2 Imbili 15 - IBAYIBOLO 2024

U Asa akuyannya sona ivintu

¹ Umuzimu uwa Chala ghukamwikila u Azaliya umwana uwa Odedi.

² Po akabuka pakukomana nu Asa nukumubuzya ukuti, “Wee Asa na mwebosi mwe bantu aba mu Yuda naba mu Benjamini ivwa kuno! U Mwene akuba namwe nanti mukuba nawe. Nanti mukumulondelezya, mukwiza pakumwagha, loli nanti mukumukana, wepe akwiza pakubakana.

³ Aba Izilayeli bikala akabalilo akatali nkani pakusita ukuba nu Chala uwanaloli nu muputi uwakubamanyisya sona na basita ndaghilo.

⁴ Loli bo bali muntamyo bakanyokela kwa Mwene u Chala uwa ba Izilayeli. Bakamulondelezya, po akitikizya ukuti mumwaghe.

⁵ Mumasiku ghalaghala umuntu wesi yuyo akepaghamo pamo ukwinjilamo atakaba nu mutende, pakuti abene chisu bakaba muntamyo inkulu nkani.

⁶ Uluko loka lukaluvwima uluko ulunji sona akaya akakulu nkani kakakavwimagha akaya akamwabo pachifukwa ichakuti u Chala akabayivya nintamyo izyakulekanalekana.

⁷ Loli amwe mujimbaye sona mutakawanje amaka, pakuti mukwiza pakupokela umuvwalo pa mbombo yiyo mukubomba.”

⁸ Bo u Asa aghivwa amazyu aghabulaghuzi agha Azaliya umwana uwa mulaghuzi u Odedi, akikazya. Akefyamo ivifwani ivyakukozya isoni mu Yuda na muchisu icha Benjamini sona na mutwaya tosi utukulu, tuto akatufyula muchisu icha mumaghamba icha Efulayimu. Akachizenga sona ichighemo icha Mwene chicho chikaba kuntazi ukwa ntanda iya Nyumba iya Mwene.

⁹ Po akababungannya poka abantu bosi aba mu Yuda naba Benjamini naba Efulayimu naba Manase naba Simiyoni babo bakikalagha pakasi papabo, pakuti abantu abinji nkani aba mu Izilayeli bakiza kulubazu lwache, bo bennya ukuti u Mwene u Chala wache akaba nawe.

¹⁰ Bakabungana mu Yelusalemu mumwezi uwabutatu, mumwaka uwa 15 bo u Asa akulaghila.

¹¹ Pakabalilo kalakala bakabikagha ichakwiyipa kwa Mwene icha ng'ombe 700 ni ng'ozi ni mbuzi 7,000, vivyo bakafyula.

¹² Bakafinga ulufingo ulwakuti bakwiza pakumulondelezyanga u Mwene, u Chala uwa banyenya babo na moyo ghabo sona nu muzimu wabo ghosi.

¹³ Umuntu wesi yuyo atakalondagha pakumulondelezya u Mwene, u Chala uwa Izilayeli akaghoghiwanga manyi munandi pamo usongo manyi umwanavuli pamo umukolo.

¹⁴ Bakalapa ichilapo pamaso pa Mwene umwakukolomoka nkani sona bakalizyanga amapati ni vinkobe.

¹⁵ Abantu bosi aba mu Yuda bakahoboka ni chilapo chila pachifukwa ichakuti bakalapa na moyo ghabo ghosi. Bakiyipa pakumulondelezya u Chala, po bakamwagha. U Mwene akabapa umutende kumbazu zyosi.

¹⁶ U mwene u Asa akamwefyapo u nyinakulu u Maaka pabumwene, pachifukwa ichakuti akapanga ichifwani ichamwiko icha Ashela. U Asa akachidumulannya ichifwani chila nukuchochela mwikombe ilya Kidiloni.

¹⁷ Napapo u Asa atakabwefya ubuzilo ubwapamwanya ubwakwiputilapo ivifwani mu Izilayeli, loli akamusubila u Mwene mubumi bwache bosi.

¹⁸ U Asa akabika sona usiliva nu golide mu Nyumba iya Chala, poka ni vibombelo vyosi vivyo yuyo nu wise bakavipaghulila kwa Mwene.

¹⁹ Patakabapo sona ubwite mupaka mumwaka uwa 35 pakabalilo aka Asa.