2 Abamwene 9 - IBAYIBOLO 2024

U Yehu bakumupakazya pakuba we mwene uwamu Izilayeli

¹ Pakabalilo kalakala umulaghuzi u Elisha akamwitizya umuntu yumo uwa mukabukatila aka balaghuzi, nukumubuzya ukuti, “Vunga inkazo yako nukuyipinya nu lamba. Senda ibotolo ilya mafuta agha misyunguti ubuke ku Lamoti Giliyadi.

² Nanti wafika kulakula, umulonde u Yehu, umwana uwa Yehoshafati, yuyo mwizukulu uwa Nimishi. Nanti wamwagha umwefyepo pakasi pa bamwabo, sona umusendele muchipinda ichamukasi.

³ Po usende ibotolo lila nukumupungulila amafuta pamutu wache, sona uti, ‘U Mwene ati, “Nkukupakazya ukuti ubanje we mwene uwa ba Izilayeli.” ’ Po wighule kumulyango nukuchimbila, sona utakazyelaye.”

⁴ Po umulaghuzi yula akabuka ku Lamoti Giliyadi.

⁵ Bo afika kulakula, akabagha abasongo aba basilikali bali palukomano. Po akati, “Wee songo, nakulondagha.” U Yehu akamulalusya akati, “Nkimba ukumulonda uwenu?” Umulaghuzi yula akati, “Wewe.”

⁶ U Yehu akanyamuka nukwinjila munyumba. Po umulaghuzi yula akapungulila amafuta pamutu uwa Yehu, nukumubuzya ukuti, “U Mwene u Chala uwa ba Izilayeli ati, ‘Nkukupakazya ukuti ubanje we mwene uwa bantu bane aba Izilayeli.

⁷ Ubanangannye abamunyumba iya mwene wako u Ahabu, umwakuti imutanizye u Yezibeli pachifukwa ichakughogha abalaghuzi bane sona na babombi bane bosi.

⁸ Pakuti abamunyumba bosi iya Ahabu bakwiza pakuzimila. Nkwiza pakumuzimizya umwanavuli wesi munyumba iya Ahabu mu Izilayeli, manyi muzya manyi musatuke.

⁹ Nkwiza pakubapela abamunyumba iya Ahabu ukuti bayane bulo na bamunyumba iya Yelobowamu umwana uwa Nebati, sona na bamunyumba iya Baasha umwana uwa Ahiya.

¹⁰ Atalipo nayumoyumo yuyo akwiza pakumusyila u Yezibeli, loli imbwa zikwiza pakughulya umuvimba wache muchisu icha Yezileli.’ ” Bo anena amazyu ghanagha, umulaghuzi yula akighula kumulyango nukuchimbila.

¹¹ Bo u Yehu anyokela kuko kukaba abasongo abamwabo bala, weka akamulalusya akati, “Nkimba kwiza bulo? Nkimba uchipena yula alondagha choni?” U Yehu akamwamula akati, “Nawe umumenye umuntu yula, sona nakanenele kache kope ukamenye.”

¹² Bakamwamula bakati, “Ukutamanta, utubuzye bulo ubwanaloli.” Po u Yehu akababuzya akati, “Amazyu ghagho ambuzya gho agha: U Mwene ati, ‘Ane nkukupakazya amafuta ukuti ubanje we mwene uwa ba Izilayeli.’ ”

¹³ Umwalubilolubilo bakasenda ivyakuvwinka vyabo nukuvitenga pasi papipi ni nyayo zyache ukuti u Yehu akanyepo. Po bakalizya ipati, sona bakakolomoka bakati, “U Yehu we mwene!”

U Yehu akumughogha u Yolamu

¹⁴ Po u Yehu umwana uwa Yehoshafati, umwizukulu uwa Nimishi, akamusambukila u Yolamu. Pakabalilo kalakala, u Yolamu poka naba Izilayeli bosi bakakazighilila akaya akakulu nkani aka Lamoti Giliyadi ukuti u Hazayeli akaba we mwene uwa chisu icha Siliya.

¹⁵ Loli u mwene u Yolamu akanyokela ku Yezileli, kuko akalindililagha ukuti ivilonda vyache vipole pakuti aba Siliya bakamuvulazya bo akulwa ubwite nu mwene u Hazayeli. Po u Yehu akati, “Nanti mukulonda imbanje ne mwene, mwenelezye ukuti atakabepo nayumoyumo umuntu uwakutoloka mukaya aka nukubuka pakubasoka abantu mu Yezileli.”

¹⁶ U Yehu akakwela ingolo yache nukubuka ku Yezileli, pakuti u Yolamu akatuzya kulakula, sona u mwene u Ahaziya uwamu Yuda akabuka kulakula pakumwennya u Yolamu.

¹⁷ Bo umulindilili yuyo akaba pachitembe mu Yezileli abennya abasilikali aba Yehu ukuti bakupalamila, akakolomoka akati, “Nkwennya abasilikali bakwiza.” U Yolamu akalamula akati, “Tuma umuntu pafalasi ukuti akomane nabo, nukubalalusya ukuti, ‘Nkimba kwiza bulo?’ ”

¹⁸ Po umuntu yuyo akakwela pafalasi akabuka pakukomana nu Yehu nukumubuzya ukuti, “U mwene ukulalusya ati, ‘Nkimba kwiza bulo?’ ” U Yehu akamula akati, “Nkimba uli ni mbombo yoni nizya mutende? Nkonkagha bulo.” Umulindilili yula akati, “Intumi yila yakomana na bantu bala, loli yitanyokiteko.”

¹⁹ Po u Yolamu akamutuma sona umuntu uwabubili yuyo akakwela pafalasi. Bo afika kuko kukaba bantu bala, akababuzya akati, U mwene akulalusya akuti, “Nkimba kwiza bulo?” U Yehu akamula akati, “Nkimba uli ni mbombo yoni nizya mutende? Nkonkagha bulo.”

²⁰ Umulindilili yula akamubuzya u mwene u Yolamu akati, “Intumi yila yakomana na bantu bala, loli yope yitanyokiteko. Umuntu yula akuchimbizya ingolo ngati mumo u Yehu umwana uwa Nimishi akuchimbizizya ingolo. Akuchimbizya nkani ngati po we chipena.”

²¹ Po u Yolamu akalamula akati, “Pinya ingolo yane.” Bo bapinya ingolo yila, u Yolamu u mwene uwamu Izilayeli, poka nu Ahaziya u mwene uwamu Yuda, bakabuka pakukomana nu Yehu, bo umuntu wesi akwelite mungolo yache. Bakakomana nawe mumughunda uwa Naboti umu Yezileli.

²² Bo u Yolamu amwennya u Yehu, akamulalusya akati, “Wee Yehu, nkimba kwiza bulo?” U Yehu akamwamula akati, “Umutende ghungabapo bulibuli nanti ukwiputa ivifwani nu bulozi vivyo unyoko u Yezibeli akandizya vichili vilipo?”

²³ U Yolamu akaghalabuka nukuchimbila bo akumwitizya u Ahaziya ukuti, “Wee Ahaziya, abantu banaba batuzimbula!”

²⁴ Po u Yehu akawesa ubwele bwache nukumulasa u Yolamu pakasikasi pavipunko, umwakuti akalasilo kakinjila mupaka kumoyo, po u Yolamu akawila mungolo yache nukufwila mulamula.

²⁵ U Yehu akamubuzya u Bidikali yuyo akaba we kapitawa uwa ngolo yache iya bwite akati, “Munyamule, umusumbile mumughunda uwa Naboti umu Yezileli. Kumbuka pakabalilo kako tukendagha mungolo zyitu kwisinda ukwa wise u Ahabu, u Mwene akanena nizya Ahabu akati,

²⁶ ‘Mumabwila nkalyennya ibanda ilya Naboti nilya bana bache. Po nkwiza pakukutanizya mumughunda ghunughu.’ Polelo mumunyamule, mumusumbile mumughunda ghulaghula ukuyana namumo u Mwene akanenela.”

U Yehu akumughogha u Ahaziya

²⁷ Bo u Ahaziya u mwene uwamu Yuda azyennya zizyo zikabombiwa, akachimbilila ku Beti Hanani. Loli u Yehu akamuchimbizya bo akukolomoka ukuti, “Wepe mumughoghe.” Po bakamuvulazya bo ali mungolo yache bo akubuka ku Guli, papipi nakaya akakulu nkani aka Ibuleyamu. Loli u Ahaziya akachimbilila kukaya akakulu nkani aka Megido nukufwila kulakula.

²⁸ Ababombi bache bakaghunyamula umuvimba wache mungolo nukubuka nagho ku Yelusalemu. Kulakula bakaghusyila mwipumpa ilya banyenya bache mukaya aka Devedi mu Yelusalemu.

²⁹ Mumwaka uwa 11 bo u Yolamu umwana uwa Ahabu akulaghila, u Ahaziya akaba we mwene uwamu Yuda.

Ukughoghiwa ukwa Yezibeli

³⁰ Po u Yehu akabuka ku Yezileli. Bo u Yezibeli ivwa zinizi, akavilabannya ivikumbi vyache, nukuluka isisi zyache, sona akananamizya pibwindo.

³¹ Bo u Yehu akwinjila pamulyango uwa lupaso, u Yezibeli akakolomoka akati, “Wee Zimuli, nkimba kwiza bulo? Wee mughoghi we ukamughogha u mwene wako.”

³² U Yehu akinusya umutu wache nukwennya kwibwindo kula, po akakolomoka akati, “Nkimba wewenu yuyo ali kulubazu lwane?” Po abambombo babili pamo batatu abamunyumba iya bumwene, bakamwennya u Yehu.

³³ U Yehu akabalamula akati, “Musumbile pasi umukolo uyo.” Bakamusumbila pasi, po ibanda lyache limo likanyafila ulubumba na pafalasi, bo zikumukanyankila.

³⁴ Pisinda pache u Yehu akinjila munyumba iya bumwene, akalya nukung'wela. Po akabalamula akati, “Mughusyile umuvimba uwa mukolo umughuniwa uyu, pakuti akaba mwana uwa mwene.”

³⁵ Loli bo bakubuka pakughusyila, bakawagha bulo umutu, ni nyayo, sona ni nyobe zyache zyene.

³⁶ Bo banyokako nukumubuzya u Yehu, po u Yehu akati, “Amazyu ghagho u Mwene akanenela mwa mumubombi wache u Eliya umu Tishibi gho agha, ‘Imbwa zikwiza pakughulya umuvimba uwa Yezibeli mumughunda mu Yezileli.

³⁷ Umuvimba uwa Yezibeli ghukwiza pakuba ngati muvundo mumughunda mu Yezileli, umwakuti atalipo nayumoyumo yuyo akwiza pakumumanya.’ ”