2 Imbili 32 - IBAYIBOLO 2024

U Senakelibu akulwa ubwite na bantu aba mu Yuda

¹ Bo u Hezekiya abomba imbombo mubusubiliwa nkani, u Senakelibu u mwene uwamu Asiliya akiza pakulwa ubwite na bantu aba mu Yuda. Akazenga ivisakasa ivya bwite umwakuzyungulila utwaya utukulu nkani utwa malinga, pakuti akinong'onagha ukuti akwiza pakupota.

² Bo u Hezekiya ennya ukuti u Senakelibu izite, sona nukuti akalondagha pakulwa ubwite mu Yelusalemu,

³ akaghabuzikizya amakambala ghache, na basongo aba basilikali bache nizya kwighalila imbwibwi izya mizi kuzi ukwa kaya akakulu nkani, po bakamwavwa.

⁴ Abasilikali abinji nkani bakabungana nukwighalila imbwibwi zyosi na kalusoko kako kakendagha muchisu chila. Bakalalusya bakati, “Nkimba choni chicho abamwene aba mu Asiliya bize nukughagha amizi aminji nkani?”

⁵ Po akiyula nkani pakuzenga sona ivigaba ivya lupaso vivyo vikamongonkana nukukazengela ichitembe. Akazenga ulupaso ulunji kuzi ukwa lupaso lula nukukazengela amakwelelo akaya akakulu nkani aka Devedi. Akapanga ivilwilo ivyinji ivya bwite sona ni ngulu inyinji nkani.

⁶ Akabasala abasongo aba basilikali ukuti babalongozyanje abantu nukubabungannya pamaso papache pamunalo uwa pamulyango uwa kaya akakulu nkani, po akabakazya na mazyu aghakuti,

⁷ “Mujimbaye sona mubanje na maka. Mutakanyilaye pamo ukuwa amaka, pachifukwa icha mwene uwamu Asiliya poka na basilikali bache abinji babo bali poka nawe, pakuti yuyo ali kulubazu lwitu wamaka ukubachila babo bali kulubazu lwabo.

⁸ Umwene akusubila amaka agha buntu, loli aswe tukusubila amaka agha Mwene u Chala witu sona akwiza pakutulwila ubwite.” Abantu bakajimba bo bivwa amazyu ghagho u mwene u Hezekiya uwamu Yuda akanenagha.

⁹ Pisinda pache bo u Senakelibu u mwene uwamu Asiliya, poka na basilikali bache bakukazyungulila akaya akakulu aka Lakishi, akabatuma abasongo aba basilikali bache ku Yelusalemu kwa Hezekiya u mwene uwa Yuda, poka na bantu bache bosi babo bakaba mulamula na mazyu aghakuti:

¹⁰ “U Senakelibu u mwene uwamu Asiliya ati: ‘Nkimba usubiye ichoni ukuti mwikalaye mu Yelusalemu, bo akaya kinyu kazyunguliliwe nabalwani?’

¹¹ Bo u Hezekiya akuti, ‘U Mwene u Chala witu akwiza pakutupoka munyobe izya mwene uwamu Asiliya, akubasovya bulo, ukuti mufwanje nizala ni nyota.’

¹² Nkimba atakaba we Hezekiya yuyo akefya apakwiputilapo ivifwani, ni vighemo, nukubabuzya abantu aba mu Yuda, naba mu Yelusalemu ukuti, mwiputaye pantazi pachighemo choka sona mufukizyanje utwakununkila palapala?

¹³ “Nkimba mutazimenye zizyo ane na banyenya bane tukazibombela inko zyosi izinji? Nkimba abachala aba inko zilazila babapokitepo lumo abantu babo munyobe zyane?

¹⁴ Nkimba chala wenu pakasi pabachala bosi aba vyisu vinivi babo abanyenya bane bakabanangannya, babapokitepo lumo abantu bache munyobe yane? Po nkimba uchala winyu angabapoka bulibuli munyobe zyane?

¹⁵ Polelo mutakitikizye ukuti u Hezekiya abazimbulaye nukubasovya bunubu. Mutakamusubilaye pakuti atalipo nayumoyumo uchala uwa inko pamo ubumwene, yuyo abapokitepo abantu bache munyobe zyane, pamo munyobe izya banyenya bane. Po uchala winyu atangabomba nachimochimo ukuti abapoke munyobe zyane!”

¹⁶ Po amakambala agha Senakelibu ghala ghakamusamula u Mwene u Chala sona nu mubombi wache u Hezekiya.

¹⁷ U mwene akasimba sona abakalata pakumusamula u Mwene u Chala uwa Izilayeli ukuti, “Ngati mumo abachala aba inko izinji batakabapoka abantu babo munyobe zyane, po wepe uchala uwa Hezekiya atangabapoka abantu bache munyobe zyane.”

¹⁸ Po bakanena zinizi umwakukolomoka mu Chihebeli ku bantu aba mu Yelusalemu babo bakaba palubumba, ukuti baboghofye nukubawisya amaka umwakuti bakafyule akaya kabo akakulu nkani.

¹⁹ Bakamunena u Chala uwa Yelusalemu ngati mumo bakabombela na bachala aba inko izinji izya pachisu ichapasi, kokuti abachala abakupangiwa ni nyobe izya bantu.

²⁰ U mwene u Hezekiya nu mulaghuzi u Yesaya, umwana uwa Amozi bakiputa nukumulilila u Chala uwakumwanya ukuti abavwe.

²¹ U Mwene akamutuma uwantumi wache nukubazimizya abalwabwite bosi na balongozi sona na basongo aba basilikali muvisakasa ivya mwene uwamu Asiliya. Po akanyokela kukaya kache bo isoni zimulemite. Bo injila munyumba iya chala wache, abana bache abalumendo bakamughogha nupanga.

²² Po u Mwene akamupoka u Hezekiya, na bantu aba mu Yelusalemu munyobe izya mwene u Senakelibu uwamu Asiliya sona na munyobe izya balwani babo bosi. Po akabapa umutende kumbazu zyosi.

²³ Abantu abinji bakiza ku Yelusalemu ni vyabupi kwa Mwene, sona ni vyabupi ivyapamwanya kwa mwene u Hezekiya uwamu Yuda. Ukwanda pakabalilo kalakala abantu aba inko izinji zyosi bakamuchindikagha nkani u Hezekiya.

Ububine ubwa Hezekiya

²⁴ Pakabalilo kalakala u Hezekiya akabina nkani sona akaba papipi pakufwa. Akiputa kwa Mwene, po akamwamula ni chimanyilo ichakuswighisya.

²⁵ Loli u Hezekiya atakapalizya pavivyo u Mwene akamubombela, po u Mwene akamukalalila nkani poka na bantu aba Yuda naba mu Yelusalemu.

²⁶ Pisinda pache u Hezekiya akiyisya nukuleka pakwituvya, ukuyana namumo bakabombela abantu aba mu Yelusalemu. Po u Mwene atakabakalalila abantu pakabalilo aka Hezekiya.

²⁷ U Hezekiya akaba muntu umukabi sona muchindikiwa nkani. Akazenga inyumba izyakusungilamo usiliva nu golide nu tumabwe utwamutengo nu twakunonezya ivyakulya ni ngulu sona ni vibombelo ivinji ivyakulekanalekana.

²⁸ Akazenga inyumba izyakusungilamo ingano nu vinyo umupya sona na mafuta agha misyunguti. Akazenga sona ivibagha ivya vitekwa ivyakulekanalekana.

²⁹ Akazenga utwaya nukuzyagha ing'ozi, ni ng'ombe inyinji nkani, pakuti u Chala akamupa ubukabi nkani.

³⁰ U Hezekiya akaba weyuyo akighalila amizi kumitu ukwa mbwibwi iya Gihoni nukughapetulila amizi ghala kubwinjililo bwizuba ubwa kaya akakulu nkani aka Devedi. Akabomba akiza nkani muvyosi vivyo akabombagha.

³¹ Abalongozi aba mu Babiloni bakazituma intumi pakumulalusya nizya chimanyilo ichakuswighisya chicho chikabombiwa muchisu chache. Po u Chala akamuleka ukuti amuyele umwakuti amanye zizyo akinong'onagha.

Ukumala ukwa bumwene ubwa Hezekiya

³² Imbombo izinji zyosi zizyo u Hezekiya akabomba, nukwiyipa kwache, zisimbiwe muchisetuka icha mulaghuzi u Yesaya, umwana uwa Amozi mwibuku ilya Mbili iya bamwene aba ba Yuda, sona naba Izilayeli.

³³ U Hezekiya akafwa nukusyiliwa pighamba, mumapumpa agha baluko ulwa Devedi. Abantu bosi aba mu Yuda, naba mu Yelusalemu bakamuchindika nkani bo afuye. Po umwana wache u Manase akamupyana pakuba we mwene.