2 Aba Kolinti 1 - IBAYIBOLO 2024

¹ Ane ne Pabuli, umutumiwa uwa Kilisitu u Yesu ukuyana nu bwighane ubwa Chala, sona indi poka nu mukamu witu u Timoti. Tukuchisimbila ichipanga icha Chala icha mu Kolinti, sona na bantu bosi abazelu aba Chala aba muchigaba chosi icha Akaya:

² Ichisa nu mutende ivyakufuma kwa Chala Utata witu, sona na kwa Mwene u Yesu Kilisitu vibanje namwe.

U Pabuli akumupalizya u Chala

³ U Chala apaliwanje, uwise uwa Mwene witu u Yesu Kilisitu, yuyo we Tata uwa chisa, sona u Chala, umwenecho uwa busangalusu bosi!

⁴ Umwene akutusangalusya aswe muntamyo zyitu zyosi, umwakuti naswe bulo tungabasangalusya babo bali nintamyo izyakulekanalekana nu busangalusu bubo tukapokela kwa Chala.

⁵ Pakuti ukayana namumo tukugabanilana intamyo inyinji izya Kilisitu, po momumo sona tukugabanilana ubusangalusu ubukulu ukwendela mwa Kilisitu.

⁶ Nanti tukuyimba, tukuyimba pachifukwa ichakuti tukulonda ukuti namwe bulo musangalusiwe nukupokiwa. Nanti tukusangalusiwa, pachifukwa ichakuti tukulonda ukuti namwe bulo musangalusiwe nukupokela amaka agha bujivu nkani, bo muli muntamyo ukuyana nintamyo zizyo naswe bulo tukaba nazyo.

⁷ Po ulusubilo lwitu mumwinyu lutakuyingana. Pakuti tuzimenye ukuti ukuyana namumo mukugabanilana naswe amayimba ghitu, po momumo sona mukugabanilana naswe ubusangalusu bwitu.

⁸ Ilelo bakamu bitu, tukulonda ukuti mumanye intamyo zizyo tukakomana nazyo muchigaba icha Asiya. Amayimba ghakaba makulu nkani ukuchila amaka ghitu, umwakuti tutakaba nu lusubilo ulwakuti tungaba nubumi.

⁹ Tukinong'ona ngati po kwadumuliwa ukuti tubaghiye pakughoghiwa. Loli izi zikabombiwa ukuti tutakisubilaye twebene, loli ukuti tumusubilaye u Chala, yuyo akubazyusya abantu abafwe.

¹⁰ Umwene akatupoka kubufwe ubwakoghofya ubu, po akwiza pakutupoka. Twabika ulusubilo lwitu mumwache ukuti akwiza pakutupoka sona,

¹¹ bo mukutwavwa nukutwiputila. Abantu abinji bakwiza pakumupalizya u Chala mubuzilo bwitu pachifukwa icha zizyo umwene atubombela ni chisa chache.

U Pabuli andula inyinong'ono zyache nizya bulendo bwache

¹² Chicho tukwituvikizyapo chakuti umabyebye witu akutusimikizizya ukuti inkalo yitu muchisu ichapasi nkaninkani ubukamu bwitu namwe, yikaba zelu, sona yiyo yitakaba nu buzimbuli. Zikabanga bunubu chite chifukwa ichakukonka amahala agha buntu, awe, loli pachifukwa icha chisa icha Chala.

¹³ Pakuti tutakubasimbila amwe zizyo mutangabelenga pamo ukwivwisya, awe. Nkusubila ukuti mukwiza pakwivwisya akiza nkani

¹⁴ ukuyana namumo mukutwivwisizya panandi bulo. Nkusubila ukuti napapo mutumenye panandi bulo, umwakuti mungituvya pachifukwa icha sweswe ukuyana namumo tukwiza pakwituvikizya pachifukwa icha mwemwe Pisiku ilya Mwene u Yesu.

¹⁵ Pakuti naloli nkaba nu lusubilo pa zinizi, nkabatika pakubendela tasi amwe, umwakuti mungaba nu lusayo kabili.

¹⁶ Nkabatika pakubendela amwe, pabulendo bwane ubwakubuka ku Makedoniya sona bo nkunyokela, umwakuti munganyavwa pakwendelela nu bulendo bwane ubwakubuka ku Yudeya.

¹⁷ Nkimba mukwinong'ona ukuti zikaba sunga bulo, bo nabatika pakubomba zinizi? Fwandi, mukwinong'ona ukuti nkubatika imbatiko zyane mumahala agha buntu, umwakuti ninganena ukuti, “Eee, ee”, sona “Awe, awe” pakabalilo koka?

¹⁸ Naloliloli u Chala we musubiliwa, po amazyu ghitu kukwinyu ghatakaba ghakuti, “Eee” nu “Awe.”

¹⁹ Pakuti u Yesu Kilisitu, u Mwana uwa Chala, yuyo ane nu Silivana, sona nu Timoti tukamulumbililagha pakasi papinyu, ate we, “Eee” nu “Awe”, loli akabalilo kosi akabanga “Eee” uwa Chala.

²⁰ Pakuti amalayizyo ghosi ghagho u Chala akalayizya ghakabombiwa nu “Eee” uyu. Ichi cho chifukwa ukwendela mwa Yesu Kilisitu tukunena u “Ameni” pakumuchindikilamo u Chala.

²¹ U Chala umwenecho weyuyo akutwikazya poka namwe mwa Kilisitu. Akatupakazya,

²² nukutubika chimanyilo ichakulanjizya ukuti twe bantu bache. Akatupa u Muzimu Umuzelu mumoyo ghitu pakuba chikole icha vintu vyosi vivyo atusungiye.

²³ U Chala abanje we kaboni wane pakuti ichifukwa chicho intakizila mu Kolinti chikaba chakuti intakalondagha pakubapela ukuti mubanje ni chitima.

²⁴ Tutakulonda pakubanyamulisya ukatundu uyunji pa lwitiko lwinyu, awe. Loli tukubombelana namwe ukuti muhoboke pakuti tuzimenye ukuti mwimite nkani mulwitiko lwinyu.