2 Imbili 2 - IBAYIBOLO 2024

Nizya kwiyannya ukuzenga Inyumba iya Chala

¹ U Solomoni akadumula ukuti amuzengele Inyumba u Mwene ukuti achindikiliwanjemo sona nukuti izengele mwene inyumba iya bumwene.

² Akasimba ababomba mbombo 70,000 abakunyamula ukatundu na bambombo 80,000 abakubiza amabwe mumaghamba sona na bakapitawa 3,600 abakwenelezya abambombo bala.

³ U Solomoni akamutumila amazyu u Hilamu uwa ku Tile akati, “Untumile amatabwa agha mwale ngati mumo ukabombela kwa tata wane u Devedi pakabalilo kako ukamutumila amatabwa agha mwale aghakuzengela inyumba iya bumwene.

⁴ Polelo nkulonda pakumuzengela Inyumba u Chala u Mwene wane sona nkwiza pakuyipaghula ukuti yibanje yakufukizizyamo utwakununkila pamaso papache, sona nukuti yibanje yakubikamo ivibama ivipaghuliwa ivya isiku ni siku nukubikamo ivyakwiyipa ivyakocha pandabindabi na pachamabwila posi na Pisiku Ilyakutuzya, nilya Kupanta ukwa Mwezi patubalilo utwa lusekelo tuto u Mwene u Chala witu akatusala. Po akabalamula aba Izilayeli ukuti babombaye bunubu bwila na bwila.

⁵ “Inyumba yiyo nkwiza pakumuzengela u Chala yikwiza pakuba nkulu, pachifukwa ichakuti u Chala witu mukulu nkani ukubachila abachala abanji bosi.

⁶ Loli nkimba wewenu yuyo abaghiye pakumuzengela Inyumba, pakuti nako kumwanya pamo kumwanya nkani kutangakukwana? Po nkimba ne wenu ukuti imuzengele Inyumba, loli bwene ubuzilo ubwakubikilapo ivyakwiyipa ivyakocha pamaso papache?

⁷ “Untumile ufundi yumo yuyo amenye nkani pakubombezya imbombo ugolide nu siliva nu mukuba ni vyela na menda amachesamile na machesamu nagha buluu sona yuyo amenye pakubiza amabwe, ukuti ize mu Yuda na mu Yelusalemu pakubomba poka na bantu bane, babo utata wane u Devedi akabasala kale.

⁸ “Untumile sona amatabwa agha mwale nagha payini nagha aligumu agha ku Lebanoni, pakuti inzimenye ukuti abantu bako bamenye nkani pakubola amatabwa. Abantu bane bakwiza pakubomba poka na bako

⁹ ukuti imbanje na matabwa aminji nkani, pachifukwa ichakuti Inyumba yiyo nkulonda pakumuzengela u Chala yibaghiye pakuba nkulu, sona iyakuboneka akiza.

¹⁰ Nkwiza pakubalipila abambombo bako na bakubola matabwa, amasaka 20,000 agha ngano na masaka 20,000 agha mapemba na malita 440,000 agha vinyo na malita 440,000 agha mafuta agha misyunguti.”

¹¹ U mwene u Hilamu uwa ku Tile akamwamula u Solomoni pakumutumila ukalata uwakuti, “U Mwene abaghanite abantu bache. Ichi cho chifukwa akusalite ukuti ubanje we mwene wabo.”

¹² U Hilamu akati sona, “Apaliwanje u Mwene u Chala uwa Izilayeli, yuyo akapela kumwanya ni chisu ichapasi! Amupiye u mwene u Devedi umwana umulumendo uwamahala nu wakwivwisya, sona amenye nkani ubwafundi, yuyo akwiza pakumuzengela Inyumba u Mwene, sona nukwizengela mwene inyumba iya bumwene.

¹³ “Nkukutumila u Hilamu Abi, umuntu yuyo amenye nkani ubwafundi.

¹⁴ Unyina akaba waluko ulwa Dani, sona uwise akaba waku Tile. U Hulamu Abi amenye nkani pakubombezya ugolide nu siliva nu mukuba ni vyela na mabwe na matabwa na menda amachesamile nagha buluu na machesamu sona na menda amatonte. Umuntu yunuyu amenye nkani pakubiza sona angabiza ichintu chosi chicho umuntu angamupa. Po akwiza pakubomba poka na babombi bako sona na bantu abamwene wane uwise u Devedi.

¹⁵ “Polelo ututumile ingano na mapemba na mafuta agha misyunguti nu vinyo vivyo ukatulayizya aswe twe babombi bako.

¹⁶ Po tukwiza pakubola amatabwa ghagho ukughalonda agha mumusitu uwa Lebanoni nukughambamizya panyanja mupaka piloboko ilya Yopa, umwakuti ughasende nukubuka nagho ku Yelusalemu.”

Imbombo iyakuzenga Inyumba iya Chala yanda

¹⁷ U Solomoni akababelenga abayeni bosi babo bakikalagha mu Izilayeli, ngati mumo uwise u Devedi akabombela. Po akagha ukuti pakabapo abantu 153,600.

¹⁸ Akabasimba abambombo 70,000 ukuti babanje bakunyamula ukatundu na bambombo 80,000 ukuti babanje bakubiza amabwe mumaghamba sona na bakapitawa 3,600 abakwenelezya abambombo bala.