2 Imbili 14 - IBAYIBOLO 2024

¹ U Abiya akafwa nukusyiliwa mukaya akakulu aka Devedi mu Yelusalemu. Umwana wache u Asa akamupyana pakuba we mwene, sona pakabalilo kache ichisu chila chikaba mumutende amaka 10.

U mwene u Asa akulaghila mu Yuda

² U Asa akamuhobosya u Mwene u Chala wache pakubomba ingolosu.

³ Akavimongolannya ivighemo ivya bayeni nu buzilo ubwapamwanya ubwakwiputilapo ivifwani. Akazimongolannya impanda impaghuliwa sona akavidumulannya ivifwani ivya chala u Ashela.

⁴ Akabalamula abantu aba mu Yuda ukuti bamwiputaye u Mwene, u Chala uwa banyenya babo nukwivwila indaghilo na malamulo ghache.

⁵ Akabwefya ubuzilo ubwapamwanya ubwakwiputilapo ivifwani ni vighemo vyosi ivya kufukizizyapo utwakununkila mutwaya tosi utukulu utwa mu Yuda, po ubumwene bukaba mumutende pakabalilo kache.

⁶ Akazenga utwaya utukulu nkani utwa malinga mu Yuda, pakuti ichisu chikaba mumutende. Pakabalilo kalakala atakabapo nayumoyumo yuyo akalwa ubwite nawe, pakuti u Mwene akamupa umutende.

⁷ U Asa akababuzya abantu aba mu Yuda akati, “Zagha tuzenge utwaya utukulu utu sona tutuzengele impaso na malinga ni chitembe ni milyango sona ni mpingwi zyache. Ichisu ichi chichili chili munyobe zyitu, pachifukwa ichakuti tukamubuzikizya u Mwene u Chala witu. Tukamubuzikizya po atupiye umutende kumbazu zyosi.” Po bakazenga utwaya utukulu tula, sona ivintu vikabendelagha akiza.

⁸ U Asa akaba na basilikali 300,000 aba mu Yuda, babo bakanyamulagha ingulu inkulu ni mpalala sona na basilikali 280,000 aba muchisu icha Benjamini, babo bakanyamulagha ingulu nubwele. Bosi banaba bakaba basilikali abajivu nkani pakulwa ubwite.

⁹ U Zela uwamu Etiyopiya poka na basilikali bache abinji nkani, ni ngolo izya bwite 300 bakiza mupaka ku Malesha pakulwa ubwite.

¹⁰ U Asa akabuka pakulwa nawe ubwite, po bakabamba mwikombe ilya Zefata kupipi nakaya aka Malesha.

¹¹ Po u Asa akamwitizya u Mwene u Chala wache akati, “Wee Mwene atalipo uyunji yuyo ayanite nawe ukuti ubapoke abantu abadedebazu munyobe izya bantu abamaka. Wee Mwene u Chala witu utwavwe, pakuti tukusubiye awe, sona tukwiza pakulwa ubwite na basilikali abinji aba mwitabwa lyako. Wee Mwene we Chala witu. Utakitikizyanje ukuti umuntu alwanje nawe.”

¹² U Mwene akabapota aba Etiyopiya pamaso pa Asa na bantu aba mu Yuda. Po aba Etiyopiya bakachimbila

¹³ sona u Asa na basilikali bache bakabachimbizya mupaka ku Gelala. Pisiku lilalila aba Etiyopiya abinji bakafwa, umwakuti patakabapo nayumoyumo umuntu uwakupona. Bakabanangannya pamaso pa Mwene na pamaso pabasilikali bache. Abantu aba mu Yuda bakafyula ivintu ivyinji nkani.

¹⁴ Bakatunangannya utwaya tosi utwakuzyungulila akaya akakulu aka Gelala, pachifukwa ichakuti u Mwene akabavulungannya. Bakatufyula utwaya tosi tunutu, pakuti mukaba ivintu ivyinji ivyiza nkani.

¹⁵ Bakavimongolannya sona ivisakasa ivya badimi nukuzifyula ing'ozi ni mbuzi ni ngamila. Po bakanyokela ku Yelusalemu.