2 Imbili 23 - IBAYIBOLO 2024

Bakumusambukila u Ataliya

¹ Mumwaka uwaseveni bo u Ataliya akulaghila, u Yehoyada akinong'ona pakubombapo zimo. Akafinga ulufingo na basongo aba basilikali 100, kokuti u Azaliya umwana uwa Yelohamu nu Ishimayeli umwana uwa Yehohanani nu Azaliya umwana uwa Obedi nu Maseya umwana uwa Adaya nu Elishafati umwana uwa Zikili.

² Bakenda mutwaya tosi utwa mu Yuda pakubabungannya aba Levi na balongozi abanyumba izya Izilayeli. Bo biza ku Yelusalemu,

³ ichilundilo chosi chikafingana ulufingo nu mwene umulumendo yula pa Nyumba iya Chala. U Yehoyada akababuzya akati, “Umwana uwa mwene akwiza pakulaghila ngati mumo u Mwene akalayizizya nizya baluko ulwa Devedi.

⁴ Polelo izi zyo zizyo mubaghiye pakubomba: Amwe mwe chigaba chimo icha baputi ni icha ba Levi mwe mukubomba imbombo Pisiku Ilyakutuzya, mubanje mutubukatila tutatu, kokuti akabukatila akakwanda ko kalindililaye

⁵ kunyumba iya bumwene. Akabukatila akabubili ko kalindililaye pamulyango uwa Lwalo sona abantu bosi abanji balindililaye muntanda iya Nyumba iya Mwene.

⁶ Patakabapo nayumoyumo umuntu uyunji uwakwinjila mu Nyumba iya Mwene, loli bene abaputi naba Levi babo bali pambombo. Banaba banginjila mulamula pachifukwa ichakuti bapaghuliwa, loli abantu bosi abanji balindililaye kuzi ukuyana namumo u Mwene akabalamulila.

⁷ Aba Levi bo bikalaye umwakumuzyungulila u mwene, bo umuntu wesi alemite ivilwilo kunyobe yache. Umuntu wesi yuyo akwinjila mu Nyumba iya Chala aghoghiwanje. Mubanje papipi nkani nu mwene kosi kuko akubuka.”

⁸ Aba Levi na bantu bosi aba mu Yuda bakabomba zizyo umuputi u Yehoyada akabalamula. Umuntu wesi akabasenda abantu bache, babo bakabuka kumbombo Pisiku Ilyakutuzya sona na babo bakatuzyanga pambombo, pakuti umuputi u Yehoyada atakababwezyapo nabamobamo abantu aba mutubukatila tula.

⁹ Po akabapa abasongo aba basilikali 100 bala impalala ni ngulu inkulu ni nandi, zizyo zikaba zya mwene u Devedi sona zizyo zikasungiwanga mu Nyumba iya Chala.

¹⁰ Akababambika abalindilili bosi, umwakumuzyungulila u mwene papipi ni chighemo sona ni Nyumba yila, ukwandila kuntende mupaka kumitu ukwa Nyumba iya Chala yila, bo umuntu wesi alemite ichilwilo kunyobe yache.

¹¹ U Yehoyada na bana bache abalumendo bakamufumya kuzi umwana uwa mwene yula nukumuvwika impumpu. Po bakamupa ibuku ilya ndaghilo nukumwimika pakuba we mwene. Bakamupakazya amafuta agha misyunguti, po bakakolomoka bakati, “Wee mwene, tukukulondela ubumi ubutali!”

¹² Bo u Ataliya ivwa ichongo icha bantu babo bakachimbila kulakula, bo bali pakumupala u mwene, akabuka ku Nyumba iya Mwene, kuko kukabungana abantu bala.

¹³ Bo atalankannya akamwennya u mwene, imiliye papipi ni mpanda iya pamulyango. Pakabalilo kalakala abasongo aba balindilili na bantu abakulizya amapati bakimilila papipi nu mwene sona abantu bosi aba muchisu chila bakasekelelagha nukulizya amapati. Abimbi babo bakaba ni vyakwimbila bakabalongozyanga abantu pakwimba inyimbo izya mapalo. Po u Ataliya akazepula inkazo yache pachifukwa icha kukalala nukukolomoka ukuti, “Bansambukiye! Bansambukiye!”

¹⁴ Po umuputi u Yehoyada akabatuma abasongo aba basilikali 100, babo bakabenelezyanga abasilikali nukubabuzya ukuti, “Mumwefyemo mukasi mwize nawe pakasi pa balindilili, sona mumughoghe umuntu wesi yuyo akuyezya pakumupoka.” Pakuti umuputi yula akati, “Atakaghogheliwanje mu Nyumba iya Mwene.”

¹⁵ Po abantu bala bakamulema u Ataliya nukubuka nawe kunyumba iya bumwene, bo bafika nawe pamulyango uwa Falasi, bakamughoghela palapala.

U Yehoyada akuyannya sona ivintu

¹⁶ Po umuputi u Yehoyada akafinga ulufingo poka na bantu sona nu mwene ukuti bakwiza pakuba bantu aba Mwene.

¹⁷ Abantu bosi bakabuka kunyumba iyakwiputilamo u Baala nukuyimongolannya. Bakavimongolannya ivighemo ni vifwani vyache sona bakamughogha umuputi u Matani, yuyo akaba muputi uwa Baala kuntazi ukwa vighemo.

¹⁸ Po u Yehoyada akababika abaputi, babo bakaba ba Levi sona babo u Devedi akabapanga imbombo mu Nyumba iya Chala pakubika ivyakwiyipa ivyakocha kwa Mwene ukuyana nu Lulaghilo ulwa Mozesi, bo bakwimba inyimbo nukusekela ngati mumo u Devedi akalamulila ukuti balindililaye Inyumba iya Mwene.

¹⁹ U Yehoyada akababika sona abalindilili pamilyango iya Nyumba iya Mwene, umwakuti patakabepo nayumoyumo umuntu umunyazu uwakwinjilamo.

²⁰ Akabasenda abasongo aba balindilili 100 na bantu abamanyikwe na balongozi sona na bantu bosi aba muchisu nukumusindikila u mwene ku Nyumba iya Mwene. Bakabuka kunyumba iya bumwene pakwinjilila kumulyango uwa kumitu nukumwikazya u mwene umulumendo yula pachitengo icha bumwene.

²¹ Po abantu bosi aba muchisu chila bakahoboka nkani sona mukaya akakulu nkani kala mukaba bulo myee, pachifukwa ichakuti u Ataliya akaghoghiwa.