2 Imbili 27 - IBAYIBOLO 2024

U mwene u Yotamu akulaghila mu Yuda

¹ U Yotamu akaba na maka 25, bo anda pakulaghila sona akalaghila amaka 16 bo ali mu Yelusalemu. Unyina akaba we Yelusha umwana uwa Zadoki.

² U Yotamu akamuhobosya u Mwene pakubomba ingolosu ukuyana namumo uwise u Uziya akabombelagha, loli atakinjila mu Nyumba iya Mwene. Pope bulo abantu bakabomba imbombo inyonganu.

³ U Yotamu akazenga sona umulyango uwa kumitu uwa Nyumba iya Mwene nukubomba imbombo inkulu nkani iyakuzenga ulupaso ulwa kaya akakulu nkani pighamba ilya Ofeli.

⁴ Akazenga utwaya utukulu nkani mumaghamba agha mu Yuda na malinga sona ni chitembe mumusitu.

⁵ U Yotamu akalwa ubwite nu mwene uwa ba Amoni na basilikali bache nukubapota. Mumwaka ghulaghula aba Amoni bakasonka kukwache amakilogalamu 3,400 agha siliva na makilogalamu 1,000 agha ngano sona na makilogalamu 1,000 agha mapemba. Mumwaka uwabubili nu wabutatu aba Amoni bakasonka umusonko bulabula.

⁶ U Yotamu akaba na maka nkani pachifukwa ichakuti akaba musubiliwa pakumwivwila u Mwene u Chala wache.

⁷ Imbombo izinji zyosi zizyo u Yotamu akabomba pakabalilo kache sona nubwite bubo akalwa ni vintu ivinji vivyo akabomba, visimbiwe mwibuku ilya Mbili iya bamwene aba ba Izilayeli naba mu Yuda.

⁸ U Yotamu akaba na maka 25, bo anda pakulaghila sona akalaghila amaka 16 bo ali mu Yelusalemu.

⁹ U Yotamu akafwa nukusyiliwa mukaya akakulu nkani aka Devedi mu Yelusalemu. Po umwana wache u Ahazi akamupyana pakuba we mwene.