2 Imbili 29 - IBAYIBOLO 2024

U mwene u Hezekiya akulaghila mu Yuda

¹ U Hezekiya akaba na maka 25 bo anda pakulaghila sona akalaghila amaka 29 bo ali mu Yelusalemu. Unyina akaba we Abiya umwana uwa Zekaliya.

² Akamuhobosya u Mwene, pakubomba ingolosu ukuyana namumo umunyenya wache u Devedi akabombelagha.

³ Mumwezi uwakwanda mumwaka uwakwanda bo akulaghila, akighula inyiyi izya Nyumba iya Mwene nukuziyannya sona.

⁴ Akabitizya abaputi naba Levi ukuti babungane poka muntanda iyakubufumilo bwizuba

⁵ nukubabuzya ukuti, “Mwee ba Levi, ivwa kuno! Losi ulu mwiswefye mwebene, muyipaghulaye Inyumba iya Mwene u Chala uwa banyenya binyu. Mwefyemo ubunyazu bosi Mubuzilo Ubuzelu.

⁶ Abanyenya bitu batakaba basubiliwa sona bakabomba imbibi pamaso pa Mwene u Chala witu nukumukana. Bakayisulannya Inyumba yache nukumupa inkonto.

⁷ Bakighalila sona inyiyi izya ntanda nukuzimya inyale. Batakafukizya utwakununkila pamo ukubika ivyakwiyipa ivyakocha kwa Chala uwa Izilayeli Mubuzilo Ubuzelu.

⁸ Polelo u Mwene abakalaliye abantu aba mu Yuda naba mu Yelusalemu. Abapela pakuba chintu ichakoghofya ni chakuswighisya sona ni chakukozya isoni ngati mumo mukwiyenezya na maso ghinyu.

⁹ Ichi cho chifukwa abanyenya bitu bakaghoghiwa kubwite sona abachi bitu na bana bitu abalumendo na balindu bakalemiwa pakuba bakayidi.

¹⁰ Losi ulu nkulonda pakufingana ulufingo nu Mwene, u Chala uwa Izilayeli, umwakuti ubukali bwache butozoke.

¹¹ Mwee bamanyani bane, mutakakabaye, pakuti u Mwene abasala amwe ukuti mwimaye pamaso papache nukumubombela sona mufukizyanje utwakununkila.”

¹² Po aba Levi bala bakanda pakubomba imbombo ukuyana nuluko lwabo. Pakasi pa baluko ulwa Kohati pakabapo u Mahati umwana uwa Amasayi nu Yoweli umwana uwa Azaliya. Pakasi pa baluko ulwa Melali pakabapo u Kishi umwana uwa Abidi nu Azaliya umwana uwa Yehaleleli. Pakasi pa baluko ulwa Gelishoni pakabapo u Yowa umwana uwa Zima nu Edeni umwana uwa Yowa.

¹³ Pakasi pa baluko ulwa Elizafani pakabapo u Shimuli nu Yeyiyeli. Pakasi pa baluko ulwa Asafu mukabamo u Zekaliya nu Mataniya.

¹⁴ Muluko ulwa Hemani, mukabamo u Yehiyeli nu Shimeyi. Pakasi pa baluko ulwa Yedutuni pakabapo u Shemaya nu Uziyeli.

¹⁵ Bo bababungannya poka abakamu babo nukwipaghula bene, bakinjila mu Nyumba iya Mwene pakuyiswefya ngati mumo u mwene akabalamulila, ukuyana na mazyu agha Mwene.

¹⁶ Abaputi bala bakinjila Mubuzilo Ubuzelu ubwa Mwene pakubuswefya. Bakefya kuzi ukwa ntanda iya Nyumba iya Mwene ivintu vyosi ivinyazu vivyo vikaba mu Nyumba iya Mwene. Aba Levi bakavinyamula nukubuka navyo kwikombe ilya Kidiloni.

¹⁷ Bakanda pakuyipaghula Inyumba yila pisiku ilyakwanda mumwezi uwakwanda. Po pisiku ilya eyiti mumwezi ghulaghula bakafika muntanda iya Nyumba iya Mwene. Bakayipaghula Inyumba yila amasiku eyiti. Pisiku ilya 16 ilya mwezi uwakwanda bakamalizya pakuyipaghula Inyumba iya Mwene yila.

¹⁸ Po bakabuka kwa mwene u Hezekiya nukumubuzya ukuti, “Twayiswefya Inyumba yosi iya Mwene ni chighemo ichakubikapo ivyakwiyipa ivyakocha poka ni vibombelo vyache vyosi ni tebulo ilyakubikapo ivibama ivipaghuliwa ni vibombelo vyache vyosi.

¹⁹ Twayannya sona nukuvipaghula ivibombelo vyosi vivyo u mwene u Ahazi akavyefyamo pachifukwa ichakuti atakaba musubiliwa, pakabalilo kako akalaghilagha. Losi ulu vili pachighemo pamaso pa Mwene.”

²⁰ Pandabindabi u mwene u Hezekiya akaghabungannya amakambala agha mukaya akakulu nkani kala, po bakabuka ku Nyumba iya Mwene.

²¹ Bakiza ni nkambaku seveni, na badubi seveni nu twadubi seveni, na basabwe seveni pakuba chakwiyipa ichakupepesezya imbibi izya bumwene, nizya chipinda ichizelu, sona na bantu aba mu Yuda. Po u mwene akabalamula abaputi, abaluko ulwa Aloni ukuti babikaye ivyakwiyipa vinivi pachighemo icha Mwene.

²² Bakaghogha inkambaku sona abaputi bakasenda ibanda nukulinyafila pachighemo. Pisinda pache bakaghogha abadubi nukunyafila ibanda pachighemo. Bakaghogha sona utwadubi nukunyafila ibanda pachighemo.

²³ Pabumalilo bakiza ni mbuzi pamaso pa mwene, napa chilundilo chosi pakuba chakwiyipa ichakupepesezya imbibi, po bakabika inyobe zyabo pa mbuzi zila.

²⁴ Po abaputi bakaghogha imbuzi nukubika ibanda pachighemo pakuba chakwiyipa ichakupepesezya imbibi izya ba Izilayeli bosi, pachifukwa ichakuti u mwene akalamula ukuti babikaye ichakwiyipa ichakocha ni chakwiyipa ichakupepesezya imbibi izya ba Izilayeli bosi.

²⁵ Po akababika aba Levi mu Nyumba iya Mwene bo bali na mapango ni vinanda ni vivisekeseke ukuyana namumo akanenela u Devedi nu mwenelezyi u Gadi nu mulaghuzi u Natani. U Mwene weyuyo akalamula bunubu ukwendela mu balaghuzi bache.

²⁶ Po aba Levi bakimilila bo balemite ivibombelo ivya Devedi, sona abaputi bakaba na mapati ghabo.

²⁷ U Hezekiya akabalamula ukuti babikaye ichakwiyipa ichakocha pachighemo. Bo banda pakubika ichakwiyipa chila, bakanda pakumwimbila u Mwene na mapati, ni vyakwimbila ivya Devedi u mwene uwa Izilayeli.

²⁸ Po ichilundilo chosi chikiputagha, bo abimbi bakwimba inyimbo, sona bope abakulizya amapati bakalizyanga amapati. Vyosi vinivi vikabombiwa mupaka bakamalizya pakubika ivyakwiyipa ivyakocha.

²⁹ Bo bamala pakubika ivyakwiyipa vila, u mwene, na bantu bosi babo bakaba poka nawe bakafuma pasi nukumwiputa.

³⁰ U mwene u Hezekiya, na makambala ghache bakabalamula aba Levi ukuti bamupalaye u Mwene na mazyu agha Devedi sona nagha mwenelezyi u Asafu. Po bakimba inyimbo izya mapalo nu buhobosu, bo bakumwiputa pakufughama pasi.

³¹ Po u Hezekiya akati, “Ilelo mwipaghulila mwebene kwa Mwene. Zagha ni vyakwiyipa ni vyakwiyipa ivyakumupalizikizya ku Nyumba iya Mwene.” Ichilundilo chikiza ni vyakwiyipa, ivyakumupalizikizya, sona abantu abanji bakiza ni vyakwiyipa ivyakocha mubwighane bwabo.

³² Ubwinji ubwa vyakwiyipa vyosi vivyo ichilundilo chosi chikiza navyo bukaba bo ubu: Inkambaku 70 na badubi 100 nu twadubi 200. Vyosi vinivi bakavibika kwa Mwene pakuba vyakwiyipa ivyakocha.

³³ Ivinyamana vivyo bakavibika pakuba chakwiyipa vikaba vyo ivi: Inkambaku 600 ni ng'ozi ni mbuzi 3,000.

³⁴ Loli abaputi bakaba banandi, umwakuti bakapotwa pakukasa amakwela agha ivyakwiyipa ivyakocha vyosi vila. Po abakamu babo aba Levi bakabavwa mupaka imbombo yosi yikamala, sona mupaka abaputi abanji bosi bakipaghula, pakuti aba Levi bakazikonkagha nkani inyiho izya kwipaghula ukuchila abaputi.

³⁵ Pakabapo ivyakwiyipa ivyakocha ivyinji nkani poka na mafuta agha vyakwiyipa ivyabupoka, ni vyakwiyipa ivya vinyo. Po Inyumba iya Mwene yikanda pakubombeziwa sona.

³⁶ U Hezekiya na bantu bosi bakasekelagha pazizyo u Chala akababombela abantu bache, pachifukwa ichakuti akazibomba lubilolubilo.