2 Imbili 20 - IBAYIBOLO 2024

U Yehoshafati akubapota aba Mowabu naba Amoni

¹ Pakabalilo kamo aba Mowabu naba Amoni poka naba Mebuni bamo, bakiza pakulwa ubwite nu Yehoshafati.

² Abantu bamo bakiza nukumubuzya u Yehoshafati ukuti, “Abasilikali abinji nkani aba mu Edomu kwisila ilya Nyanja Imfwe bakwiza pakulwa nawe ubwite. Bafika kale mukaya akakulu nkani aka Hazazoni Tamala.” Ili litabwa ilinji ilya Eni Gedi.

³ Po u Yehoshafati akanyila nkani, umwakuti akadumula nizya kubuka pakubuzikizya kwa Mwene sona akabalamula abantu bosi aba mu Yuda ukuti batuzye pakulya.

⁴ Abantu aba mu Yuda bakabungana poka pakumulaba u Mwene ukuti abavwe. Naloli bakiza ukufuma mutwaya tosi utukulu utwa mu Yuda pakumulondelezya u Mwene.

⁵ Po u Yehoshafati akimilila pamaso pa chilundilo chosi icha bantu aba mu Yuda naba mu Yelusalemu pa Nyumba iya Mwene kuntazi ukwa ntanda impya

⁶ nukuti, “Wee Mwene u Chala uwa banyenya bitu, nkimba awe te we Chala yuyo akwikala kumwanya? Awe wewe ukulaghila inko zyosi izya muchisu ichapasi. Amaka nu bulaghili vili munyobe zyako sona atalipo nayumoyumo yuyo angalwana nawe.

⁷ Wee Chala witu, nkimba te wewe ukabachimbizyamo abantu aba muchisu chinichi pamaso pabantu bako aba Izilayeli, nukubapa ichisu chinichi abaluko ulwa mumanyani wako u Abulahamu?

⁸ Bakwikalagha mulamula nukukuzengela Inyumba iya Chala iyakuti uchindikiliwanjemo nukuti,

⁹ ‘Nanti intamyo zyatuwila pamo ubwite pamo ichiwaya pamo izala inkulu, tukwiza pakwima pamaso papako pantazi pa Nyumba yiyo yikwitiziwa ni tabwa lyako sona tukwiza pakukulilila bo tuli muntamyo zitu zyosi, po awe ukwiza pakutwivwa nukutupoka.’

¹⁰ “Loli aba Amoni naba Mowabu sona na bantu aba kwighamba ilya Seyili babo ichisu chabo ukabakanizya aba Izilayeli ukuti batakachifyule, bo bakwepamo mu Ijiputi. Po bakabwelako nukubaleka bumi.

¹¹ Ilelo ennya namumo bakututanizizya pakutuchimbizyamo muchisu chicho ukatupa pakuba mpyana yitu.

¹² Wee Chala witu, nkimba utakwiza pakubalonga abantu banaba? Pakuti aswe tute na maka naghamoghamo aghakulwila na basilikali abinji banaba babo bakulonda pakulwa naswe ubwite. Tutakumanya ichakubomba, loli tukwennya kukwako.”

¹³ Abantu bosi aba mu Yuda, poka na bachi babo na bana sona na babonda babo, bakimilila pamaso pa Mwene.

¹⁴ Po umuzimu uwa Mwene ghukamwikila u Yahaziweli umwana uwa Zekaliya, umwana uwa Benaya, umwana uwa Yeyiyeli, umwana uwa Amataniya umu Levi sona uwaluko ulwa Asafu, bo imiliye pamaso pachilundilo chila.

¹⁵ Akati, “Wee mwene u Yehoshafati, na mwebosi mwe mukwikala mu Yuda na mu Yelusalemu, ivwa kuno! U Mwene ati, ‘Mutakanyilaye, pamo ukuwa amaka pachifukwa icha chilundilo icha basilikali ichi. Pakuti ubwite ubu bute bwinyu, loli bwa Chala.

¹⁶ Indabi mubuke pakulwa nabo ubwite, bo bakukwela ichikwezya icha pa Zizi, po mukwiza pakukomana nabo kubumalilo ubwa ikombe, kubufumilo bwizuba ku nkolongo iya Yeluweli.

¹⁷ Amwe mutakwiza pakulwa ubwite bunubu. Loli mubambe bulo sona mujimbaye ukuti mwennye namumo u Mwene akwiza pakubapokela, mwe bantu aba mu Yuda naba mu Yelusalemu. Mutakanyilaye pamo ukuwa amaka. Indabi bukagha bulo pakukomana nabo, po u Mwene akwiza pakuba namwe.’ ”

¹⁸ U Yehoshafati akafughama bo icheni chache chikotamiye pasi, bope abantu bosi aba mu Yuda, naba mu Yelusalemu bakawa pasi pamaso pa Mwene nukumwiputa.

¹⁹ Po aba Levi abamunyumba iya Kohati, na bamunyumba iya Kola bakima nukumupala u Mwene, u Chala uwa Izilayeli, bo bakukolomoka nkani.

²⁰ Pandabindabi nkani bakabuka kunkolongo iya Tekowa. Bo bali muzila, u Yehoshafati akimilila, po akati, “Mwee bantu aba mu Yuda, naba mu Yelusalemu, ivwa kuno! Mumusubilaye u Mwene u Chala winyu, po mukwiza pakujimba. Mubasubilaye abalaghuzi bache, po mukwiza pakupota.”

²¹ Bo u Yehoshafati anenezannya na bantu, akabasala abantu ukuti bamwimbilaye u Mwene nukumupala sona bakavwala inkazo izelu, bo bakwenda pantazi pabasilikali nukwimba ukuti, “Mumupalizyanje u Mwene pachifukwa ichakuti ulughano lwache lwa bwila na bwila.”

²² Bo banda pakumwimbila nukumupala, u Mwene akabavulungannya aba Amoni naba Mowabu sona na bantu aba kwighamba ilya Seyili, babo bakachizyungulila ichisu icha Yuda, po bakabapota.

²³ Aba Amoni, naba Mowabu bakabasambukila abantu aba kwighamba ilya Seyili pakubaghogha bosi. Bo bamala pakubaghogha abantu aba mu Seyili, bakanda pakughoghana benebene.

²⁴ Bo abantu aba mu Yuda bafika papo bakenannya ni nkolongo nukuchennya ichilundilo icha basilikali chila, bakayennya bulo imivimba yilambalaye pasi. Patakabapo nayumoyumo umuntu uwakupona.

²⁵ U Yehoshafati na bantu bache bakabuka pakufyula ivintu, po bakavyagha ivintu ivyinji nkani na menda ni vintu ivyamutengo nkani. Bakavyagha ivintu ivyinji nkani umwakuti bakapotwa pakuvinyamula sona pakasenda amasiku matatu pakuvinyamula.

²⁶ Pisiku ilyafolo bakabungana mwikombe ilya Belaka, kuko bakamupala u Mwene. Ichi cho chifukwa ikombe lila likwitiziwa ukuti ikombe ilya Belaka mupaka nilelo bulo.

²⁷ Po u Yehoshafati akabalongozya abantu bosi aba mu Yuda naba mu Yelusalemu nukunyokela nu buhobosu ku Yelusalemu, pakuti u Mwene akabapelela ubuhobosu pachifukwa icha kubapota abalwani babo.

²⁸ Bakafika mu Yelusalemu nukubuka ku Nyumba iya Mwene, bo bakulizya amapango ni vinanda na mapati.

²⁹ Bo inko zyosi izinji zyivwa namumo u Mwene akalwilagha na balwani aba ba Izilayeli, bakanyila nkani.

³⁰ Po ubumwene ubwa Yehoshafati bukaba mumutende, pakuti u Chala wache akamupa umutende kumbazu zyosi.

Ukumala ukwa bulaghili ubwa Yehoshafati

³¹ U Yehoshafati akalaghilagha mu Yuda. Akaba na maka 35 bo anda pakulaghila mu Yuda sona akalaghila amaka 25 bo ali mu Yelusalemu. Unyina akaba we Azuba umwana uwa Shili.

³² U Yehoshafati akabomba zizyo uwise u Asa akabomba. Akabomba ingolosu pamaso pa Mwene.

³³ Loli atakabunangannya ubuzilo ubwapamwanya ubwakwiputilapo, umwakuti abantu bakamwiputa na moyo ghabo ghosi u Chala uwa banyenya babo.

³⁴ Imbombo izinji zyosi zizyo u Yehoshafati akabomba ukwanda pabwandilo mupaka pabumalilo zisimbiwe mwibuku ilya Mbili iya Yehu umwana uwa Hanani, yiyo chigaba chimo icha buku ilya Mbili iya bamwene aba ba Izilayeli.

³⁵ Pisinda pache u Yehoshafati u mwene uwa Yuda akaba pabumanyani nu Ahaziya u mwene uwa Izilayeli, yuyo akaba muntu umubibi nkani.

³⁶ Akivwana nawe pakupanga poka amabwato amakulu nkani. Bo apanga amabwato amakulu ghanagha mu Eziyoni Gebeli,

³⁷ u Eliyezeli umwana uwa Dodavahu uwamu Malesha akalaghula umwakususannya nu Yehoshafati ukuti, “Pachifukwa ichakuti waba pabumanyani nu Ahaziya, u Mwene akwiza pakunangannya vivyo wapanga.” Amabwato amakulu nkani ghananganika sona ghakapotwa pakwenda panyanja.