2 Imbili 30 - IBAYIBOLO 2024

Nizya Lusekelo ulwa Pasa

¹ U Hezekiya akabatumila amazyu aba Izilayeli, na bantu aba mu Yuda, sona akabasimbila abakalata abaluko ulwa Efulayimu nulwa Manase ukubitizya ku Nyumba iya Mwene mu Yelusalemu, ukuti babanje nu Lusekelo ulwa Pasa ulwa Mwene u Chala uwa Izilayeli.

² U mwene poka na makambala ghache, sona ni chilundilo chosi icha mu Yelusalemu bakinong'onagha pakuba nu Lusekelo ulwa Pasa mumwezi uwabubili.

³ Bakapotwa pakuba nu lusekelo lula pakabalilo kache, pachifukwa ichakuti abaputi abinji batakipaghula bene, sona bope abantu batakabungana mu Yelusalemu.

⁴ Ifundo yiniyi yikaba nyiza nkani pamaso pa mwene, ni chilundilo chosi.

⁵ Po bakatuma amazyu mu Izilayeli mosi ukwanda ku Belisheba mupaka ku Dani ukubitizya abantu ku Yelusalemu nukuba nu Lusekelo ulwa Pasa ulwa Mwene, u Chala uwa Izilayeli. Pa lusekelo lunulu patakaba abantu abinji nkani, ukuyana namumo zisimbiliwe.

⁶ Bo u mwene alamula, intumi zikabuka mu Izilayeli, na mu Yuda mosi na bakalata abakufuma kwa mwene, na kumakambala ghache aghakuti, “Mwee bantu mwebosi aba mu Izilayeli, nyokela kwa Mwene u Chala uwa Abulahamu nuwa Yisaki nuwa Yakobo ukuti wepe anyokele kukwinyu, amwe mwe muponite munyobe izya bamwene aba mu Asiliya.

⁷ Mutakabanje ngati banyenya binyu, na bakamu binyu, babo batakaba basubiliwa kwa Mwene u Chala uwa banyenya babo, umwakuti akabapela pakuba chintu ichakoghofya ngati mumo mukwenezezya.

⁸ Mutakabanje na moyo amakafu ngati mumo bakabela abanyenya binyu. Mumwivwilaye u Mwene. Mwizaye kuchipinda chache Ichizelu, chicho achipaghuye bwila na bwila. Mumubombelaye u Mwene u Chala winyu, umwakuti ubukali bwache ubwakoghofya butozoke.

⁹ Nanti mwanyokela kwa Mwene, po abantu babo bakalema abakamu binyu na bana binyu bakwiza pakubapelela ichisa, sona bakwiza pakunyokela muchisu chinichi, pakuti u Mwene u Chala winyu wachisa sona wachililizi. Atakwiza pakubapa inkonto nanti mwanyokela kukwache.”

¹⁰ Po intumi zila zikenda mutwaya tosi utukulu muchisu icha Efulayimu nicha Manase mupaka muchisu icha Zebuloni, loli abantu bakabobezya nukubatuka.

¹¹ Pope bulo abantu bamo aba muchisu icha Asheli nicha Manase nicha Zebuloni bakiyisya nukubuka ku Yelusalemu.

¹² U Chala akabapela abantu aba mu Yuda pakuba nu lweke ukuti babombaye zizyo u mwene na makambala ghache bakalamula, ukuyana na mazyu agha Mwene.

¹³ Mumwezi uwabubili abantu abinji nkani bakabungana mu Yelusalemu ukuti babanje nu Lusekelo ulwa Chibama chicho chite ni chilungo.

¹⁴ Bakefyamo ivighemo mu Yelusalemu nukwefya ivighemo ivyakufukizizya utwakununkila nukuvisumbila mwikombe ilya Kidiloni.

¹⁵ Pisiku ilya 14 mumwezi uwabubili, bakaghogha umwana uwa ng'ozi uwa Pasa. Abaputi naba Levi bakakoziwa isoni, po bakipaghula bene nukwiza ni vyakwiyipa ivyakocha mu Nyumba iya Mwene.

¹⁶ Bakimilila mubuzilo bwabo ukuyana namumo zisimbiliwe mu Ndaghilo izya Mozesi, umuntu uwa Chala. Abaputi bakanyafila ibanda lilyo aba Levi bakabapanga.

¹⁷ Pachifukwa ichakuti abantu abinji batakipaghula, po aba Levi bakaghogha umwana uwa ng'ozi uwa Pasa bosi babo batakipaghula bene sona na babo batakamupaghulila umwana uwa ng'ozi kwa Mwene.

¹⁸ Napapo abantu abinji babo bakafumagha kuchisu icha Efulayimu nicha Manase nicha Isakala sona nicha Zebuloni batakiswefya, loli bakalyanga Ulusekelo ulwa Pasa ukususannya namumo zisimbiliwe. Loli u Hezekiya akabiputila akati, “Wee Mwene we mwiza, umuhobokelaye umuntu wesi

¹⁹ yuyo akumulondelezya nu moyo wache u Mwene, u Chala uwa banyenya bache, napapo atakipaghula mwene ukuyana ni nyiho izyakwiswefesezya.”

²⁰ Po u Mwene akamwivwa u Hezekiya nukubahobokela abantu.

²¹ Aba Izilayeli babo bakaba mu Yelusalemu bakaba nu Lusekelo ulwa Chibama chicho chite ni chilungo amasiku seveni umwakuhoboka ukukulu nkani. Isiku ni siku aba Levi, na baputi bakamupalagha u Mwene pakumwimbila na maka ghabo ghosi.

²² U Hezekiya akabakazya aba Levi bosi, babo bakwivwisya pakubomba imbombo iya Mwene. Po abantu bakaba nu lusekelo amasiku seveni nukubika ivyakwiyipa ivyabupoka, po bakamupala u Mwene, u Chala uwa banyenya babo.

²³ Po abantu bosi bakitinkana pakuba nu lusekelo lula amasiku aghanji seveni. Po umwakuhoboka nkani abantu bala bakaba nu lusekelo amasiku aghanji seveni.

²⁴ U mwene u Hezekiya uwamu Yuda akabapa abantu bala inkambaku 1,000 ni ng'ozi 7,000 sona ni mbuzi sona amakambala ghakabika inkambaku 1,000 ni ng'ozi 10,000 sona ni mbuzi. Pakabalilo kala abaputi abinji nkani bakipaghula bene.

²⁵ Abantu bosi aba mu Yuda bakahoboka nkani poka na baputi naba Levi sona na bosi babo bakafumagha ku Izilayeli poka na bayeni babo bakikalagha mu Izilayeli na mu Yuda.

²⁶ Kukabako ulusekelo ulukulu nkani mu Yelusalemu, umwakuti lutakabapo ulusekelo ulunji ulwakuyana na lunulu ukwandila pakabalilo aka Solomoni, umwana uwa Devedi u mwene uwa Izilayeli.

²⁷ Abaputi naba Levi bakimilila nukubasaya abantu, po u Chala akabivwa, pakuti ulwiputo lwabo lukafika kumwanya kukaya kache akazelu.