2 Imbili 21 - IBAYIBOLO 2024

¹ U Yehoshafati akafwa nukusyiliwa mukaya akakulu nkani aka Devedi mu Yelusalemu. Po umwana wache u Yeholamu akamupyana pakuba we mwene.

U mwene u Yeholamu akulaghila mu Yuda

² Abawamwabo aba Yeholamu, abana aba Yehoshafati, bakaba bo aba: U Azaliya nu Yehiyeli nu Zekaliya nu Azaliyahu nu Mikayeli sona nu Shefatiya. Bosi banaba bakaba bana aba Yehoshafati u mwene uwa Izilayeli.

³ Uwise akabapa ivyabupi ivyinji nkani ivya siliva nu golide sona ni vintu ivinji ivyamutengo. Akabapa sona utwaya utukulu nkani utwa malinga mu Yuda, loli u Yeholamu akamupa ubumwene pachifukwa ichakuti akaba we katote.

⁴ Bo u Yeholamu ikalana pabumwene ubwa wise, akabaghogha abawamwabo bosi, poka na makambala ghamo agha mu Izilayeli.

⁵ U Yeholamu akaba na maka 32 bo anda pakulaghila sona akalaghila amaka eyiti bo ali mu Yelusalemu.

⁶ U Yeholamu akabomba zizyo bakabombagha abamwene aba Izilayeli sona ukuyana namumo bakabombelagha abamunyumba iya Ahabu, pachifukwa ichakuti akamusenda umwana uwa Ahabu pakuba muchi wache. U Yeholamu akananga nkani pamaso pa Mwene.

⁷ Pope bulo u Mwene atakalondagha pakubanangannya abamunyumba iya Devedi, pachifukwa icha lufingo lulo akafingana nu Devedi. Pakuti akamulayizya ukuti yuyo, poka na baluko lwache bakwiza pakulaghilagha bwila na bwila.

⁸ Bo u Yeholamu akulaghila, aba Edomu bakachisambukila ichisu icha Yuda sona bakiyimikila bene u mwene.

⁹ Po u Yeholamu akabuka kulakula na makambala ghache, poka ni ngolo zyache zyosi izya bwite. Aba Edomu bakamuzyungulila, poka na basongo ababendezya ngolo zyache, loli akalamusya pabusiku nukuchimbila.

¹⁰ Ukwanda pakabalilo kalakala mupaka nilelo bulo, aba Edomu bachisambukiye ichisu icha Yuda. Kope akaya akakulu aka Libina kakasambuka pakabalilo kalakala, pachifukwa ichakuti u Yeholamu akamukana u Mwene, u Chala uwa banyenya bache.

¹¹ Ukonjelezyapo akazenga apakwiputilapo ivifwani mumaghamba agha mu Yuda nukubapela abantu aba mu Yelusalemu ukuti biputaye abachala abanji, po akabasovya abantu aba mu Yuda.

¹² Umulaghuzi u Eliya akamutumila ukalata u Yeholamu uwakuti, “U Mwene, u Chala uwa munyenya wako u Devedi ati, ‘Awe utabombite zizyo ughuso u Yehoshafati pamo u Asa u mwene uwa Yuda akabomba.

¹³ Loli wabomba zizyo abamwene aba Izilayeli bakubomba sona wabasovya abantu aba mu Yuda na mu Yelusalemu ukuti biputaye abachala abanji, ukuyana namumo bakabombelagha abamunyumba iya Ahabu. Awe ukabaghogha abawamwinyu, abakamu aba ghuso, babo bakaba bizapo ukukuchila.

¹⁴ Polelo u Mwene akulonda pakubafunda ni chiwaya ichakoghofya nkani abantu bako na bana bako, na bachi bako sona ni vintu vyako vyosi.

¹⁵ Nawe bulo ukwiza pakutamiwa nu bubine ubupalapala nkani ubwa mukasi mupaka amala ghako ghakwiza pakufulukila kuzi.’ ”

¹⁶ U Mwene akabapela aba Filisiti naba Alabu, babo bakikalagha papipi naba Etiyopiya ukuti bamukalalile u Yeholamu.

¹⁷ Bakalwa ubwite ni chisu icha Yuda nukufyula ivintu vyosi vivyo bakavyagha munyumba iya mwene poka na bana bache na bachi bache. Patakabapo nayumoyumo umwana wache umulumendo uwakupona, loli mwene u Ahaziya unkwangu wache.

¹⁸ Pisinda pache u Mwene akamufunda u Yeholamu nu bubine ubwakusita kupola ubwa mukasi.

¹⁹ Bo pachilapo akabalilo, kubumalilo ubwa mwaka ubwabubili, amala ghache ghakanda pakafulukila kuzi pachifukwa icha bubine bula, po akafwa pakuti akaba mububavu ubukulu nkani. Abantu bache batakapembapo umoto uwakumuchindikila, ukuyana namumo bakabombela pabufwe ubwa banyenya bache.

²⁰ U Yeholamu akaba na maka 32 bo anda pakulaghila sona akalaghila amaka eyiti bo ali mu Yelusalemu. Bo afwa, patakabapo nayumoyumo umuntu uwakumupasikizya. Po bakamusyila mukaya aka Devedi mu Yelusalemu, loli batakamusyila mumapumpa agha bumwene.