2 Abamwene 8 - IBAYIBOLO 2024

Umukolo uwamu Shunemu anyokela sona

¹ U Elisha akamubuzya umukolo yuyo umwana wache akamuzyusya kubufwe akati, “Nyamuka ubukaye poka na bamunyumba yako, mwikale kosi kuko mungikala, pakuti u Mwene awisya izala muchisu chinichi amaka seveni.”

² Po umukolo yula akabomba zizyo umuntu uwa Chala akamubuzya. Akabuka poka na bamunyumba yache, nukwikala muchisu icha ba Filisiti amaka seveni.

³ Bo amaka seveni ghamala, umukolo yula akanyokako kuchisu icha ba Filisiti, po akabuka kwa mwene pakumulaba ukuti amunyosezye inyumba yache nu mughunda wache.

⁴ Pakabalilo kalakala u mwene akanenezannyanga nu Gehazi, yuyo akaba wambombo uwa muntu uwa Chala yula ukuti, “Mbuzya ivintu ivikulu vivyo u Elisha abomba.”

⁵ Bo u Gehazi ali pakumubuzya u mwene namumo u Elisha akamuzyusizya umwana umufwe yula, unyina uwa mwana yula akamulaba u mwene ukuti amunyosezye inyumba yache nu mughunda wache. U Gehazi akamubuzya u mwene akati, “Wee mwene wane, uyu we mukolo yuyo umwana wache u Elisha akamuzyusya kubufwe.”

⁶ U mwene akamulalusya umukolo yula akati, “Nkimba zyanaloli?” Umukolo yula akamwamula akati zikaba zyanaloli. Po u mwene yula akalilamula ikambala lyache ukuti, “Umunyosezye ivintu vyache vyosi ukukonjelezyapo vivyo umughunda ghula ghukabiyepo ukwandila pisiku lilyo akepelaghamo muchisu mupaka nilelo.”

U Elisha nu Beni Hadadi u mwene uwa ba Siliya

⁷ Isiku limo u Elisha akabuka ku Damasika pakabalilo kako u Beni Hadadi u mwene uwa ba Siliya akabinagha. Bo u mwene ivwa ukuti umuntu uwa Chala akaba kulakula,

⁸ akamubuzya u Hazayeli akati, “Senda ichabupi, ukomane nu muntu uwa Chala yula. Umulabe ukuti ambuzikizizyeko kwa Mwene ukuti, ‘Nkimba ububine bwane bukwiza pakupola pamo awe?’ ”

⁹ Po u Hazayeli akabuka pakukomana nu Elisha, akasenda ichabupi icha vintu ivyakulekanalekana ivyamutengo nkani ivya mu Damasika, vivyo vikanyamuliwa ni ngamila 40. Bo afika, akakomana nu Elisha nukumubuzya ukuti, “Umubombi wako u Beni Hadadi, u mwene uwa ba Siliya antuma ukuti, umubuzikizizyeko kwa Mwene ukuti, ‘Nkimba ububine bwache bukwiza pakupola pamo awe?’ ”

¹⁰ U Elisha akamwamula akati, “Buka umubuzye uti naloli ukwiza pakupola, loli u Mwene anvumbulila ukuti pope bulo akwiza pakufwa.”

¹¹ U Elisha akamwenelezya nkani u Hazayeli mupaka isoni zikamulema. Po umuntu uwa Chala yula akanda pakulila.

¹² U Hazayeli akamulalusya akati, “Wee mwene wane, nkimba choni chicho ukulila?” U Elisha akamula akati, “Pachifukwa ichakuti inchimenye ichintu ichibibi chicho ukwiza pakubabombela aba Izilayeli. Ukwiza pakughocha amalinga ghabo, nukubaghogha abana babo abalumendo. Ukwiza pakubakomezya pasi abana babo, sona nukubatumbulannya abakolo babo bali pabung'wamu.”

¹³ Po u Hazayeli akamulalusya akati, “Nkimba naloli ningabomba ichintu ichikulu ichi, pakuti ane ne mubombi wako injanite bulo nimbwa?” U Elisha akamwamula akati, “U Mwene anvumbulila ukuti ukwiza pakuba we mwene uwa ba Siliya.”

¹⁴ Bo u Hazeyeli anyokako, u Beni Hadadi akamulalusya akati, “Nkimba u Elisha akubuzya choni?” U Hazeyeli akamwamula akati, “Ambuzya ukuti naloli ukwiza pakupola.”

¹⁵ Loli indabi yache, u Hazayeli akasenda umwenda nukughuzubika mumizi, akamuvwinka nagho kumaso u mwene yula mupaka akafwa. Po u Hazayeli akamupyana pakuba we mwene.

U mwene u Yeholamu akulaghila mu Yuda

¹⁶ Mumwaka uwafayivi bo u mwene u Yolamu, umwana uwa Ahabu akulaghila mu Izilayeli, sona bo u Yehoshafati akulaghila mu Yuda, u Yeholamu umwana uwa Yehoshafati wamu Yuda akanda pakulaghila mu Yuda.

¹⁷ U Yeholamu akaba na maka 32 bo anda pakulaghila, sona akalaghila amaka eyiti bo ali mu Yelusalemu.

¹⁸ U Yeholamu akabomba zizyo bakabombagha abamwene aba Izilayeli, sona ukuyana namumo bakabombelagha abamunyumba iya Ahabu, pachifukwa ichakuti akamusenda umwana uwa Ahabu pakuba muchi wache. U Yeholamu akananga nkani pamaso pa Mwene.

¹⁹ Pope bulo u Mwene atakalondagha pakuchinangannya ichisu icha Yuda, pachifukwa icha mubombi wache u Devedi. Pakuti u Mwene akamulayizya ukuti abaluko lwache bakwiza pakulaghila bwila na bwila.

²⁰ Bo u Yeholamu akulaghila, aba Edomu bakachisambukila ichisu icha Yuda, sona bakiyimikila bene u mwene.

²¹ Po u Yeholamu akabuka ku Zayili, poka ni ngolo zyache zyosi izya bwite. Aba Edomu bakamuzyungulila, poka na basongo ababendezya ngolo zyache izya bwite, loli akalamusya pabusiku nukuchimbila. Abasilikali bache bope bakachimbila nukubwela.

²² Ukwanda pakabalilo kalakala mupaka nilelo bulo, aba Edomu bachisambukiye ichisu icha Yuda. Kope akaya akakulu aka Libina kakasambuka pakabalilo kalakala.

²³ Imbombo zyosi izinji zizyo u Yeholamu akabomba zisimbiwe mwibuku ilya Mbili iya bamwene aba ba Yuda.

²⁴ U Yeholamu akafwa, po bakamusyila mukaya aka Devedi mu Yelusalemu. Umwana wache u Ahaziya akamupyana pakuba we mwene.

U mwene u Ahaziya akulaghila mu Yuda

²⁵ Mumwaka uwa 12 bo u Yolamu umwana uwa Ahabu, u mwene wamu Izilayeli akulaghila, Ahaziya umwana uwa Yeholamu, u mwene wamu Yuda akanda pakulaghila.

²⁶ U Ahaziya akaba na maka 22 bo anda pakulaghila, sona akalaghila umwaka ghoka bo ali mu Yelusalemu. Unyina akaba we Ataliya umwizukulu uwa Omuli, yuyo akaba we mwene wamu Izilayeli.

²⁷ Wepe u Ahaziya akananga pamaso pa Mwene pakubomba zizyo abamunyumba iya Ahabu bakabombagha, pachifukwa ichakuti akaba mukwalima uwa abamunyumba iya Ahabu.

²⁸ U Ahaziya akabuka ku Lamoti Giliyadi, poka nu Yolamu umwana uwa Ahabu pakulwa ubwite nu Hazayeli, u mwene uwa ba Siliya. Kulakula aba Siliya bakamuvulazya u Yolamu.

²⁹ Po u mwene u Yolamu akanyokela ku Yezileli ukuti ivilonda vyache vipole pakuti aba Siliya bakamuvulazya, bo akulwa ubwite nu Hazayeli u mwene uwa ba Siliya mu Lamoti Giliyadi. Po u Ahaziya umwana uwa Yeholamu, u mwene uwamu Yuda akabuka ku Yezileli pakumwennya u Yolamu umwana uwa Ahabu, pachifukwa ichakuti akavulaziwa.