2 Aba Kolinti 7 - IBAYIBOLO 2024

¹ Mwee bamanyani bane abaghaniwa, pakuti twaba na malayizyo ghosi ghanagha, zagha twisuke twebene ku vintu vyosi vivyo vikunyazya umubili pamo amoyo ghitu, nukwipela twebene pakuba bantu abazelu, sona nukuba bantu abakumunyila u Chala.

U Pabuli ahoboka

² Twighulile amoyo ghinyu. Tutamunangiyepo nayumo umuntu, pamo ukumunyazyapo nayumo umuntu, pamo ukumuchevya nayumo umuntu.

³ Intakunena zinizi pakubasusya, awe. Pakuti ukuyana namumo ineneye pakwanda, amwe mwe baghaniwa bitu, umwakuti tuli poka namwe bwila, manyi tuli nubumi pamo twafwa.

⁴ Imbasubiye nkani, nkwituvikizya nkani mumwinyu! Muntamyo zyitu zyosi inchili nizuye nu bujivu nkani, sona ihobokite nkani.

⁵ Napapo bulo bo twafika mu Makedoniya, tutakatuzyapo. Loli tukakomana nintamyo posi na posi, ivyongo na bantu, sona ubogha bukaba mumoyo ghitu.

⁶ Loli u Chala, yuyo akusangalusya abantu babo bawa amaka, akatusangalusya nukwiza ukwa Titi.

⁷ Kutakaba ukwiza kwache kwene kuko kukatusangalusya, loli pachifukwa icha kumusangalusya kwinyu. Akatubuzya namumo mukansambila, ichitima chicho mukuba nacho, sona namumo mukiyanizya pakumpoka ane, po cho chifukwa ihobokite nkani.

⁸ Napapo ukalata wane akabapela pakuba ni chitima, inte ni chitima ukuti nkasimba ukalata yula. Nkaba ni chitima bo nennya ukuti ukalata yula akubapela pakuba ni chitima akabalilo akanandi.

⁹ Loli ilelo ihobokite nkani—te pachifukwa ichakuti nkabapela pakuba ni chitima, awe, loli pachifukwa ichakuti ichitima chinyu cho chicho chikabapela ukuti mupinduke. Pakuti mukaba ni chitima ukuyana namumo u Chala akalondelagha, po bunubu tutakabavulazyapo.

¹⁰ Pakuti ichitima chicho chikubombeziwa nu Chala chikubapela ukuti mupinduke nukupokiwa. Loli ichitima icha muchisu ichapasi chikupela ubufwe.

¹¹ Ennya mumo ivikomwa ivya chitima icha mwa Chala vikabombela mumwinyu. Chabapa ulweke ulukulu, chabapa amaka nkani pakusimikizya ukuti mutanangitepo, chabakalalizya nkani, sona chabapelela ubogha ubukulu. Chabapa inyota ukuti munyennye, sona chabapa ulweke ukuti munzighilile, sona ukufunda abambibi. Pabuzilo bosi mwisimikila mwebene ukuti inongwa iyi yitakubapalamasya.

¹² Po napapo nkabasimbila amwe ukalata yula, chite chifukwa icha yuyo akananga, pamo chifukwa icha yuyo akamunangila, awe. Loli nkabasimbila ukalata yula, umwakuti imbalanjizye pamaso pa Chala ulweke lwinyu ulukulu papitu.

¹³ Polelo twasangalusiwa nkani. Ukonjelezya pabusangalusu bwitu tukahoboka nkani nu busangalusu ubwa Titi pakuti mwebosi mukamusangalusya.

¹⁴ Pakuti nkituvikizyanga kukwache nizya amwe, sona nukuti mutankozya isoni. Zyosi zizyo tukanena namwe zyanaloli, po ukwituvya kwitu nizya amwe kwa Titi kwalanjizya pakuba kwanaloli.

¹⁵ Nkaninkani ulughano lwache lukulu nkani papinyu, bo akukumbuka ukwivwila kwinyu mwebosi, sona nukuti mukamupokela nubogha, sona nukutetema.

¹⁶ Ihobokite nkani pachifukwa ichakuti imbasubiye nkani.