2 Imbili 25 - IBAYIBOLO 2024

U mwene u Amaziya akulaghila mu Yuda

¹ U Amaziya akaba na maka 25 bo anda pakulaghila sona akalaghila amaka 29 bo ali mu Yelusalemu. Unyina akaba we Yehoyadini uwamu Yelusalemu.

² U Amaziya akamuhobosya u Mwene pakubomba ingolosu, loli atakazibomba nu moyo wache ghosi.

³ Bo u Amaziya abwikazya bulo ubumwene bwache, akaghaghogha amakambala ghagho ghakamughogha uwise.

⁴ Pope bulo atakabaghogha abana babo, ukuyana namumo zisimbiliwe mu Ndaghilo izya Mozesi, mumo u Mwene akalamula akati, “Abapapi batakaghoghiwanje pachifukwa icha mbibi izya bana babo, bope abana batakaghoghiwanje pachifukwa icha mbibi izya bapapi babo. Loli umuntu wesi aghoghiwanje pachifukwa icha mbibi izyache ni zyache.”

U Amaziya akulwa ubwite naba Edomu

⁵ U Amaziya akabitizya poka abantu aba mu Yuda nukubabika pasi pabulaghili ubwa basongo aba basilikali na basilikali 1,000 aba muchisu chosi icha Yuda, nicha Benjamini ukuyana ni nyumba zyabo. Akababungannya poka abasilikali abakwandila amaka 20, pamo ukuchilapo nukubagha ukuti bakabapo 300,000, babo bakamanya pakulwa ubwite pakubombezya impalala ni ngulu.

⁶ Akabasimba imbombo abasilikali 100,000 aba mu Izilayeli, nukubalipila amakilogalamu 3,400 agha siliva.

⁷ Loli umulaghuzi akiza nukumubuzya ukuti, “Wee mwene utakabukaye kubwite poka ni chilundilo icha ba Izilayeli, pachifukwa ichakuti u Mwene ate poka naba Izilayeli, pamo abantu aba muchisu icha Efulayimu.

⁸ Napapo mungajimba nukubuka pakulwa ubwite, u Chala akwiza pakubapota pamaso pa balwani binyu, pakuti u Chala ali na maka aghakubavwilizya pamo aghakubapotela.”

⁹ U Amaziya akamulalusya umulaghuzi yula akati, “Nkimba imbombe choni na makilogalamu 100 agha ghagho nabalipila abasilikali aba Izilayeli?” Umulaghuzi yula akamwamula akati, “U Mwene angakunyosezya ivintu ivyinji nkani ukuchila vinivi.”

¹⁰ Po u Amaziya akababwezya abasilikali babo bakafuma kuchisu icha Efulayimu. Bakabakalalila abantu aba mu Yuda, po bakabwela bo bakalaye nkani.

¹¹ U Amaziya akijimbilizya sona po akabalongozya abasilikali bache kwikombe ilya Mbeya, kuko akabaghogha abasilikali 10,000 aba mu Seyili.

¹² Abasilikali aba mu Yuda bope bakabalema bumi abantu 10,000 nukukwela nabo pamwanya pibwe nukubasumbila pasi, umwakuti bosi bakapyokonkana.

¹³ Pakabalilo kalakala abasilikali babo u Amaziya akababwezya batakitikiziwa pakulwa ubwite, mubuzilo bwache bakanda pakulwa nutwaya utwa Yuda nukufyula ivintu vyache, ukwandila ku Samaliya mupaka ku Beti Holoni. Bakabaghogha abantu 3,000 nukusenda ivintu ivyinji nkani vivyo bakafyula.

¹⁴ Bo u Amaziya abwelako pakubaghogha aba Edomu, akasenda abachala aba ba Seyili pakuba bachala bache. Akabachindika nukubika ivyakwiyipa ivyakocha ku bachala balabala.

¹⁵ U Mwene akamukalalila u Amaziya, po akamutumila umulaghuzi pakumulalusya ukuti, “Nkimba choni chicho ukababuzikizya abachala aba abantu banaba, babo bakapotwa pakubapoka abantu babo munyobe zyako?”

¹⁶ Bo umulaghuzi yula achili ali pakunena, u mwene akamulalusya akati, “Nkimba sweswe tukakusala ukuti ubanje we wakumanyisya u mwene amahala? Utakandizye sona! Nkimba choni chicho ukulonda pakufwa?” Umulaghuzi yula akaleka loli akati, “Inzimenye ukuti u Chala akulonda pakukughogha, pachifukwa ichakuti wabomba zinizi sona nukuti ukazisulannya zizyo nkakubuzya.”

U Amaziya akulwa ubwite naba Izilayeli

¹⁷ Bo u Amaziya u mwene uwa Yuda aghabuzikizya amakambala ghache, akamutumila u Yehowahazi umwana uwa Yowashi, umwizukulu uwa Yehu, u mwene uwamu Izilayeli amazyu aghakuti, “Nanti we mwanavuli, zagha tukomane pamaso na pamaso.”

¹⁸ Loli u mwene u Yehowashi akamwamula akati, “Intolovu iya mu Lebanoni yikalitumila amazyu ikwi ilya mwale itali ilya mu Lebanoni ukuti, ‘Itikizya umwana wako ukuti abanje muchi uwa mwana wane.’ Po ichinyamana icha mu Lebanoni chikadumusannya palapala nukuyikanyankila bulo impanya iya mwivwa yila.

¹⁹ Awe ukwinong'ona ukuti ubapotite aba Edomu, polelo ukwitutumula nukwituvya. Loli ikala bulo panyumba! Nkimba choni chicho ukwilondela intamyo zizyo zingakunangannya awe poka na bantu aba mu Yuda?”

²⁰ Loli u Amaziya atakateghelezyanga, pakuti u Chala akabomba bunubu umwakuti ababike munyobe izya Yehowashi, pachifukwa ichakuti bakabuzikizyanga abachala aba mu Edomu.

²¹ U Yehowashi u mwene uwamu Izilayeli akabuka pakulwa ubwite. U Yehowashi nu Amaziya u mwene uwamu Yuda bakalwa ubwite pa Beti Shemeshi mu Yuda.

²² Aba Izilayeli bakabapota abantu aba mu Yuda, po umusilikali wesi akachimbilila kukaya kache.

²³ U mwene u Yehowashi akamulema u mwene u Amaziya, umwana uwa Yowashi, yuyo akaba mwizukulu uwa Ahaziya mu Beti Shemeshi. Po u Yehowashi akiza nawe ku Yelusalemu nukumongolannya ulupaso ulwa Yelusalemu amamita 200 ukwandila pamulyango uwa Efulayimu mupaka pamulyango uwa pankuto.

²⁴ Akasendamo ugolide nu siliva wesi sona ni vibombelo vyosi vivyo vikaba mu Nyumba iya Chala sona vivyo vikasungiwa nu Obedi Edomu, poka nu bukabi bosi bubo bukaba munyumba iya bumwene na bantu babo bakabalema pakuba bakayidi nukunyokela ku Samaliya.

²⁵ U Amaziya umwana uwa Yowashi u mwene uwamu Yuda, akalaghila amaka 15, bo u Yehowashi umwana uwa Yehowahazi, u mwene uwamu Izilayeli afuye kale.

²⁶ Imbombo izinji zyosi zizyo u Amaziya akabomba ukwanda pabwandilo mupaka pabumalilo zisimbiwe mwibuku ilya Mbili iya bamwene aba ba Yuda, naba Izilayeli.

²⁷ Ukwandila pakabalilo kako u Amaziya akamukana u Mwene, abantu bakabatika nizya kumughoghela mu Yelusalemu. Po akachimbilila ku Lakishi, loli abalwani bache bakabatuma abantu ukuti bamukonke nukumughoghela kulakula.

²⁸ Bakaghunyamula umuvimba wache pafalasi nukunyokela nagho, po bakamusyila mumapumpa agha banyenya bache mukaya akakulu nkani aka Devedi mu Yuda.