2 Imbili 26 - IBAYIBOLO 2024

U mwene u Uziya akulaghila mu Yuda

¹ Po abantu bosi aba mu Yuda bakamwimika u Uziya, yuyo akaba na maka 16 pakuba we mwene pakumupyana uwise u Amaziya.

² U Uziya akakazenga sona akaya akakulu nkani aka Elati nukubanyosekezya abantu aba mu Yuda, bo uwise u Amaziya afuye.

³ U Uziya akaba na maka 16 bo anda pakulaghila, sona akalaghila amaka 52 bo ali mu Yelusalemu. Unyina akaba we Yekoliya uwamu Yelusalemu.

⁴ Akamuhobosya u Mwene pakubomba ingolosu ukuyana namumo uwise u Amaziya akabombelagha.

⁵ Akamubuzikizya u Chala pakabalilo aka Zekaliya, yuyo akamumanyisya ukumunyila u Chala. Pakabalilo kosi kako akamubuzikizyanga u Mwene, wepe u Chala akamupela ukuti ivintu vimwendelaye akiza.

⁶ U Uziya akabuka pakulwa ubwite naba Filisiti nukumongolannya ulupaso ulwa kaya akakulu aka Gati naka Yabine sona naka Ashidodi. Akazenga sona utwaya utukulu kupipi nakaya aka Ashidodi na kubunji kosi pakasi paba Filisiti.

⁷ U Chala akamwavwa pakulwa ubwite naba Filisiti sona naba Alabu, babo bakikalagha mukaya akakulu aka Guli Baala sona naba Mebuni.

⁸ Aba Amoni bakasonka umusonko kwa Uziya, po akamanyikwa nkani mupaka kumpaka iya Ijiputi, pachifukwa ichakuti akaba na maka nkani.

⁹ U Uziya akazenga ichitembe mu Yelusalemu pa Mulyango uwa Pankuto napa Mulyango uwa Kwikombe na pankuto iya lupaso nukuzizengela amalinga.

¹⁰ Akazenga sona ichitembe munkolongo nukukumba iviziba ivyinji nkani, pachifukwa ichakuti akaba ni vitekwa ivyinji nkani muntende mumaghamba na mwikombe. Akaba na bambombo babo bakabombagha mumaghunda ghache na mumaghunda agha mampesya mumaghamba na muvyisu ivya mboto, pakuti akalighana nkani itope.

¹¹ U Uziya akaba na basilikali babo bakamanya nkani pakulwa ubwite sona bakabuka kubwite mutubukatila ukuyana nu bwinji bwabo umwakulogoziwa nu Yeyiyeli umusimbi nu Maseya, yuyo akalongoziwa nu Hananiya, ikambala ilya mwene.

¹² Ubwinji bosi ubwa basongo aba basilikali, babo bakabalongozya abasilikali bukaba 2,600.

¹³ Abasongo aba basilikali banaba bakabalongozya abasilikali 307,500, babo bakamanya nkani pakulwa ubwite sona na bamaka, ukuti bamwavwanje u mwene pakulwa ubwite na balwani bache.

¹⁴ U Uziya akabapa abasilikali bache bosi ingulu ni mpalala ni visote ni vyela ivya pachifuba nubwele sona ni fyata.

¹⁵ Mu Yelusalemu akabika imizinga yiyo yikapangiwa na bafundi abenecho ukuti yibombeziwe pachitembe na pankuto pakulasila utulasilo nukusumbila amabwe amakulu. Po akamanyikwa nkani kosi na kosi, pachifukwa ichakuti akavwiliziwa nkani mupaka akaba na maka nkani.

¹⁶ Loli bo u Uziya aba na maka nkani, akanda pakwituvya umwakuti akinanga mwene. Atakaba musubiliwa kwa Mwene u Chala wache, po akinjila mu Nyumba iya Mwene pakufukuzya utwakununkila pachighemo.

¹⁷ Umuputi u Azaliya poka na baputi abanji abajivu 80 aba Mwene bakamukonka mulamula.

¹⁸ Bakamuchemela bakati, “Wee Uziya, te chiza ukuti ufukizye utwakununkila kwa Mwene. Iyi yo mbombo iya baputi, abaluko ulwa Aloni, babo bakapaghuliwa ukuti bafukizyanje utwakununkila. Epamo Mubuzilo Ubuzelu ubu, pakuti utakaba musubiliwa kwa Mwene u Chala, po wepe atakwiza pakukuchindika.”

¹⁹ U Uziya yula akaba ni chakufukizizya utwakununkila munyobe yache ukuti afukizye utwakununkila, po akakalala nkani. Bo abakalalila bulabula abaputi bala pantazi pachighemo ichakufukizizya utwakununkila mu Nyumba iya Mwene, amambombo ghakaboneka pacheni chache.

²⁰ Bo u Azaliya umuputi usongo poka na baputi bosi bamwennya, bakennya ukuti akaba na mambombo pacheni chache, po bakamwefyamo lubilolubilo. Wepe bulo akalonda pakwepamo pachifukwa ichakuti u Mwene akamufunda.

²¹ U mwene u Uziya akaba na mambombo mupaka pisiku lyache ilyakufwila. Po akikala mwene bulo munyumba pachifukwa ichakuti akaba na mambombo, ghagho ghakamukanizya pakwinjila mu Nyumba iya Mwene. U Yotamu umwana wache weyuyo akalaghilagha panyumba iya bumwene sona akabalaghilagha abantu aba muchisu chilachila.

²² Imbombo izinji zyosi zizyo u Uziya akabomba pakabalilo kache, ukwandila pabwandilo mupaka pabumalilo zisimbiwe mwibuku ilya mulaghuzi u Yesaya umwana uwa Amozi.

²³ U Uziya akafwa nukusyiliwa papipi na mapumpa agha bumwene pachifukwa ichakuti abantu bakati, “Akaba na mambombo.” Po umwana wache u Yotamu akamupyana pakuba we mwene.