2 Imbili 16 - IBAYIBOLO 2024

Aba Izilayeli bakumupelela intamyo u Asa

¹ Mumwaka uwa 36 bo u mwene u Asa akulaghila, u mwene u Baasha uwamu Izilayeli akabuka pakulwa ubwite na bantu aba mu Yuda, po akakazengelela ilinga akaya akakulu nkani aka Lama, umwakuti atakabepo nayumoyumo umuntu uwakwepamo pamo uwakwinjilamo mu Yuda.

² Po u Asa akasenda usiliva nu golide yuyo akaba muvipinda ivyakusungilamo ivintu ivya mu Nyumba iya Chala sona na munyumba yache iya bumwene nukumutumila u Beni Hadadi u mwene uwamu Siliya, yuyo akalaghilagha mu Damasika na mazyu aghakuti,

³ “Zagha tufinge ngati mumo abanyenya bitu bakafingila. Ane nkukutumila ichabupi icha siliva nu golide, po losi ulu mazya ubumanyani bwako nu Baasha u mwene wamu Izilayeli umwakuti efyemo abasilikali bache muchisu chane.”

⁴ U Beni Hadadi akivwana nu mwene u Asa nukubatuma abasongo aba basilikali pakulwa ubwite nutwaya utukulu utwa mu Izilayeli. Po akakapota akaya akakulu aka Iyoni naka Dani naka Abeli Mayimu sona nutwaya tosi utukulu nkani utwakusungilamo ivintu muchisu icha Nafutali.

⁵ Bo u Baasha ivwa zinizi akaleka pakukazenga akaya akakulu nkani aka Lama nukuyileka imbombo yache.

⁶ Po u mwene u Asa akasenda abantu bosi aba mu Yuda, nukwefyamo amabwe na matabwa mu Lama, ghagho u Baasha akazengela akaya akakulu aka Geba naka Mizipa.

Umulaghuzi u Hanani

⁷ Pakabalilo kalakala umulaghuzi u Hanani akiza kwa mwene u Asa uwamu Yuda nukumubuzya ukuti, “Pachifukwa ichakuti wamusubila u mwene uwamu Siliya ukuchila u Mwene u Chala wako, abasilikali abamwene aba mu Siliya bakutolokite.

⁸ Nkimba abasilikali aba mu Etiyopiya, naba mu Libiya batakaba binji, babo bakaba ni ngolo izya bwite inyinji, na bendezya falasi abinji? Loli bo wamusubila u Mwene, akababika munyobe zyako.

⁹ Pakuti amaso agha Mwene ghakwennya posi na posi pachisu ichapasi umwakuti abakazyanje abantu babo bakumwivwila na moyo ghabo ghosi. Awe wabomba ichintu ichabupunganu nkani, po ukwanda ilelo ukwiza pakulwa ubwite.”

¹⁰ U Asa akamukalalila nkani umulaghuzi yula pachifukwa icha mazyu ghanagha, umwakuti akamwighalila mujele. Pakabalilo kalakala u Asa akabayivya nkani abantu bamo.

Ubufwe ubwa Asa

¹¹ Imbombo zyosi zizyo u Asa akabomba pakabalilo kache ukwanda pabwandilo mupaka pabumalilo zisimbiwe mwibuku ilya Mbili iya bamwene aba ba Yuda, naba Izilayeli.

¹² Mumwaka uwa 39 bo u Asa akulaghila, akabinagha ububine ubupalapala nkani uwa vinama. Pope bulo atakabuzikizya kwa Mwene, loli ku baghanga.

¹³ Po mumwaka uwa 41 uwa bulaghili bwache, u Asa akafwa,

¹⁴ nukusyiliwa mwipumpa lilyo akikumbila mukaya akakulu nkani aka Devedi mu Yelusalemu. Bakabombezya utwakununkila na mafuta aghakununkila pakughupakazya umuvimba wache, sona bakapemba umoto umukulu nkani pakumulila.