2 Aba Kolinti 9 - IBAYIBOLO 2024

Ukwavwa abakilisitu abamwitu

¹ Chite chakulondiwa ukuti ane imbasimbile nizya vyabupi ivyakwavwa abantu aba Chala.

² Pakuti inzimenye ukuti mwiyipiye nkani pakwavwa, sona nituvikizyapo nkani papinyu pakasi pabantu aba mu Makedoniya, ukubabuzya ukuti ukwandila mumwaka ghugho wamalagha amwe mwe bantu aba mu Akaya mwiyanizye pakwavwa. Sona kope nukwiyipa kwinyu kwabanyamusya abantu abinji.

³ Loli nkubatuma abakamu bitu aba umwakuti ukwituvya kwitu nizya amwe pazinizi kutakabe kwabulo, loli ukuti mubanje mwe bakwiyannya ukuyana namumo nkanenela.

⁴ Pakuti nanti bo abantu aba mu Makedoniya biza poka nane nukubagha mutiyanizye, tukwiza pakukoziwa isoni—ukusita ukunenapo nachimo nizya amwe—pakuti tubasubiye nkani.

⁵ Po nkinong'ona ukuti chakulondiwa pakubalambilizya abakamu aba pakubendela tasi nukuyanizya zila ivyabupi vivyo mukalayizya. Po ivyabupi vila vikwiza pakuba ukuti viyaniziwe kale pakuba vyabupi, bo nkwiza, vite vyabupi ivyakufyengiwa bulo, awe.

⁶ Ifundo yo iyi: Umuntu wesi yuyo akupesa tunandi, akwiza pakwinula tunandi, sona wepe umuntu yuyo akupesa ivyinji, akwiza pakwinula ivyinji.

⁷ Umuntu wesi apange bulo ukuyana namumo adumulila mumoyo wache, umwakusita ukwilamwa, pamo umwakusita kufyengiwa bulo, pakuti u Chala akumughana umuntu yuyo akupa umwakuhoboka.

⁸ Po u Chala angabapa amwe ulusayo ulukulu nkani, umwakuti akabalilo kosi mubanje navyo ivyakubakwana, sona ni vintu ivinji ivyinji ukuti mwavwepo pambombo zyosi inyiza.

⁹ Pakuti Amasimbo ghakuti, “U Chala abagabila abapina ivyabupi mubwighane bwache, ubugholosu bwache ubwa bwila na bwila.”

¹⁰ U Chala yuyo akumupa umuntu yuyo akupesa imbeyu, sona ni chibama ichakuti alyanje, akwiza pakubapa imbeyu zizyo mukulonda nukuzikuzya imbeyu zila. Akwiza pakubalizya ivikomwa ivya chisa chinyu.

¹¹ Mukwiza pakuba mwe bakabi muvintu vyosi ukuti namwe bulo mubanje mwe bapi akabalilo kosi, umwakuti ukwendela mumwitu abantu abinji bamupalizye u Chala.

¹² Imbombo iyi, yiyo mukubabombela abantu abazelu aba Chala, naloli yite yakwavwa kwene pa vyakusobelwa vyabo, loli sona yikubapela abantu abinji pakumupalizya nkani u Chala.

¹³ Pachifukwa icha kusimikizya kwinyu pambombo iyi, abantu bakwiza pakumupala u Chala pachifukwa icha kwivwila kwinyu pakwitika Amazyu Amiza agha Kilisitu, sona nukwendela pakugabana nabo kwinyu umwakusita ukumamilizya, sona nu muntu wesi bulo vivyo muli navyo.

¹⁴ Po bakwiza pakulanjizya ulughano lwabo nukubiputila nkani pakuti u Chala akabalanjizya nkani ichisa.

¹⁵ Amapalo ghabanje kwa Chala pachifukwa icha chabupi chache chicho chitakuneniwa.