2 Abamwene 7 - IBAYIBOLO 2024

¹ U Elisha akamula akati, “Ivwa zizyo u Mwene akunena: Indabi pakabalilo ngati kanaka, mukwiza pakughula amakilogalamu matatu agha busu ubutinye nkani, pamo amakilogalamu sikisi agha mapemba ni salabazya yoka iya siliva pamulyango uwa kaya ka Samaliya.”

² Po usongo yuyo akaba mwavwilizi uwa mwene akamulalusya umuntu uwa Chala yula akati, “Napapo u Mwene angatuma ivula inyinji nkani, nkimba zinizi zingabombiwa naloli?” U Elisha akamwamula akati, “Ukwiza pakwiyenezya wemwene na maso ghako, loli utakwiza pakulyako nakamokamo.”

Aba Siliya bakuchimbila

³ Pakabalilo kalakala kukabako abamambombo folo babo bakikalagha pamulyango uwa kaya aka Samaliya. Po bakalalusannya bakati, “Nkimba choni chicho twikaye bulo pano ukulindilila ukuti tufwe?

⁴ Nanti tukuti, ‘Twende mukaya akakulu nkani, mulamula muli izala, sona tukwiza pakufwa.’ Nanti tukwikala bulo pano, pope bulo tukwiza pakufwa. Twende kuvisakasa ivya ba Siliya pakwibika twebene munyobe zyabo. Nanti batangatughogha, tukwiza pakuba bumi, sona nanti bakwiza pakutughogha, mpela tukwiza pakufwa.”

⁵ Bo kwanda pakwila bakanyamuka nukubuka kuvisakasa ivya ba Siliya, loli bo bafika kuvisakasa kula, batakamwaghamo umuntu nayumoyumo.

⁶ Pakuti u Mwene akighula amakutu agha ba Siliya ukuti bivwe ichongo icha ngolo izya bwite ni falasi poka ni chilundilo icha basilikali abinji nkani, umwakuti bakanenezannya bakati, “Ennya, u mwene uwamu Izilayeli abasimba imbombo abamwene aba ba Hiti naba Ijiputi ukuti balwe naswe ubwite.”

⁷ Po bakachimbila pachamabwila nukuvileka ivisakasa vyabo, ni falasi zyabo sona ni mpunda zyabo. Bavilekite ivisakasa vyabo ngati mumo vikabela ukuti bapone.

⁸ Abamambombo folo bala bakafika kubumalilo ubwa visakasa nukwinjila muchisakasa choka. Po bakalya nukung'wela nukusendamo usiliva nu golide, sona na menda nukuvifisa. Pisinda pache bakanyokela nukwinjila muchisakasa ichinji, bakasendamo ivintu nukuvifisa sona.

⁹ Po bakanenezannya bakati, “Nkimba choni chicho tukubomba bunubu? Ili lyo lisiku ilyakufumusya amazyu amiza, loli aswe tuli bulo myee. Nanti tukulindilila mupaka pandabindabi, tukwiza pakuba ninongwa. Polelo twende tughabuzye amakambala agha mwene.”

¹⁰ Po bakabuka nukubitizya abalindilili aba pamilyango uwa kaya nukubabuzya ukuti, “Aswe tukabuka kuvisakasa ivya ba Siliya, po tutakamwaghako nayumoyumo umuntu. Ghope amazyu tutakaghivwapo, ifalasi ni mpunda zikaba mpinyilile, sona ivisakasa vikaba ngati mumo vikabela.”

¹¹ Abalindilili bala bakafumusya amazyu ghala, sona na bope abamunyumba iya bumwene bakaghivwa amazyu ghalaghala.

¹² U mwene akalamusya pabusiku nukughabuzya amakambala ghache ukuti, “Leka imbabuzye zizyo aba Siliya batubombela. Bazimenye ukuti aswe tukuyimba nizala, po bepitemo muvisakasa vyabo pakutuvwamilila nukwinong'ona ukuti, ‘Naloli bakwiza pakufuma kuzi, po tukwiza pakubalema bumi nukukafyula akaya akakulu nkani kala.’ ”

¹³ Loli ikambala lyoka likamula likati, “Tusale abantu bamo ukuti basende ifalasi fayivi zizyo zisyete mukaya akakulu kala, ukuti babuke kuvisakasa ivya ba Siliya nukwennya chicho chabombiwa. Naloli twebosi tukwiza pakufwa ngati mumo abantu bosi babo bafwiliye kale.”

¹⁴ Bakasala ingolo izya bwite zibili ni falasi, po u mwene akabatuma ukuti babakonke abasilikali aba ba Siliya. Akabalamula akati, “Buka mwennye chicho chabombiwa.”

¹⁵ Abantu bala bakabakonka aba Siliya mupaka ku Yolodani. Po bakagha ukuti amenda nu katundu yuyo aba Siliya bakamuwisyanga pachifukwa ichakuchimbila umwalubilolubilo visatite zila yosi. Po intumi zila zikanyokako nukumupangila u mwene.

¹⁶ Po abantu bakafuma mukaya kala nukubuka pakufyula ivintu muvisakasa ivya ba Siliya. Amakilogalamu matatu agha busu ubutinye bukaghuliziwanga ni salabazya yoka iya siliva, sona amagalamu sikisi agha mapemba ghakaghuliziwanga ni salabazya yoka iya siliva ukuyana namumo u Mwene akanenela.

¹⁷ U mwene akamusala umwavwilizi wache ukuti enelezyanje pamulyango uwa lupaso. Loli abantu bakamukanyankila umwakuti akafwa, ukuyana namumo umuntu uwa Chala akanenela, bo u mwene akubuka pakukomana nawe kunyumba iya Elisha.

¹⁸ Zinizi zikabombiwa ukuyana namumo umuntu uwa Chala akamubuzizya u mwene ukuti, “Indabi pakabalilo ngati kanaka amagalamu sikisi agha mapemba ghakwiza pakughuliziwa ni salabazya yoka iya siliva, sona amakilogalamu matatu agha busu ubutinye bukwiza pakughuliziwa ni salabazya yoka iya siliva pamulyango uwa lupaso ulwa Samaliya.”

¹⁹ Ikambala likamubuzya umuntu uwa Chala yula likati, “Napapo u Mwene angatuma ivula inyinji nkani, nkimba zinizi zingabombiwa naloli?” Po umuntu uwa Chala yula akamwamula akati, “Ukwiza pakwiyenezya wemwene na maso ghako, loli utakwiza pakulyako nakamokamo.”

²⁰ Ichi cho chicho chikamuwila, pakuti abantu bakamukanyankila pamulyango uwa lupaso nukufwila palapala.