2 Imbili 13 - IBAYIBOLO 2024

U mwene u Abiya akulaghila mu Yuda

¹ Mumwaka uwa 18, bo u Yelobowamu akulaghila, u Abiya akaba we mwene uwamu Yuda,

² sona akalaghila amaka matatu bo ali mu Yelusalemu. Unyina akaba we Maaka, umwana uwa Uliyeli uwa ku Gibeya. Pakabapo ubwite pakasi pa Abiya nu Yelobowamu.

³ U Abiya akabuka pakulwa ubwite poka na basilikali bache 400,000, po wepe u Yelobowamu akababambika abasilikali bache 800,000, babo bakamanya nkani pakulwa ubwite.

⁴ U Abiya akimilila pighamba ilya Zemalayimu, muchisu icha mumaghamba icha Efulayimu, po akati, “Wee Yelobowamu na mwebosi mwe ba Izilayeli, ivwa kuno!

⁵ Nkimba mutazimenye ukuti u Mwene u Chala uwa ba Izilayeli, amupiye u Devedi, poka na baluko lwache ubumwene ubwa Izilayeli bwila na bwila pakufingana nawe ulufingo ulusita ukunanganika?

⁶ Pope bulo u Yelobowamu umwana uwa Nebati, lilyo likambala ilya Solomoni umwana uwa Devedi, akamusambukila u mwene wache.

⁷ Abantu bamo abamwalwemwalwe bakamubunganila nukumusamula u Lehobowamu umwana uwa Solomoni pakabalilo kako akaba mwana munandi umwakuti atakaba na maka aghakwipokela mwene.

⁸ “Loli ilelo mukulonda pakubusambukila ubumwene ubwa Mwene, bubo buli munyobe izya baluko ulwa Devedi. Naloli amwe muli na basilikali abinji nkani sona muli ni vifwani ivya ngwata ivya golide, vivyo u Yelobowamu akapanga, umwakuti babanje bo bachala binyu.

⁹ Nkimba amwe mutakabachimbizya abaputi aba Mwene, babo bana aba Aloni naba Levi nukwiyimikila mwebene abaputi abinyu na binyu ngati mumo bakubombela abantu abanji aba muvyisu ivinji? Nanti umuntu wesi iza ni nkambaku inyana na badubi seveni pakwipaghula mwene, kokuti angaba muputi uwa vintu vivyo vite bachala.

¹⁰ “Loli aswe, u Mwene we Chala witu, po tutamukanite. Abaputi babo bakumubombela u Mwene bana abalumendo aba Aloni sona aba Levi bo babo bakubavwa pambombo yabo.

¹¹ Pandabindabi na pachamabwila posi bakabikagha ivyakwiyipa ivyakocha nu twakufukizya utwakununkila kwa Mwene. Bakabikagha ivibama ivipaghuliwa pitebulo lilyo liswefiwe nukukozya inyale pavyakubikapo inyale ivya golide pachamabwila posi. Aswe tukubomba zizyo u Mwene u Chala witu akatulamula, loli amwe mumukanite.

¹² U Chala ali naswe sona we mulongozi witu. Abaputi bache bakwiza pakulizya amapati ghabo pakubitizya abantu ukuti bize pakulwa namwe ubwite. Mwee ba Izilayeli, mutakalwanje ubwite nu Mwene, u Chala uwa banyenya binyu, mutangamupota.”

¹³ Pakabalilo kalakala u Yelobowamu akabatuma basilikali pakuvwamilila, umwakuti alwe nabo ukufuma kwisinda kwabo. Po utubukatila utwa basilikali tukaba kuntazi ukwa bantu aba mu Yuda, sona abasilikali abakuvwamilila bala bakaba kwisinda.

¹⁴ Abantu aba mu Yuda bakaghalabuka nukwennya ukuti kuntazi na kwisinda kwabo kukaba bantu. Po bakamulilila u Mwene. Abaputi bakalizya amapati ghabo,

¹⁵ po abantu aba mu Yuda bakakolomoka pakubabuzya abantu nizya bwite. Bo bakolomoka bulabula, u Chala akamupota u Yelobowamu, poka naba Izilayeli pamaso pa Abiya na bantu aba mu Yuda.

¹⁶ Aba Izilayeli bakabachimbila abantu aba mu Yuda, po u Chala akababika munyobe zyabo.

¹⁷ U Abiya na bantu bache bakabaghogha aba Izilayeli abinji nkani, umwakuti aba Izilayeli 500,000 abamaka nkani bakaghoghiwa.

¹⁸ Pisiku lilalila aba Izilayeli bakapotwa, po abantu aba mu Yuda bakapota pachifukwa ichakuti bakamusubila u Mwene, u Chala uwa banyenya babo.

¹⁹ U Abiya akamuchimbizya u Yelobowamu nukumufyula akaya akakulu aka Beteli naka Yeshana naka Efuloni, poka nutwaya twabo utupalamani.

²⁰ U Yelobowamu atakaba sona na maka pakabalilo aka Abiya. Po u Mwene akamukoma u Yelobowamu umwakuti akafwa.

²¹ Loli u Abiya akanduka pakuba wamaka nkani. Akasenda abakolo 14 pakuba bachi bache, po akaba na bana abalumendo 22 na bana abalindu 16.

²² Imbombo izinji zyosi zizyo u Abiya akabomba sona na mazyu ghosi ghagho akanena visimbiwe mwibuku ilya Mbili iya mulaghuzi u Ido.