2 Imbili 3 - IBAYIBOLO 2024

¹ Po u Solomoni akanda pakuzenga Inyumba iya Mwene mu Yelusalemu pighamba ilya Moliya, papo u Mwene akamubonekela uwise u Devedi, pabuzilo ubwakukomelapo inyinulo ubwa Alawuna umu Yebusi.

² U Solomoni akanda imbombo iyakuzenga pisiku ilyabubili ilya mwezi uwabubili uwa mwaka uwafolo bo akulaghila.

³ Ulwalo ulwa Inyumba iya Chala lulo u Solomoni akala lukaba amamita 27 mubutali sona mububaba lukaba amamita 9 ukuyana ni chipimilo chicho bakabombezyanga kale.

⁴ Ulubinjilo mubutali lukaba amamita 9 ukuyana bulo nu bubaba ubwa Nyumba yila sona mumwanya lukaba amamita 54. Mukasi akayipaka nu golide umwenecho.

⁵ Ichipinda ichikulu icha Nyumba iya Chala akachiyannya na matabwa agha payini, nukuchipaka nu golide umwenecho sona akachilaba ni vifwani ivya makwi agha mabale ni minyololo.

⁶ Akavilaba ivibumba ivya Inyumba yila nu tumabwe utwamutengo sona akabombezyanga ugolide uwa muchisu icha Palavayimu.

⁷ Akapaka nu golide amatabwa agha mukasi kuchisonje na mafulemu ni vibumba ni nyiyi izya Nyumba iya Chala yila sona pavibumba akabizapo abakelubi.

⁸ Akazenga Ichipinda Ichizelu nkani, chicho mubutali bukayana bulo nu bubaba ubwa Nyumba iya Chala yila, umwakuti mubutali yikaba amamita 9 sona mububaba yikaba amamita 9. Mukasi akapakamo nu golide umwenecho uwakung'wama amagalamu 600.

⁹ Ubung'wamu ubwa golide bubo akapangila imizumali bukaba amagalamu 570 sona ivipinda ivya mumwanya akavipaka nu golide.

¹⁰ Akabiza abakelubi babili nukubapaka nu golide sona akababika mu Chipinda Ichizelu nkani chila.

¹¹ Ivipapande ivya bakelubi vyosi poka vikaba amamita 9. Ichipapande choka icha kelubi weka chikapalamasyanga kulubumba ulwa Nyumba yila. Ichipapande ichinji chope chikapalamasannya ni chipapande icha kelubi uyunji yula.

¹² Umwakuyana bulo, ichipapande choka icha kelubi uyunji yula chikaba amamita mabili sona chikapalamasyanga ulubumba ulunji ulwa Nyumba iya Chala. Ichipapande ichinji chikaba amamita mabili, chope chikapalamasyanga ichipapande icha kelubi uwakwanda yula.

¹³ Ivipapande ivya bakelubi bosi poka, bo bavikuzuye vikaba pipipipi amamita 9. Abakelubi bala bakimilila pavinama vyabo, bo ivyeni vyabo vikwennya mukasi mu Nyumba yila.

¹⁴ Akayannya umwenda uwakuzighila uwa buluu nu muchesamile nu muchesamu sona nu mutonte, ghugho ghulabiwe akiza nkani ni chifwani icha bakelubi.

Impanda zibili izya mukuba

¹⁵ Kuntazi pa Nyumba iya Chala akazengapo impanda zibili, zizyo zyosi poka zikaba amamita 15 nu hafu sona umutu uwa pamwanya pampanda zila ghukaba amamita mabili.

¹⁶ Akapanga iminyololo nukuyibika pamwanya pampanda zila. Akapanga sona ivifwani 100 ivya seke izya manyele nukuzipinyilila kuminyololo yila.

¹⁷ Akazisimika impanda zila kuntazi ukwa Nyumba yila yoka akayisimika kuntende nukuyita ukuti Yakini sona iyinji akayisimika kumitu nukuyita ukuti Bowazi.