2 Imbili 19 - IBAYIBOLO 2024

Umulaghuzi akumuchemela u Yehoshafati

¹ Bo u Yehoshafati u mwene uwamu Yuda anyokela mumutende kunyumba yache iya bumwene mu Yelusalemu,

² umulaghuzi u Yehu, umwana uwa Hanani akabuka pakukomana nawe nukumubuzya u mwene ukuti, “Nkimba choni chicho ukubavwa abantu ababibi nukubaghana abantu babo bamubengite u Mwene? Pachifukwa icha zizyo wabomba, u Mwene akukalaliye.

³ Loli bulimo bumo ubwiza mumwako, pakuti wefyamo ivifwani ivya Ashela muchisu sona ukubomba zizyo u Chala akulonda.”

U Yehoshafati akuyannya sona ivintu

⁴ U Yehoshafati akikalagha mu Yelusalemu, po akabuka sona pakasi pabantu aba mu Belisheba mupaka kuchisu icha mumaghamba icha Efulayimu nukubanyosezya kwa Mwene, u Chala uwa banyenya babo.

⁵ Akabimika abalongi muchisu chosi na mutwaya tosi utukulu nkani utwa malinga mu Yuda.

⁶ Akababuzya akati, “Mubanje maso pazizyo mukubomba, pakuti mutakulonga pachifukwa icha muntu, loli pachifukwa icha Mwene, yuyo ali namwe, bo mukudumula inongwa.

⁷ Polelo mumunyilaye u Mwene. Muchebaye nkani bo mukulonga inongwa, pakuti u Mwene u Chala witu atakunyongannya ubwanaloli pamo ukulonga umwakwennya icheni pamo ukupokela amabeko, awe.”

⁸ Mu Yelusalemu mope, u Yehoshafati akabimika bamo aba Levi na baputi sona na balongozi abanyumba izya Izilayeli ukuti basungililaye indaghilo izya Mwene nukulonga inongwa. Abantu banaba bakikalagha mu Yelusalemu.

⁹ Akabalamula akati, “Mubanje mwe basubiliwa bo mukumubombela u Mwene, sona mumunyilaye na moyo ghinyu ghosi.

¹⁰ Bo mukulonga inongwa yosi iya mukamu winyu, yuyo akwikala mutwaya utukulu tunutu, manyi inongwa iyabughoghi pamo iyakunena nizya ndaghilo pamo amalamulo pamo chimanyisyo, mubasokaye ukuti batakamunangilaye u Mwene. Lumo angabakalalila amwe poka na bakamu binyu. Mubombaye bunubu, po mutakwiza pakunanga.

¹¹ “U Amaliya umuputi usongo weyuyo akwiza pakubalongozya munongwa zyosi izyakunena nizya Mwene sona u Zebadiya umwana uwa Ishimayeli, yuyo we mulongozi uwa luko ulwa Yuda, akwiza pakubalongozya munongwa zyosi izyakunena nizya mwene. Po aba Levi bakwiza pakubomba ngati makambala pakasi papinyu. Mubanje mwe bajivu, po u Mwene abanje na babo bakubomba ingolosu.”