2 Aba Kolinti 12 - IBAYIBOLO 2024

Ivisetuka ivya Pabuli nu buvumbuli

¹ Imbaghiye nendelele pakwituvya, napapo chitalipo nachimochimo chicho ningakabapo. Loli losi ulu nkwiza pakunena nizya visetuka nu buvumbuli ubwa Mwene.

² Imumenye umukilisitu yumo, yuyo amaka 14 ghagho ghamalagha akazompoliwa bulo pakubuka kumwanya nkani. Ntazimenye nanti zinizi zikabombiwa naloli, pamo nanti chikaba chisetuka bulo, u Chala mwene weyuyo azimenye.

³ Inzimenye sona ukuti umuntu uyu akazompoliwa bulo pakubuka ku Paladizo. Ntazimenye nanti zinizi zikabombiwa naloli, pamo nanti chikaba chisetuka bulo, u Chala mwene weyuyo azimenye.

⁴ Kulakula umuntu yula akivwa ivintu ivyakusita ukuneniwa, ivintu vivyo umuntu atangavinena nu mulomo.

⁵ Po nkwiza pakwituvya nizya muntu uyu, loli ntakwiza pakwituvya nizya ane nemwene. Ntakwiza pakwituvya ni chintu chimo, loli vyene ivintu vivyo vikulanjizya ubudedebazu bwane.

⁶ Napapo nanti nalondagha ukwituvya, ntakwiza pakuba ne mupunganu, pakuti nkwiza pakunena ubwanaloli. Loli nkwikanizya nemwene ukwituvya, umwakuti umuntu yumo atakampimaye pakuba ne wapamwanya ukulekana na zizyo nkuzibomba pamo nkuzinena.

⁷ Loli pakunyila ukuti ningitutumula pachifukwa icha buvumbuli ubukulu ubu, u Chala akabika umwivwa mu mubili wane pakuba wantumi uwa Satana ukuti ghunjivye nkani ukuti intakitutumulaye.

⁸ Nkiputa kwa Mwene katatu nizya chinichi pakumulaba ukuti efye ichintu chinichi papane.

⁹ Loli u Mwene akambuzya akati, “Ichisa chane chakuyana pakuti amaka ghane ghakuba ghakufikapo mumuntu umudedebazu.” Polelo muvintu vyosi nkwiza pakwituvya umwakuhoboka nizya budedebazu bwane, umwakuti amaka agha Kilisitu ghabanje papane.

¹⁰ Pachifukwa icha Kilisitu, nhobokite nkani nu budedebazu bwane nu musamu wane, nintamyo zyane, na mayimba ghane, sona nu bupalapala bwane. Pakuti bo indi mudedebazu, popapo indi na maka.

U Pabuli akubapasikizya aba Kolinti

¹¹ Nipela nemwene pakuba ne mupunganu, loli amwe mwemwe mumpelite pakuba bunubu. Amwe mwemwe mubaghiye pakunsimikizya ane pakuti ane intakaba ne munandi uwabumalilo pa batumiwa abapamwanya nkani aba, napapo ne wabulo.

¹² Ivyika poka ni viswigho, sona ni mbombo izyamaka, vivyo vikusimikizya ukuti ne mutumiwa naloli, vikabombiwa mumwinyu mubufisalyoyo.

¹³ Nkimba chintu choni chicho nkachibomba muvipanga ivinji, ukwefyako chene ichakuti ane nemwene intabatamizyepo nalumo? Nalamba, munhobokele imbibi yane iyi!

¹⁴ Ennya, aka kabutatu ukuti niyanizye pakubendela. Po ntakwiza pakubatamya pakuti chicho nkulonda, vite vintu vivyo muli navyo, awe, loli nkulonda amwe. Pakuti yite mbombo iya bana iyakubasungila abapapi babo ivyuma, awe, loli yo mbombo iya bapapi pakubasungila abana babo ivyuma.

¹⁵ Nkwiza pakuhoboka nkani pakutagha ivyane vyosi poka nubumi bwane bulo, umwakuti imbavwe. Nanti imbaghanite nkani, nkimba amwe mukwiza pakungana panandi?

¹⁶ Amwe mukwiza pakwitinkana nane ukuti intabatamizyepo nalumolumo pakubalaba indalama. Loli abantu bamo banganena ukuti ne muchevu, sona nukuti nkabachevya mubuchevu bwane.

¹⁷ Buli? Nkimba nkabachevya ukwendela mumuntu yumo uwa bantu babo nkabatuma kukwinyu?

¹⁸ Nkamulaba u Titi ukuti abendele, sona nkamutuma umukamu witu yumo poka nawe. U Titi atakabachevya, nkimba mute momumo? Nkimba umwene poka nane tutakabombagha nu moyo ghoka. Nkimba tutakakonka izila yoka?

¹⁹ Lumo mukwinong'ona ukuti mosi mumo twandiye pakwiyimila twebene pantazi papinyu. Awe, loli twanenagha pamaso pa Chala ukuti aswe twanenagha zinizi mwitabwa ilya Kilisitu, sona nukuti muvyosi vivyo tukubomba ukuti tubavwe mwemwe bakamu bitu abaghaniwa.

²⁰ Pakuti nkunyila ukuti lumo ningiza nukubagha bulo ukulekana namumo nalondelagha, sona nukuti namwe munganyagha bulo ukulekana namumo mwalondelagha. Nkunyila sona ukuti lumo ningagha ukudalinkana, na kabini nukukalala nukwiyighana, ni ntuko, ni yebo nukwitutumula, sona nu buvulunganu.

²¹ Nkunyila ukuti bo niza sona kukwinyu u Chala wane akwiza pakunkozya isoni pantazi papinyu, po nkwiza pakubalilila abantu abinji babo bakananga kale, loli batakapinduka nukuzileka imbibi zyabo, ni vinyonywa vyabo, sona nu bwamalaya bwabo bubo babombagha.