2 Imbili 31 - IBAYIBOLO 2024

U Hezekiya akwandizya sona ichiputo

¹ Bo zyosi zinizi zyamala, aba Izilayeli babo bakaba palapala bakabuka mutwaya utukulu mu Yuda nukumongolannya Ivikumbusyo ivipaghuliwa ivya mabwe nukudumulannya ivifwani ivya Ashela. Bakanangannya ubuzilo ubwapamwanya ubwakwiputilapo ivifwani ni vighemo mu Yuda mosi na muchisu icha Benjamini nicha Efulayimu sona nicha Manase. Bo bamala pakuvinangannya vyosi, aba Izilayeli bakabwela.

² U Hezekiya akababika abaputi naba Levi mutubukatila ukuyana ni mbombo zyabo ukuti babikaye ivyakwiyipa ivyakocha ni vyakwiyipa ivyabupoka, nukwenelezya imbombo sona nukwimba inyimbo izya mapalo nizya kupalizikizya pamulyango uwa Nyumba iya Mwene.

³ U mwene akabikagha ivintu ivyache ni vyache pakuba vyakwiyipa ivyakocha ivya pandabindabi na pachamabwila sona ni vyakwiyipa ivyakocha ivya Isiku Ilyakutuzya, nivya Kupanta ukwa Mwezi nivya palusekelo ulunji ukuyana namumo zisimbiliwe mu Ndaghilo izya Mwene.

⁴ Akabalamula abantu babo bakikalagha mu Yelusalemu ukuti babape abaputi naba Levi ichigaba chicho chibabaghiye umwakuti biyipe pakukonka Indaghilo izya Mwene.

⁵ Bo alamula bulabula aba Izilayeli bakiyipa ivikomwa ivyakwanda pakutona ingano nu vinyo umupya na mafuta agha misyunguti nu buchi sona na vyosi ivya mumaghunda ghabo. Bakiyipa ivyinji nkani, kokuti ichigaba choka pa vigaba teni icha vintu vyabo vyosi.

⁶ Po aba Izilayeli na bantu aba mu Yuda babo bakikalagha mutwaya utwa Yuda bope bakiza ni chigaba choka pavigaba teni icha ng'ombe nicha ng'ozi nicha vintu ivipaghuliwa vivyo bakavipaghulila kwa Mwene, u Chala wabo, po bakavibika muvibunga.

⁷ Bakanda pakubomba bunubu mumwezi uwabutatu nukumalizya mumwezi uwaseveni.

⁸ Bo u Hezekiya na makambala ghache biza nukwennya ivibunga vila, bakamupala u Mwene, po akabasaya abantu bache aba Izilayeli.

⁹ U Hezekiya akabalalusya abaputi naba Levi nizya vibunga vilavila.

¹⁰ Po u Azaliya umuputi usongo uwa munyumba iya Zadoki akamula akati, “Ukwanda pakabalilo kako abantu bakanda bulo pakwiza ni vyakwiyipa ku Nyumba iya Mwene, tuli navyo ivyakulya ivyakutukwana sona ni vyakusyalako, pachifukwa ichakuti u Mwene abasayite abantu bache, tuli navyo ivyinji ivyakusyalako.”

¹¹ U Hezekiya akabalamula ukuti bayannye ivipinda ivyakusungilamo ivyakulya mu Nyumba iya Mwene, po zinizi zikabombiwa.

¹² Po bakasubiliwa nkani nukwiza navyo vyakwiyipa vyabo, ni chigaba choka pavigaba teni ni vyabupi ivipaghuliwa. U Konaniya umu Levi akaba mulaghili uwakwenelezya ivintu vinivi sona uwamwabo u Shimeyi akaba wabubili wache.

¹³ U Yehiyeli nu Azaziya nu Nahati nu Asaheli nu Yelimoti nu Yozabadi nu Eliyeli nu Isimakiya nu Mahati sona nu Benaya bakaba bo bakapitawa pasi pabulaghili ubwa Konaniya nu wamwabo u Shimeyi, babo bakasaliwa nu mwene u Hezekiya nu Azaliya usongo uwa ku Nyumba iya Chala.

¹⁴ U Kole umwana uwa Imuna umu Levi, umulindilili uwa pamulyango uwakubufumilo bwizuba akenelezyanga ivyakwiyipa vivyo abantu bakabikagha kwa Chala mubwighane bwabo nukuvigaba ivyakusangula vivyo bakabikagha kwa Mwene sona ni vyabupi ivipaghuliwa.

¹⁵ U Edeni nu Miniyamu nu Yeshuwa nu Shemaya nu Amaliya sona nu Shekaniya bakasubiliwa nkani pakumwavwa mutwaya utukulu tuto abaputi bakikalagha, pakubagabila umwakuyana bulo abaputi abamwabo ukuyana nu tubukatila twabo, abanandi na basongo.

¹⁶ Ukonjelezyapo, bakabagabila abanavuli abakwandila amaka matatu pamo ukuchilapo, babo amatabwa ghabo ghasimbiwe mulubatiko ulwa banyenya babo, kokuti bosi babo banginjila mu Nyumba iya Mwene pakubomba imbombo zyabo izyakulekanalekana izya isiku ni siku, ukuyana ni mbombo zyabo sona nu tubukatila twabo.

¹⁷ Po bakabagabila abaputi, babo bakasimbiwa ukuyana ni nyumba mulubatiko ulwa banyenya babo. Umwakuyana bulo bakabagabila aba Levi ukuyana ni mbombo yabo sona nu tubukatila twabo.

¹⁸ Bakabasimba sona abana na bachi babo na bana abalumendo, na balindu aba bantu bosi babo bakasimbiwa mulubatiko ulwa banyenya babo. Pakuti bakaba basubiliwa pakwipaghula bene.

¹⁹ Ukunena nizya baputi, abaluko ulwa Aloni, babo bakikalagha mumaghunda aghakuzyungulila utwaya twabo utukulu pamo utwaya utunji utukulu, abanavuli bakapeghiwa imbombo ukuyana na matabwa ghabo ukuti bamugabilaye umwanavuli wesi pakasi papabo, sona na bosi babo bakasimbiwa mulubatiko ulwa banyenya aba ba Levi.

²⁰ U Hezekiya akazibomba zinizi muchisu chosi icha Yuda, zizyo zikaba nyiza ni ngolosu, sona ni nsubiliwa pamaso pa Mwene u Chala wache.

²¹ Ivintu vikamwendelagha akiza nkani u Hezekiya pachifukwa ichakuti pavyosi vivyo akabombagha mu Nyumba iya Chala pamo ukukonka indaghilo, akamulondelezya nkani u Chala wache nukumubombela nu moyo wache ghosi.