2 Abamwene 6 - IBAYIBOLO 2024

U Elisha embamizya intemo

¹ Isiku limo abalaghuzi bamo aba mubukatila aka balaghuzi bakamubuzya u Elisha bakati, “Ennya, ubuzilo bubo tukwikala nawe bunandi nkani.

² Utwitikizye tubuke ku Yolodani umwakuti umuntu wesi asende izengo lyoka, ukuti tuzengele ubuzilo ubwakuti twikalayemo.” U Elisha akabamula akati, “Bukagha.”

³ Po weka akati, “Nalamba ubukaye poka naswe.” U Elisha akamula akati, “Twendaye.”

⁴ Po akabuka poka nabo. Bakabuka ku Yolodani nukwanda pakudumula amakwi.

⁵ Bo weka ali pakudumula ikwi, intemo yache yikakuka muchaka nukuwila mumizi. Akalila akati, “Wee, mwene wane, intemo yiniyi yakwazimya bulo!”

⁶ Po umuntu uwa Chala u Elisha akalalusya akati, “Nkimba yawila piyi?” Bo amulanjizya papo yikawila, u Elisha akadumula akakwi nukukasumbila pabuzilo bulabula, po intemo yila yikambama.

⁷ U Elisha akamubuzya akati, “Yizubule.” Po umuntu yula akagholosya inyobe yache nukuyizubula.

U Elisha akubapelela aba Siliya ubufwamaso

⁸ Pakabalilo kalakala u mwene uwamu Siliya akalwa ubwite naba Izilayeli. Bo anenezannya na basongo bache kubusyefu akati, “Nkwiza pakuzenga ivisakasa vyane pabuzilo ubwakuti nu bwakuti.”

⁹ Loli u Elisha akamutumila u mwene wamu Izilayeli amazyu aghakuti, “Uchebaye nkani, bo ukudumusannya pabuzilo bulabula pachifukwa ichakuti aba Siliya bakuvwama kulakula.”

¹⁰ Po u mwene uwamu Izilayeli akabuka pakubutendela ubuzilo bubo umuntu uwa Chala akabunenagha. U Elisha akamusokagha u mwene yula kabilikabili ukuti abanje maso nu buzilo bula.

¹¹ Ichi chikamukalalizya nkani u mwene wamu Siliya umwakuti akaghitizya amakambala ghache nukughalalusya ukuti, “Mbuzya, nkimba wewenu yuyo ali kulubazu ulwa mwene uwamu Izilayeli?”

¹² Ikambala lyoka likamula likati, “Wee mwene wane, atalipo nayumoyumo.” Loli umulaghuzi u Elisha uwamu Izilayeli weyuyo akumuteketela u mwene uwa Izilayeli amazyu ghosi ghagho ukughanena muchipinda chako.

¹³ U mwene yula akalamula akati, “Buka mumulonde kuko ali, umwakuti ningabatuma abantu ukuti bamuleme.” Bakamubuzya bakati, “U Elisha ali ku Dotani.”

¹⁴ Po u mwene akatumako ifalasi ni ngolo izya bwite, sona na basilikali abamaka. Abasilikali bala bakabuka pabusiku nukukazyungulila akaya akakula nkani kala.

¹⁵ Pandabindabi bo uwambombo uwa muntu uwa Chala yula alamusya, akennya abasilikali poka ni falasi ni ngolo zyabo izya bwite, sona bakakazyungulila akaya akakulu nkani kala. Po uwambombo yula akalalusya akati, “Wee mwene wane! Nkimba tubombe choni?”

¹⁶ U Elisha akamwamula akati, “Utakanyilaye, pakuti babo bali kulubazu lwitu binji nkani ukubachila babo bali kulubazu lwabo.”

¹⁷ U Elisha akiputi akati, “Wee Mwene umwighule amaso ghache ukuti ennye!” U Mwene akamwighula amaso uwambombo yula, po akatalankannya nukwennya amaghamba ghizuye ni falasi, sona ni ngolo izya bwite izya moto zimuzyunguliye u Elisha.

¹⁸ Bo aba Siliya bakwika ukuti balwe nawe, u Elisha akiputa akati, “Wee, Mwene ubapele ubufwamaso abantu banaba!” Po u Mwene akabapelela ubufwamaso ukuyana namumo u Elisha akalabila.

¹⁹ U Elisha akababuzya akati, “Mwapulumpa, aka te kaya akakulu nkani kako mukukalonda. Munkonke, imbalanjizye umuntu yuyo mukumulonda.” Po akabalongozezya ku Samaliya.

²⁰ Bo binjila bulo mukaya akakulu nkani kala, u Elisha akiputa akati, “Wee, Mwene ubighule amaso ukuti bennye.” U Mwene akabighula amaso ghabo, po bakagha ukuti bakaba mu Samaliya.

²¹ Bo u mwene uwamu Izilayeli abennya abasilikali bala akamulalusya u Elisha akati, “Wee tata, nkimba imbaghoghe?”

²² U Elisha akamwamula akati, “Awe, utakabaghoghaye. Nkimba ungabaghogha abantu babo ukabalema pakuba bazya bo akulwa nabo ubwite? Awe, loli ubape ichakulya na mizi ukuti balye nukung'wela, sona ubanyosye kwa mwene wabo.”

²³ Po u mwene yula akabayanizizya ulusekelo ulukulu nkani. Bo balya nukung'wela, akababuzya ukuti babwelaye. Po bakanyokela kwa mwene wabo mu Siliya. Ukwandila pakabalilo kalakala amavyondongo agha mu Siliya ghakaleka pakufyula ivintu mu Izilayeli.

Aba Siliya bakukazyungulila akaya akakulu nkani aka Samaliya

²⁴ Bo pachilapo akabalilo, u Beni Hadadi u mwene uwamu Siliya, akababungannya abasilikali bache bosi nukubuka pakukazyungulila akaya akakulu nkani aka Samaliya.

²⁵ Mu Samaliya mukaba izala inkulu nkani bo aba Siliya bakazyungulila akaya akakulu nkani kala, umwakuti umutu uwa mpunda ghukaghuliziwanga isalabazya 80 izya siliva. Sona amagalamu 200 agha masusu agha nkunda ghakaghuliziwanga isalabazya fayivi izya siliva.

²⁶ Bo u mwene uwamu Izilayeli akudumusannya palupaso ulwa kaya akakulu nkani kala, umukolo yumo akamwitizya akati, “Wee mwene wane, nyavwako!”

²⁷ U mwene akamwamula akati, “Nanti u Mwene atangakwavwa, nkimba ane ningakwavwa bulibuli? Nkimba ane indi ni ngano pamo uvinyo?”

²⁸ Po akamulalusya umukolo yula akati, “Nkimba choni chatamya?” Umukolo yula akamwamula akati, “Isiku limo umukolo uyu akambuzya akati, ‘Zagha nu mwana wako ukuti tumulye ilelo, umwana wane tukwiza pakumulya indabi.’

²⁹ Po tukamupiya umwana wane nukumulya. Indabi yache nkamubuzya ukuti, ‘Nawe zagha nu mwana wako ukuti tumulye.’ Loli akamufisa umwana wache yula.”

³⁰ Bo u mwene ivwa amazyu agha mukolo yula, akazepula amenda ghache pachifukwa icha chitima. Bo akudumusannya palupaso lula, abantu babo bakaba papipi bakennya ukuti u mwene yula avwalite amasaka mukasi.

³¹ Po u mwene yula akati, “U Chala anfunde nkani nanti ilelo intakumudumula umutu u Elisha umwana uwa Shafati.”

³² Pakabalilo kalakala u Elisha akaba munyumba yache poka na basongosongo bamo babo kakiza pakwangala nawe. Po u mwene akatuma intumi yoka, loli bo intumi yila yitafikite, u Elisha akababuzya abasongo bala akati, “Umughoghi yula amutuma umuntu pakundumula umutu. Nanti intumi yila yafika, mwighalileko kumulyango, sona mutakamuleke ukuti afume. Nkimba mutakwivwa umulinto uwa mwene wache yuyo akwiza pisinda papache?”

³³ Bo u Elisha achili akunena na basongosongo bala, intumi yila yikafika. Po u mwene akati, “Wee Mwene yuyo atuwisizya intamyo zinizi. Nkimba choni chicho indindilile ukuti u Mwene abombepo zimo?”