2 Imbili 18 - IBAYIBOLO 2024

Umulaghuzi u Mikaya akumusoka u Ahabu

¹ Pakabalilo kalakala u Yehoshafati akaba mukabi nkani, sona akaba muntu muchindikiwa. Akaba pabumanyani ubwa sendwa nu Ahabu.

² Bo ghachilapo amaka ghamo, u Yehoshafati akabuka pakumwendela u Ahabu mu Samaliya. Ahabu akamughoghela u Yehoshafati, poka na bantu babo akaba nabo ing'ozi ni ng'ombe inyinji nkani, po akamudeba ukuti abuke nawe pakulwa ubwite ku Lamoti Giliyadi.

³ U Ahabu u mwene uwa Izilayeli akamulalusya u Yehoshafati u mwene uwamu Yuda akati, “Nkimba ukwiza pakubuka nane ku Lamoti Giliyadi pakulwa ubwite?” U Yehoshafati akamwamula akati, “Ane indikulubazu lwako, abantu bane bako, po tukwiza pakubuka nawe pakulwa ubwite.”

⁴ Loli u Yehoshafati akamubuzya u mwene uwa Izilayeli yula akati, “Buzikizya tasi kwa Mwene.”

⁵ Po u mwene uwa Izilayeli yula akabitizya abalaghuzi 400 nukubalalusya ukuti, “Nkimba tubukaye pakulwa ubwite ku Lamoti Giliyadi pamo awe?” Abalaghuzi bala bakamwamula bakati, “Bukagha, pakuti u Chala akwiza pakukabika munyobe zyako.”

⁶ Loli u Yehoshafati akalalusya akati, “Nkimba atalipo umulaghuzi uwa Mwene uwakuti tungabuzikizyako?”

⁷ U mwene uwa Izilayeli akamwamula u Yehoshafati akati, “Asyalako umulaghuzi weka uwakuti tungabuzikizizyako, itabwa lyache we Mikaya umwana uwa Imula. Loli imubengite pachifukwa ichakuti atandaghuliyepo nalumo ivintu ivyiza, akabalilo kosi akundaghulila ivintu ivibibi vyene.” U Yehoshafati akamwamula akati, “Wee mwene wane, utakanenaye bunubu.”

⁸ Po u mwene uwa Izilayeli yula akalyitizya ikambala lyoka nukulibuzya ukuti, “Mwitizye u Mikaya umwana uwa Imula, ize kuno lubilolubilo.”

⁹ Pakabalilo kalakala u mwene uwa Izilayeli, poka nu mwene u Yehoshafati uwamu Yuda bakikalagha pavitengo ivya bumwene, bo bavwalite inkazo zyabo izya bumwene. Bakikalagha pabuzilo ubwakukomelapo inyinulo pamulyango uwa kaya akakulu nkani aka Samaliya, po abalaghuzi bosi bakalaghulagha pamaso papabo.

¹⁰ Umulaghuzi weka, u Zedekiya umwana uwa Kenana akapanga impembe izya chela nukuti, “U Mwene ati, ‘Ni mpembe izi ukwiza pakubavulazya nazyo aba Siliya nukubapota.’ ”

¹¹ Abalaghuzi abanji bosi bakalaghulagha umwakuyana bulo bakati, “Bukagha ku Lamoti Giliyadi pakulwa ubwite sona ukwiza pakupota, pakuti u Mwene akwiza pakukabika munyobe zyako.”

¹² Intumi yiyo yikabuka pakumwitizya u Mikaya yikamubuzya yikati, “Abalaghuzi abanji bosi bakulaghula ukuti u mwene akwiza pakupota. Po nawe bulo amazyu ghako ghayane bulo na mazyu ghabo.”

¹³ Loli u Mikaya akamwamula akati, “Nkulapa pamaso pa Mwene umumi ukuti naloli nkwiza pakumubuzya zyene zizyo u Chala ambuzya.”

¹⁴ Bo afika, u mwene u Ahabu akamulalusya akati, “Wee Mikaya, nkimba tubukaye ku Lamoti Giliyadi pakulwa ubwite, pamo awe?” U Mikaya yula akamwamula akati, “Bukagha mukwiza pakubapota, pakuti u Mwene akwiza pakubabika munyobe zyako.”

¹⁵ U mwene akamulalusya akati, “Nkimba nkulapizye kalinga ukuti umbuzye ubwanaloli bwene pamaso pa Mwene?”

¹⁶ Po u Mikaya akamwamula akati, “Nkabennya aba Izilayeli bosi basatite mumaghamba ngati zyo ng'ozi zizyo zite nu mudimi, sona u Mwene akati, ‘Abantu banaba bate nu mulongozi, baleke babwelaye mumutende.’ ”

¹⁷ U mwene uwa Izilayeli akamulalusya u Yehoshafati akati, “Nkimba intakakubuzyapo ukuti atandaghuliyepo nalumo ivintu ivyiza, loli akabalilo kosi ivintu ivibibi vyene?”

¹⁸ Po u Mikaya akanena sona akati, “U Mwene ati: Nkamwennya u Mwene ikaye pachitengo icha bumwene kumwanya, sona abantumi bosi bakimilila kundilo na kumongo kwache.

¹⁹ U Mwene akalalusya akati, ‘Nkimba wewenu yuyo angamudeba u Ahabu u mwene uwamu Izilayeli ukuti abuke ku Lamoti Giliyadi pakulwa ubwite umwakuti bamughoghele kulakula?’ “Uwantumi weka akasakizya izinji, sona uyunji akasakizya izyamwabo.

²⁰ Pabumalilo umuzimu ghukiza pamaso pa Mwene nukuti, ‘Nkwiza pakumudeba.’ “U Mwene akaghulalusya akati, ‘Nkimba ungamudeba bulibuli?

²¹ Nkwiza pakubuka nukubapela abalaghuzi bosi aba Ahabu ukuti batamantaye. Bukagha naloli ungamudeba.’

²² “Polelo u Mwene abika umuzimu uwabumyasi mumulomo uwa balaghuzi bako bosi. U Mwene alamula ukuti intamyo zikuwile.”

²³ Po u Zedekiya umwana uwa Kenana akapalamila nukumukoma u Mikaya nipi kumaso, po akamulalusya akati, “Nkimba umuzimu uwa Mwene wendite zila yoni, bo wepamo mumwane nukunena nawe?”

²⁴ U Mikaya akamwamula akati, “Ukwiza pakuzimanya pisiku lilyo ukwiza pakuchimbilila muchipinda ichamukasi nkani pakuvwama.”

²⁵ U mwene uwa Izilayeli akalamula akati, “Mumuleme u Mikaya nukumunyosezya kwa Amoni umulaghili uwa kaya akakulu nkani sona na kwa Yowashi, umwana uwa mwene,

²⁶ nukuti, ‘U mwene ati: Mwighalile mujele, sona mumupanje chene ichibama na mizi mupaka inyokeko akiza bulo.’ ”

²⁷ U Mikaya akati, “Nanti wanyokako akiza bulo, kokuti u Mwene atanenite ukwendela mumwane!” Po akababuzya babo bakimilila palapala akati, “Mwee bantu mwebosi, mughaleme amazyu ghane.”

Ubufwe ubwa Ahabu

²⁸ Po u mwene uwa Izilayeli, poka nu Yehoshafati u mwene uwamu Yuda bakabuka pakukafyula akaya aka Lamoti Giliyadi.

²⁹ U mwene uwa Izilayeli akamubuzya u Yehoshafati akati, “Nkwiza pakwiyandula nemwene nukubuka kubwite, loli awe uvwalaye inkazo yako iya bumwene.” Po u Ahabu yula akabuka kubwite, bo iyanduye ngati po muntu uyunji bulo.

³⁰ Pakabalilo kalakala u mwene uwamu Siliya akabalamula abasongo abendezya ingolo izya bwite akati, “Mutakalwanje ubwite nu muntu uyunji, manyi munandi pamo usongo, loli mulwanje nu mwene uwa Izilayeli.”

³¹ Bo abasongo bala bamwennya u Yehoshafati bakati, “Uyu we mwene uwamu Izilayeli.” Po bakaghalabuka ukuti balwe nawe ubwite nukumuchimbilila, loli u Yehoshafati akakolomoka, po u Mwene akamupoka. U Chala akabefyako kukwache,

³² pakuti bo abasongo bala bennya ukuti atakaba we mwene uwamu Izilayeli, bakaleka pakumuchimbizya.

³³ Loli umuntu yumo akawesa ubwele bwache umwakusita kumanya, akamulasa u mwene u Ahabu pakasikasi papo ivigaba ivya ngulu vikakomana. Po akamubuzya umuntu yuyo akendezyanga ingolo yache akati, “Ghalabuka, unyefyepo pabuzilo ubu, pakuti navulaziwa nkani.”

³⁴ Pisiku lilalila ubwite bukaba bwakoghofya nkani, umwakuti bakamwikazya bulo u mwene yula mungolo yache umwakwenannya naba Siliya mupaka pachamabwila. Po bo izuba likwinjila, akafwa.