2 Aba Tesalonika 2 - IBAYIBOLO 2024

Nizya Muntu Umubibi

¹ Mwee bakamu bane, ilelo nkulonda inene sona ukuyana nizya kwiza sona ukwa Mwene witu u Yesu Kilisitu, sona nizya kukomana kwitu poka nawe. Nkubalaba ukuti,

² imitu yinyu yitakavulunganaye, pamo ukuchenukila na mazyu aghakuti, “Isiku ilya Mwene lyafika,” napapo bakunena ukuti amazyu agha ghakufuma kwa Muzimu Umuzelu, pamo ukuti sweswe twaghanena, pamo ukuti twabasimbiye mwakalata uyu.

³ Patakabepo nayumo umuntu uwakubazimbula napo panandi, pakuti isiku lila litakwiza mupaka papo ukumusambukila u Chala ukwabumalilo kwabombiwa, sona umuntu Umubibi yula aboneke, yuyo ubumalilo bwache ko kuzimila.

⁴ Akwiza pakususya nukwikwezya mwene pamwanya pa bachala bosi sona na pamwanya pa vintu vyosi vivyo abantu bakuvyiputa. Akwiza pakwinjila nukwikala mu Nyumba iya Chala nukwiyitizya mwene ukuti we Chala.

⁵ Nkimba mutakukumbuka ukuti nkababuzyanga zyosi zinizi, bo indi poka namwe?

⁶ Loli nilelo bulo muzimenye ukuti chilipo ichintu chimo chicho chikumukanizya, umwakuti avumbuliwe pakabalilo kache akiza.

⁷ Pakuti ilelo amaka aghakubusyefu agha mbibi ghandite kale pakubomba imbombo. Loli chikwiza pakuba kubusyefu mupaka papo efiwapo yuyo akuchikanizya.

⁸ Po umuntu umubibi yula akwiza pakuvumbuliwa. Loli u Mwene u Yesu akwiza pakumunangannya nu muyi uwa mumulomo wache, bo akwiza mubuchindamu bwache ubwakunyezimila.

⁹ Umuntu umubibi yula akwiza na maka agha Satana nukubomba ivyika ivyabumyasi ni viswigho ivyakulekanalekana.

¹⁰ Akwiza pakubomba ivintu ivyinji nkani pakubazimbula abantu abinji babo bakwiza pakuzimila. Abene bakwiza pakuzimila ichifukwa bakakana pakupokela nukubughana ubwanaloli ukuti bapokiwe.

¹¹ Pachifukwa chinichi, u Chala akubatumila amaka agha buvulunganu pakubomba mumwabo umwakuti basubile chicho chabumyasi.

¹² Polelo ubumalilo bwache bwakuti bosi babo batasubiye ubwanaloli, loli bahobokite nkani nukubomba imbibi, bakwiza pakususyiwa.

U Chala akabasala ukuti mupokiwe

¹³ Loli aswe tubaghiye pakumupalizya u Chala akabalilo kosi pachifukwa icha mwemwe, bakamu bitu, mwemwe u Mwene abaghanite. Pakuti u Chala akabasala amwe po pabwandilo na maka agha Muzimu Umuzelu ukuti abapoke pakubapaghula pakuba bantu bache abazelu, pachifukwa icha kumusubila kwinyu mubwanaloli.

¹⁴ U Chala akabitizya amwe ukwendela mu Mazyu Amiza ghagho tukalumbilila kukwinyu ukuti mugabane nabo ubuchindamu ubwa Mwene witu u Yesu Kilisitu.

¹⁵ Polelo bakamu bitu, mwimaye nkani, sona mukakatile inyiho zizyo tukabamanyisya amwe, manyi mumazyu, manyi mubakalata bitu.

¹⁶ U Mwene witu u Yesu Kilisitu nu Tata witu u Chala yuyo akatughana aswe, sona yuyo muchisa chache akatupa ulukazyo lwache lulo lutakupotwapo nalumo, sona nu lusubilo ulwiza,

¹⁷ abakazye nukubapa amaka ukuti mubombaye imbombo zyosi inyiza, sona na mumazyu bulo.