2 Aba Kolinti 13 - IBAYIBOLO 2024

U Pabuli akuchisoka ichipanga akabumalilo

¹ Aka kabutatu pakubendela. Pakuti Amasimbo ghakuti, “Inongwa yosi yibaghiye yisimikiziwe na bakaboni babili pamo batatu.”

² Nkabasoka kale bo indinamwe pabulendo bwane ubwabubili. Ilelo nkupyanizya sona pakubasoka bo intaliko: Bo nanyokako ntakwiza pakubapelela ichisa abantu babo bakananga kwisinda, pamo abantu bamo abanji,

³ pakuti mukulonda ichisimikizyo ichakuti u Kilisitu ali pakunena ukwendela mumwane. Umwene ate mudedebazu muvintu vivyo akubomba kukwinyu, awe, loli akulanjizya amaka ghache mumwinyu.

⁴ Napapo akaba ngati po mudedebazu bo akukomeliwa pachipinjika, loli ali nubumi ukwendela mumaka agha Chala. Pakuti naswe bulo twe badedebazu mumwache, loli tukwiza pakuba nubumi mumwache ukwendela mumaka agha Chala, umwakuti tubabombele.

⁵ Mwipime mwebene nanti mukulusunga ulwitiko lwinyu. Mwilonge mwebene. Nkimba mutakuzyaghannya ukuti u Kilisitu u Yesu ali mumwinyu? Nanti zite bunubu, kokuti naloli mwapotwa!

⁶ Nkusubila ukuti amwe mukwiza pakuzyaghannya ukuti aswe tutapotizwe.

⁷ Loli tukwiputa kwa Chala ukuti mutakabombe nachimochimo ichibibi, kute kokuti tuboneke ngati po tupotizwe, loli ukuti mubombaye chicho chigholosu, napapo tungaboneka ngati po twapotwa.

⁸ Pakuti tutangabomba nachimochimo ichakususannya nu bwanaloli, loli chene chicho chikubwimila ubwanaloli.

⁹ Tukuhoboka nkani bo tuli badedebazu, loli amwe mwe bamaka. Chicho tukubiputila chakuti namwe mubanje mwe bantu abakufikapo.

¹⁰ Nkubasimbila ivintu vinivi bo intaliko, umwakuti bo niza kukwinyu intakabe mukali mukabombezye aka bulaghili bwane bubo u Mwene akampa ukuti invizenge ivipanga, loli awe ukuvimongolannya.

¹¹ Mwee bakamu bane, ichabumalilo nkuti, musyale akiza! Gambika izila zyinyu, sona sunga zizyo nkubasoka. Mwivwanaye nukwikala mumutende. Po u Chala, umwenecho uwa lughano nu mutende akwiza pakuba namwe.

¹² Mulamunkanaye nu lughano ulwenecho.

¹³ Abantu bosi abazelu aba Chala bakubalamuka.

¹⁴ Ichisa icha Mwene u Yesu Kilisitu nu lughano ulwa Chala, sona nu bupoka ubwa Muzimu Umuzelu vibanje namwe mwebosi.