2 Aba Kolinti 2 - IBAYIBOLO 2024

¹ Po nkadumula pa nemwene ukuti intakizeko sona kukwinyu ukuti intakabe nu bulendo ubunji ubwakubaba.

² Pakuti nanti ane ningabapela pakuba ni chitima, fwandi wewenu akwiza pakusyala ukuti ansangalusye? Nkimba bate bene babo nkabapela pakuba ni chitima?

³ Ichi cho chifukwa nkabasimbila ukalata yula. Intakalondagha ukwiza kukwinyu ukuti abantu balabala, babo bangansangalusya batakampelela ichitima. Pakuti imenye akiza nkani ukuti bo ne muhobosu, namwe bulo mwe bahobosu.

⁴ Bo nkubasimbila ukalata yula, umoyo wane ghukatamiwa nkani, sona nkaba ni chitima nkani, sona nkalila na masozi. Intakalondagha pakubapelela ichitima, loli ukuti muzimanye mumo imbaghaniye.

U Pabuli akubahobokela babo bakamunangila

⁵ Nanti yumo akumupela uwamwabo pakuba ni chitima, atakumpela ane pakuba ni chitima, loli akubapela mwebosi pakuba ni chitima muzila zimo. Nanena zinizi ukuti intakabe mukafu nkani papache.

⁶ Ulufundo lulo afundiwa nalo na bantu abinji muchipanga, lwamukwana.

⁷ Polelo mubaghiye pakumuhobokela, sona nukumusangalusya, umwakuti atakabe ni chitima ichikulu nkani.

⁸ Po nkubalaba ukuti mumulanjizye namumo mumughaniye.

⁹ Ichi cho chifukwa nkabasimbila ukalata yula ukuti imbayele, sona nukuti imanye nanti mwe bakwivwila muvintu vyosi.

¹⁰ Nanti mukumuhobokela umuntu yumo, nane bulo nkumuhobokela. Sona nanti nahobokela, nanti kalipo kamo akakuti ihobokele, nahobokela pamaso pa Kilisitu pachifukwa icha mwemwe,

¹¹ ukuti u Satana atakalwaghilepo ulusako papitu pakuti tubumenye ubuchevu bwache.

Ukupasya ukwa Pabuli mu Tulowa

¹² Bo nafika mu Tulowa ukuti indumbilile Amazyu Amiza nizya Kilisitu, nkagha ukuti u Mwene anyighuliye kale izila ukuti imbombemo imbombo mulamula.

¹³ Loli nkatamiwa nkani mumoyo wane pakuti intakamwagha umukamu witu u Titi kulakula. Po nkalaghana nabo nukubuka ku Makedoniya.

Ubupoti mwa Kilisitu

¹⁴ Loli u Chala apaliwanje, yuyo mwa Kilisitu akabalilo kosi akutulongolela palusekelo ulwa bupoti, sona ukwendela mumwitu pakufumusya nizya Kilisitu posi na posi ngati gho munusi umwiza.

¹⁵ Pakuti aswe tuli ngati gho munusi umwiza uwa Kilisitu uwakumuhobosya u Chala pakasi pabantu babo bakupokiwa, sona na babo bakusobela.

¹⁶ Abantu babo basobelite, umunusi ughu bo bufwe. Loli abantu abanji, umunusi ughu bo bumi. Po nkimba wewenu angayikwanisya imbombo yiniyi?

¹⁷ Aswe tutayanite na bantu abinji bamo, babo bakubwaghilapo ubukabi pa mazyu agha Chala, loli pakuti u Chala atutuma aswe, cho chifukwa tukunena nu moyo uwanaloli pantazi papache ngati twe babombi aba Kilisitu.