2 Imbili 28 - IBAYIBOLO 2024

U mwene u Ahazi akulaghila mu Yuda

¹ U Ahazi akaba na maka 20 bo aba we mwene sona akalaghila amaka 16 bo ali mu Yelusalemu. U Ahazi atakabomba ingolosu pamaso pa Mwene sona atakabomba zizyo umunyenya wache u Devedi akabombagha.

² Akabombagha zizyo abamwene aba Izilayeli bakabombagha, akapanga ivifwani ivya chela ivya Baala ukuti bavyiputaye.

³ Akabika ivyakwiyipa ivyakocha mwikombe ilya Beni Hinomu nukubocha abana bache abalumendo pamoto pakuba chakwiyipa, pachifukwa ichakuti akakonkagha inyiho imbibi izya inko izinji zizyo u Mwene akazichimbizya pamaso paba Izilayeli.

⁴ U Ahazi akabikagha ivyakwiyipa nukufukizya utwakununkila pabuzilo ubwapamwanya ubwakwiputilapo ivifwani na pamwanya pamaghamba sona na muntende mumakwi ghagho ghavwinkite akiza.

Aba Siliya bakulwa ubwite naba Izilayeli

⁵ Polelo u Mwene u Chala wache akamubika munyobe izya mwene uwamu Siliya. Aba Siliya bakamupota nukubalema abantu bache abinji pakuba bakayidi nukwiza nabo ku Damasika. Po bakabakiwa sona munyobe izya mwene uwa ba Izilayeli, yuyo akamupota pakumughogha.

⁶ U Peka umwana uwa Lemaliya akabaghogha abasilikali aba mu Yuda 120,000 pisiku lyoka, pachifukwa ichakuti abantu aba mu Yuda bakamukana u Mwene u Chala uwa banyenya babo.

⁷ U Zikili umu Efulayimu, yuyo akaba musikali umujivu nkani, akamughogha u Maseya umwana uwa mwene nu Azilikamu, yuyo akaba we songo uwa kunyumba iya bumwene sona nu Elikana, yuyo akaba wabubili kwa mwene.

⁸ Aba Izilayeli bakabalema abachi 200,000 poka na bana abalumendo na balindu aba bakamu babo pakuba bakayidi. Bakafyula sona ivintu ivyinji nkani, nukunyokela navyo ku Samaliya.

Umulaghuzi u Odedi

⁹ Loli u Odedi umulaghuzi uwa Mwene akaba kulakula, po akabuka pakukomana na basilikali bo banyokako ku Samaliya. Akababuzya akati, “Pachifukwa ichakuti u Mwene, u Chala uwa banyenya binyu abakalaliye abantu aba mu Yuda, akababika munyobe zyinyu. Loli amwe mwabaghogha mubukalale nkani bubo bwafika na kumwanya.

¹⁰ Polelo mukulonda pakubapela abanavuli na bakolo aba mu Yuda naba mu Yelusalemu pakuba bakayidi binyu. Nkimba mutazimenye ukuti namwe bulo mumunangiye u Mwene u Chala winyu?

¹¹ Po ivwa kuno! Mubanyosye abakamu binyu babo mukabalema pakuba bakayidi, pakuti u Mwene abakalaliye nkani.”

¹² Po abalongozi bamo aba muchisu icha Efulayimu, kokuti u Azaliya umwana uwa Yehohanani nu Belekiya umwana uwa Meshilemoti nu Yehizikiya umwana uwa Shalumu sona nu Amasa umwana uwa Hadilayi bakasusannya na basilikali babo bakafuma kubwite.

¹³ Bakababuzya bakati, “Mutakizaye nabo kuno abakayidi banaba. Lumo tungamunangila u Mwene. Nkimba mukulonda ukuti mubombe zimo izyakonjelezya pa mbibi zyitu zizyo tunangite kale? Pakuti imbibi zyitu nkulu, sona u Mwene abakalaliye aba Izilayeli.”

¹⁴ Po abasilikali bakababika abakayidi bala, sona ni vintu vivyo bakafyula munyobe izya balongozi, ni chilundilo chosi.

¹⁵ Abantu babo bakatambuliwa amatabwa bakanyamuka nukubasenda abakayidi bala, sona bakasenda amenda ghagho bakafyula nukubavwika bosi babo bakaba nkule. Bakabapa amenda ni nkwato ni vyakulya ni vyakung'wela sona na malembo. Abantu bosi babo bakaba badedebazu bakabakwezya pampunda nukubanyosya ku bakamu babo mu Yeliko akaya akakulu nkani aka mabale, po aba Izilayeli bakanyokela ku Samaliya.

U mwene u Ahazi akubalaba aba Asiliya ukuti bamwavwe

¹⁶ Pakabalilo kalakala u mwene u Ahazi akatuma intumi kwa mwene uwamu Asiliya ukuti amwavwe.

¹⁷ Aba Edomu bakiza sona pakulwa ubwite mu Yuda nukubalema abantu pakuba bakayidi,

¹⁸ bo aba Filisiti bakutufyula utwaya utukulu utwa muntende mumaghamba, sona nutwa mu Negebu mu Yuda. Bakatufyula nukwikala mu Beti Shemeshi na mu Ayaloni na mu Gedeloti na mu Soko na mu Timuna sona na mu Gimizo poka nutwaya twache utupalamani.

¹⁹ U Mwene akabakozya isoni abantu aba mu Yuda pachifukwa icha u mwene u Ahazi uwamu Izilayeli, yuyo akabapela abantu ukuti babombaye imbibi, po batakaba basubiliwa kwa Mwene.

²⁰ U mwene u Tigilati Pileseli uwamu Asiliya akiza kukwache, loli akamupelela intamyo mubuzilo ubwa kumwavwa.

²¹ U Ahazi akasenda ivintu vimo ivya mu Nyumba iya Mwene nivya munyumba iya bumwene, na munyumba izya makambala nukumupa u mwene uwamu Asiliya, loli vitakamwavwa napo panandi.

²² Bo u Ahazi akukomana nintamyo zilazila, atakaba musubiliwa kwa Mwene.

²³ Akabika ivyakwiyipa ku bachala aba mu Damasika, babo bakamupota. Pakuti akinong'onagha akati, “Pachifukwa ichakuti abachala aba bamwene aba mu Siliya babavwa abamwene bala, po nane nkwiza pakubika ivyakwiyipa umwakuti banyavwe.”

²⁴ U Ahazi akabungannya ivibombelo ivya mu Nyumba iya Chala nukuvifwantannya. Akighalila inyiyi izya Nyumba iya Mwene, sona akazenga ivighemo kosi na kosi mumisebo iya mu Yelusalemu.

²⁵ Akazenga ubuzilo ubwapamwanya ubwakwiputilapo ivifwani mutwaya tosi utwa Yuda ubwakubikilapo ivyakwiyipa ku bachala abanji, po akamukalalizya u Mwene, u Chala uwa banyenya bache.

²⁶ Imbombo izinji zyosi zizyo u Ahazi akabomba ukwanda pabwandilo mupaka pabumalilo zisimbiwe mwibuku ilya Mbili iya bamwene aba ba Yuda, naba mu Izilayeli.

²⁷ U Ahazi akafwa nukusyiliwa mukaya akakulu nkani aka Yelusalemu, loli atakasyiliwa mumapumpa agha bamwene aba Izilayeli. Umwana wache u Hezekiya akamupyana pakuba we mwene.