2 Imbili 24 - IBAYIBOLO 2024

U mwene u Yowashi akulaghila mu Yuda

¹ U Yowashi akanda pakulaghila bo ali na maka seveni, sona akalaghila amaka 40 bo ali mu Yelusalemu. Unyina akaba we Zibiya uwamu Belisheba.

² U Yowashi akamuhobosya u Mwene pakubomba ingolosu pakabalilo kosi aka muputi u Yehoyada.

³ U Yehoyada akamusendela u Yowashi abachi babili, po akapapa abana abalumendo na balindu.

⁴ Bo pachilapo akabalilo u Yowashi akadumula nizya kuyannya sona Inyumba iya Mwene.

⁵ Akabitizya abaputi naba Levi nukubabuzya ukuti, “Buka mutwaya utukulu utwa mu Yuda pakasi paba Izilayeli, musonkezyanje umusonko ghugho abantu bakusonka pamwaka ghosi, ukuti injanizye sona Inyumba iya Chala winyu. Muzibombaye lunulu.” Loli aba Levi bakakaba.

⁶ Polelo u mwene akamwitizya umuputi usongo u Yehoyada nukumulalusya ukuti, “Nkimba choni chicho utababuzizye aba Levi ukuti basonkezyanje umusonko mu Yuda, na mu Yelusalemu, ghugho u Mozesi umubombi uwa Mwene, ni chilundilo icha ba Izilayeli bakalamula ukuti ghubanje wamu Chisakasa ichakukomanilamo?”

⁷ Po abana abalumendo aba Ataliya umukolo umubibi yula bakapankula Inyumba iya Chala, sona bakamubombelagha u Baala pakubombezya ivibombelo ivipaghuliwa.

⁸ U mwene akalamula, po bakapanga ibokosi nukulibika pamulyango uwa Nyumba iya Mwene.

⁹ Bakafumusya mu Yuda na mu Yelusalemu mosi ukuti abantu bize nu musonko kwa Mwene, ghugho u Mozesi umubombi uwa Chala akabalamula aba Izilayeli munkolongo mula.

¹⁰ Amakambala na bantu bosi bakiza nu musonko wabo umwakuhoboka nukubika mubokosi mula mupaka ibokosi lila likizula.

¹¹ Akabalilo kosi nanti aba Levi biza ni bokosi lila ku makambala agha mwene sona nanti bennya ukuti indalama zyaba nyinji, umusimbi uwa mwene ni likambala ilya muputi usongo bakefyangamo indalama zila nukulinyosekezya sona ibokosi pabuzilo bula. Bakabombagha bunubu isiku ni siku, umwakuti bakasonkezyanga indalama inyinji nkani.

¹² U mwene nu muputi u Yehoyada yula bakabapa indalama zila abakapitawa abakwenelezya imbombo iyakuyannya sona Inyumba iya Mwene yila. Bakabasimba imbombo abazengi abanyumba pakubombezya amabwe, na bapalamatabwa ukuti bayiyannye sona Inyumba iya Mwene, sona na bantu babo bakabombagha imbombo pakubombezya ivyela nu mukuba pakuyiyannya sona Inyumba iya Mwene.

¹³ Abakapitawa bala bakaba bantu abamahala nkani, po imbombo iyakuyannya sona yila yikenda akiza nkani pasi papabo. Bakayizenga sona Inyumba iya Chala ukuyana bulo namumo yikabela pabwandilo.

¹⁴ Bo bamala, bakiza ni ndalama zyosi izyakusyala ukwa mwene na kwa Yehoyada. Po bakabombezya indalama izyakusyala zila pakupangila ivibombelo ivya mu Nyumba iya Mwene, kokuti ivibombelo ivya pachiputo, ni vyakubikila ivyakwiyipa ivyakocha na mabeseni sona ni vibombelo ivinji ivya siliva nu golide. Pakabalilo kosi aka bumi ubwa Yehoyada, abantu bakabikagha ivyakwiyipa ivyakocha mu Nyumba iya Mwene.

¹⁵ Pakabalilo kalakala u Yehoyada akaghosipa nkani sona akafwa bo ali na maka 130.

¹⁶ Bakamusyila mumapumpa agha bamwene mukaya akakulu nkani aka Devedi mu Yelusalemu, pachifukwa icha bwiza bubo akamubombela u Chala mu Izilayeli sona na ku Nyumba iya Chala.

¹⁷ Bo u Yehoyada afwa, amakambala agha mu Yuda ghakiza pakumuchindika u mwene, po akivwila zizyo ghakamubuzya.

¹⁸ Bakayisulannya Inyumba iya Mwene u Chala uwa banyenya babo nukwiputa ivifwani ivya Ashela ni vifwani ivinji. Pachifukwa icha mbibi zyabo, u Chala akabakalalila abantu aba mu Yuda naba mu Yelusalemu.

¹⁹ Napapo u Mwene akabatumila abalaghuzi ukuti babanyosezyanje kukwache sona napapo abalaghuzi bala bakabasusya, pope bulo abantu bala batakabivwila.

²⁰ Po umuzimu uwa Chala ghukamwikila u Zekaliya umwana uwa muputi u Yehoyada. U Zekaliya akimilila pantazi pabantu nukubabuzya ukuti, “U Chala ati, ‘Nkimba choni chicho mukughasulannya amalamulo agha Mwene? Po ivintu vitakwiza pakubendela akiza. Pachifukwa ichakuti mwamukana u Mwene, wepe akwiza pakubakana.’ ”

²¹ Loli bakabatika nizya kumughogha u Zekaliya, sona bo u mwene alamula, bakamughogha na mabwe muntanda iya Nyumba iya Mwene

²² U mwene u Yowashi atakachikumbuka nalumo ichisa chicho uwise u Zekaliya akamubombela, loli akamughogha umwana wache. Bo u Zekaliya akufuta ilyabumalilo akati, “U Mwene ennyanje zizyo ukubomba sona akufunde.”

²³ Kubumalilo ubwa mwaka abasilikali aba muchisu icha Siliya bakalwa ubwite nu Yowashi mu Yuda, na mu Yelusalemu nukubaghogha abalongozi bosi mulamula. Bakamutumila u mwene wabo mu Damasika ivintu vyosi vivyo bakafyula.

²⁴ Napapo abasilikali aba mu Siliya bakiza na basilikali abanandi bulo, pope bulo u Mwene akababika munyobe zyabo abasilikali abinji nkani. Pachifukwa ichakuti bakamukana u Mwene, u Chala uwa banyenya babo, loli u mwene u Yowashi akafundiwa.

²⁵ Bo aba Siliya bepamo muchisu chila, bakamuvulazya nkani u Yowashi. Amakambala ghache ghakabatika nizya kumughogha pachifukwa ichakumughogha umwana uwa muputi u Yehoyada, po akaghoghiwa bo ali pachitala chache. Akafwa nukusyiliwa mukaya akakulu nkani aka Devedi mu Yelusalemu, loli batakamusyila mumapumpa agha bamwene.

²⁶ Abantu babo bakabatika nizya kumughogha bo aba: U Zabadi umwana uwa Shimeyati, yuyo akaba mukolo uwamu Amoni nu Yehozabadi umwana uwa Shimuliti, yuyo akaba mukolo uwamu Mowabu.

²⁷ Imbili yosi iya bana bache na mazyu aghabulaghuzi aghakunena nizya yuyo sona ni mbili iyakunena nizya kuyannya sona ukwa Nyumba iya Chala zisimbiwe mwibuku ilya Mbili iya bamwene. U Amaziya umwana wache akamupyana pakuba we mwene.