U Hilikiya poka na bantu babo bakatumiwa nu mwene bakabuka pakubuzikizya ku mulaghuzi umukolo u Hulida, umuchi uwa Shalumu umwana uwa Tokati, umwana uwa Hasila, yuyo akaba musungi uwa menda. U Hulida akikalagha mu Yelusalemu muchigaba ichabubili.

²³ U Hulida yula akababuzya akati, “U Mwene u Chala uwa Izilayeli ati, mumubuzye umuntu yuyo abatumite kukwane muti,

²⁴ ‘U Mwene ati, nkwiza pakukawisizya intamyo akaya akakulu nkani kanaka, poka na bantu babo bakwikala mulamula, kokuti ivighune vyosi vivyo visimbiwe mwibuku lilyo likabelengiwa pamaso pa mwene uwamu Yuda.’

²⁵ Pachifukwa ichakuti abantu bankana nukufukizya utwakununkila ku bachala abanji nukunkalalizya pavyosi vivyo bapangite ni nyobe zyabo, po ane nkwiza pakukakalalila akaya akakulu nkani kanaka, umwakuti ubukali bwane butakwiza pakutozoka nalumolumo.

²⁶ Mumubuzye u mwene uwamu Yuda, yuyo abatumite pakumubuzikizya u Mwene mutinji, ‘U Mwene u Chala uwa Izilayeli, akunena nizya mazyu ghagho mwaghivwa akuti:

²⁷ Pachifukwa ichakuti wapinduka nukwiyisya we mwene pamaso pa Chala, bo wivwa amazyu aghakususannya nakaya akakulu nkani kanaka, poka na bantu bache sona nukuti wiyisya pamaso papane pakuzepula inkazo yako nukulila pamaso papane, nane nivwa ulwiputo lwako. Ane ne Mwene nene nanena.

²⁸ Losi ulu ukwiza pakufwa, nukusyiliwa mumutende. Amaso ghako ghatakwiza pakuzyennya intamyo zyosi zizyo nkwiza pakukawisizya akaya akakulu nkani kanaka, sona na bantu babo bakwikala mulamula.’ ” Po abantu bala bakanyokela nukumubuzya u mwene amazyu ghanagha.

U Yosiya akufinga pakumwivwila u Mwene

²⁹ Po u mwene akabitizya poka abasongo bosi aba mu Yuda naba mu Yelusalemu.

³⁰ Akabuka ku Nyumba iya Mwene, poka na bantu aba mu Yuda naba mu Yelusalemu na baputi naba Levi kokuti ukwandila umwana umunandi mupaka usongo. Akababelengela amazyu agha mwi buku ilya lufingo, lilyo bakalyagha mu Nyumba iya Mwene.

³¹ U mwene akimilila papipi ni mpanda yache nukufinga ichipyachipya pamaso pa Mwene, ukuti akwiza pakumwivwilagha, nukukonka amalamulo ghache ni ndaghilo zyache sona ni vimanyisyo vyache nu moyo wache ghosi nu muzimu wache ghosi sona nukughivwila amazyu agha lufingo ghagho ghasimbiwe mwibuku lilalila.

³² Po akabalapizya abantu bosi aba mu Yelusalemu naba muchisu icha Benjamini ukuti basungaye ulufingo lula. Abantu aba mu Yelusalemu bakabomba ukuyana nu lufingo ulwa Chala uwa banyenya babo.

³³ U Yosiya akefyamo ivifwani vyosi ivyakukozya isoni muvigaba vyosi mu Izilayeli, sona akabalamula bosi babo bakikalagha mulamula ukuti bamubombelaye u Mwene u Chala wabo. Pakabalilo kosi aka bumi bwache, abantu bakamubombelagha u Mwene u Chala uwa banyenya babo.