2 Imbili 22 - IBAYIBOLO 2024

U mwene u Ahaziya akulaghila mu Yuda

¹ Abantu aba mu Yelusalemu bakamwimika u Ahaziya unkwangu uwa Yeholamu ukuti amupyane uwise pakuba we mwene, pachifukwa ichakuti amavyondongo ghagho ghakiza poka naba Alabu muvisakasa bakabaghogha abana bache bosi abasongo. Po Ahaziya umwana uwa Yeholamu u mwene uwamu Yuda akanda pakulaghila.

² U Ahaziya akaba na maka 22 bo anda pakulaghila sona akalaghila umwaka ghoka bo ali mu Yelusalemu. Unyina akaba we Ataliya umwizukulu uwa Omuli.

³ Wepe u Ahaziya akananga pakubomba zizyo abamunyumba iya Ahabu bakabombagha, pakuti unyina weyuyo akamumanyisya pakubomba bunubu.

⁴ Akananga nkani pamaso pa Mwene pakubomba zizyo abamunyumba iya Ahabu bakabomba, pachifukwa ichakuti bakaba bo babo bakamanyisya amahala bo u wise afwa.

⁵ Akakonka amahala ghabo, bo akubuka ku Lamoti Giliyadi, poka nu Yolamu umwana uwa Ahabu, u mwene uwa Izilayeli pakulwa ubwite nu Hazayeli u mwene uwa ba Siliya. Kulakula aba Siliya bakamuvulazya u Yolamu.

⁶ Po akanyokela ku Yezileli ukuti ivilonda vyache vipole pakuti bakamuvulazya, bo akulwa ubwite nu Hazayeli u mwene uwa ba Siliya mu Lamoti Giliyadi. Po u Ahaziya umwana uwa Yeholamu, u mwene uwamu Yuda akabuka ku Yezileli pakumwennya u Yolamu umwana uwa Ahabu, pachifukwa ichakuti akavulaziwa.

⁷ U Chala akamubombezya u Yolamu ukuti amuwisye u Ahaziya. Bo u Ahaziya afika akabuka poka nu Yolamu pakukomana nu Yehu umwana uwa Nimishi, yuyo u Mwene akamusala ukuti abanangannye abamunyumba iya Ahabu.

⁸ Bo u Yehu akubafunda abamunyumba iya Ahabu, akakomana na balongozi aba mu Yuda na bana aba bakamu aba Ahaziya babo bakamubombelagha, po akabaghogha.

⁹ Akabuka pakumulonda u Ahaziya, po abantu bache bakamulema mu Samaliya mumo akavwama. Bakabuka nawe kwa Yehu, nukumughogha. Bakamusyila mumuchizi pakuti bakati, “Uyu ame mwana uwa Yehoshafati, yuyo akamulonda u Mwene nu moyo wache ghosi.” Patakabapo nayumoyumo uwa munyumba iya Ahaziya, yuyo akaba na maka nkani aghakulaghilila ubumwene bula.

U mwene umukolo u Ataliya uwamu Yuda

¹⁰ Bo u Ataliya unyina uwa Ahaziya, ivwa bulo ukuti umwana wache aghoghiwa, akabalamula bosi abamunyumba iya bumwene ubwa Yuda ukuti baghoghiwanje.

¹¹ Loli u Yehosheba umwana umulindu uwa mwene u Yeholamu, akamusenda u Yowashi umwana uwa Ahaziya umwakumwiba bulo ukumwefyapo pakasi pa bana aba mwene, babo bakalondagha pakughoghiwa nukumufisa poka nu mulezi wache muchipinda chimo. Pachifukwa ichakuti u Yehosheba, umwana uwa mwene u Yeholamu, sona yuyo akaba muchi uwa muputi u Yehoyada, akaba muyemba uwa Ahaziya, akamufisa ukuti u Ataliya atakamughoghe.

¹² Umwana yula akavwamagha poka nabo amaka sikisi mu Nyumba iya Chala, bo u Ataliya akulaghila muchisu chila.