2 Imbili 17 - IBAYIBOLO 2024

U mwene u Yehoshafati akulaghila mu Yuda

¹ U Yehoshafati akamupyana uwise u Asa pakuba we mwene, po akikazya nkani pakulwa ubwite naba Izilayeli.

² Akababika abasilikali bache mutwaya tosi utukulu nkani utwa malinga utwa mu Yuda, nukubika ubuzilo ubwa basilikali mu Yuda na mutwaya utukulu utwa muchisu icha Efulayimu, tuto uwise u Asa akatufyula.

³ U Mwene akaba nu Yehoshafati pachifukwa ichakuti mumaka aghabwandilo akabombagha zizyo uwise u Devedi akabombagha. Atakamubuzikizya u Baala,

⁴ loli akabuzikizya kwa Chala uwa uwise nukukonka amalamulo ghache ukuchila inyiho izya mu Izilayeli.

⁵ U Mwene akabwikazya ubumwene ubwa Yehoshafati sona abantu bosi aba mu Yuda bakiza ni vyabupi kwa Yehoshafati, umwakuti akaba nu bukabi nkani sona akaba muchindikiwa.

⁶ Akiyipa nkani kwa Mwene nu moyo wache ghosi. Ukonjelezyapo akabwefya ubuzilo ubwapamwanya ubwakwiputilapo ivifwani, nukuvinangannya ivifwani ivya Ashela mu Yuda.

⁷ Mumwaka wabutatu bo akulaghila, akaghatuma amakambala ghache fayivi: U Beni Hayili nu Obadiya nu Zekaliya nu Netaneli nu Mikaya pakubamanyisya abantu mutwaya utukulu utwa mu Yuda.

⁸ Abantu banaba bakaba poka naba Levi abanji aba: U Shemaya nu Netaniya nu Zebadiya nu Asaheli nu Shemilamoti nu Yehonatani nu Adoniya nu Tobiya nu Tobi Adoniya nu muputi u Elishama nu muputi u Yeholamu.

⁹ Bakamanyisyanga muchisu chosi icha Yuda sona bakaba ni buku ilya Ndaghilo izya Mwene. Bakenda mutwaya tosi utukulu utwa mu Yuda nukubamanyisya abantu.

¹⁰ U Mwene akabapelela ubogha abantu bosi aba muvyisu ivipalamani, umwakuti batakalondagha pakulwa ubwite nu Yehoshafati.

¹¹ Aba Filisiti bamo bakiza kwa Yehoshafati ni vyabupi nu siliva pakuba musonko sona bope aba Alabu bakiza na badubi 7,700 ni mbuzi 7,700.

¹² U Yehoshafati akaba na maka nkani. Akazenga amalinga nutwaya utukulu nkani utwakusungilamo ivintu mu Yuda

¹³ sona akaba ni vintu ivyinji nkani mutwaya utukulu utwa mu Yuda. Akaba sona na basilikali babo bakamanya nkani pakulwa ubwite mu Yelusalemu.

¹⁴ Ubwinji bwabo ukuyana ni nyumba zyabo bukaba bo ubu: Abaluko ulwa Yuda bakaba bo aba: Abasongo aba basilikali 1,000, kokuti u Adina usongo uwa basilikali, poka na basilikali abajivu nkani 300,000.

¹⁵ Uwabubili akaba we Yehohanani, poka na basilikali 280,000.

¹⁶ Uwabutatu akaba we Amasiya umwana uwa Zikili, yuyo akiyipa bulo pakumubombela u Mwene. U Amasiya akaba poka na basilikali 200,000.

¹⁷ Abaluko ulwa Benjamini bakaba bo aba: U Eliyada, yuyo akaba musilikali umujivu nkani, poka na basilikali 200,000 abakunyamula ubwele ni ngulu.

¹⁸ Uwabubili akaba we Yehozabadi, poka na basilikali abajivu nkani 180,000.

¹⁹ Banaba bakaba basilikali babo bakamubombelagha u mwene, ukusita kubelengelako abasilikali babo akababika mutwaya utukulu nkani utwa malinga mu Yuda mosi.