2 Abamwene 5 - IBAYIBOLO 2024

U Naamani apola kumambombo ghache

¹ Pakabalilo kalakala u Naamani akaba we songo uwa basilikali abamwene bamu Siliya. U Naamani akaba muntu umumanyikwe nkani kwa mwene wache, sona akachindikiwa nkani pachifukwa ichakuti u Mwene akamwavwa u mwene uwamu Siliya pakupota ubwite ukwendela mumwache. U Naamani akaba musilikali uwamaka nkani, loli akaba na mambombo.

² Isiku limo amavyondongo agha mu Siliya ghakiza pakufyula ivintu mu Izilayeli nukumulema umulindu, po akaba uwambombo uwa muchi uwa Naamani.

³ Umulindu yula akamubuzya umuchi uwa Naamani akati, “Nanti bulo u mwene wane abukagha ku mulaghuzi mu Samaliya, ngali apola amambombo ghache.”

⁴ U Naamani akabuka pakumubuzya u mwene wache zizyo umulindu uwamu Izilayeli yula akanena.

⁵ U mwene akamwamula akati, “Bukagha kwa mwene uwamu Izilayeli nu kalata uyu.” Po u Naamani akabuka, bo asendite isalabazya 30,000 izya siliva ni salabazya 6,000 izya golide sona na menda 10 agha palusekelo.

⁶ Ukalata yuyo akabuka nawe kwa mwene uwamu Izilayeli akasimbiwa ulu, “Nakutumila umubombi wane u Naamani nu kalata uyu, umwakuti umupozye amambombo ghache.”

⁷ Bo u mwene uwamu Izilayeli abelenga ukalata yula, akazepula amenda ghache pachifukwa icha bogha nukuti, “Fwandi ane ne Chala yuyo angaghogha nukupa ubumi? Nkimba choni chicho antumila umuntu uyu ukuti imupozye amambombo ghache? Ichi chili pabuzelu ukuti akulonda andane nane bulo.”

⁸ Bo u Elisha, umuntu uwa Chala, ivwa ukuti u mwene uwamu Izilayeli azepula amenda ghache, akamutumila u mwene yula amazyu aghakuti, “Nkimba choni chicho wazepula amenda ghako? Muleke umuntu yunuyu ize kuno, umwakuti amanye ukuti mu Izilayeli muli umulaghuzi.”

⁹ Po u Naamani akabuka ni falasi zyache ni ngolo zyache izya bwite, nukwimilila palubinjilo ulwa nyumba iya Elisha.

¹⁰ U Elisha akayituma intumi yache pakumubuzya ukuti, “Buka koghe mulusoko ulwa Yolodani akaseveni, po ukwiza pakupola nukuswepa.”

¹¹ Loli u Naamani akepapo bo akalaye nkani nukuti, “Ane ninong'onagha ukuti akwiza pakufuma kuzi pakukomana nane nukwiputa kwa Mwene u Chala wache, umwakuti azunguzye inyobe yache pamambombo ghane nukumpozya.

¹² Nkimba ulusoko ulwa Abana nulwa Falipala mu Damasika mula te nyizapo ukuchila isoko izya mu Izilayeli? Nkimba ngali intoghite mulamula nukuswepa?” Po akaghalabuka nukwepapo, bo akalaye nkani.

¹³ Loli abambombo bache bakapalamila nukumulalusya ukuti, “Wee tata, buli nanti umulaghuzi akakulamulagha ukuti ubombe ichintu chimo ichipala nkimba ngali utachibombite? Po nkimba pali bupala boni pakukubuzya ukuti, ‘Ogha nukuswepa?’ ”

¹⁴ Po u Naamani yula akabuka ku Yolodani nukudwiba mumizi akaseveni. Izi zyo zizyo umuntu uwa Chala yula akamubuzya. Panapo na panapo akapola, sona umubili wache ghukaswepa nukuba ngati mubili uwa mwana.

¹⁵ Pisinda pache u Naamani poka na bambombo bache bakanyokela kumuntu uwa Chala yula. Bakimilila pamaso papache nukumubuzya ukuti, “Naloli nazimanya ukuti atalipo u Chala uyunji muchisu ichapasi, loli mwene mu Izilayeli. Nalamba pokela ichabupi chane ichi.”

¹⁶ U Elisha akamula akati, “Nkulapa pamaso pa Mwene yuyo nkumubombela ukuti ntangapokela nachimochimo ichabupi.” Napapo u Naamani akamulambilizya nkani ukuti apokele, loli akakana.

¹⁷ Po u Naamani akati, “Nanti ukukana, nalamba nkukulaba unyitikizye ane ne wambombo wako ukuti nsendeko itope, lilyo abana aba mpunda babili banganyamula. Pakuti ane ne wambombo wako ntangabika nalumo ivyakwiyipa ivyakocha, sona ni vyakwiyipa ivinji kwa chala uyunji, loli kwa Mwene mpela.

¹⁸ Loli u Mwene anhobokele pachifukwa ichakuti nkubuka poka nu mwene wane pakwiputa munyumba iya Limoni, uchala uwa ba Siliya. U Mwene anhobokele ne mubombi wako pachifukwa icha chinichi.”

¹⁹ U Elisha akamubuzya akati, “Wende akiza.” Bo u Naamani endapo panandi bulo,

²⁰ u Gehazi uwambombo uwa Elisha akinong'ona akati, “U mwene wane amuleka bulo u Naamani umu Siliya yula ukuti abukaye ukusita ukulipilapo chimo ngali apokelagha ichabupi chicho akiza nacho. Nkulapa pamaso pa Mwene ukuti nkwiza pakumukonka nukusendako vimo.”

²¹ Po u Gehazi akamuchimbilila u Naamani. Bo u Naamani amwennya umuntu akumuchimbilila, akika mungolo yache ukuti akomane nawe. Akamulalusya akati, “Nkimba choni chatamya?”

²² U Gehazi akamula akati, “Nachimochimo, u mwene wane antuma ukuti nkubuzye, abalumendo babili aba mukabukatila aka balaghuzi bafika lunulu ukufuma kuchisu icha mumaghamba icha Efulayimu. Nalamba umpeko isalabazya 3,000 izya siliva, na menda mabili.”

²³ U Naamani akamubuzya akati, “Senda isalabazya 6,000 izya siliva.” Akamulambilizya u Gehazi ukuti apokele nukuzipinyilila inyambi zibili izya salabazya izya siliva, poka na menda mabili. Bakabapa ababombi bache babili bala, po bakavinyamula nukulongolela pantazi pa Gehazi.

²⁴ Bo u Gehazi afika pighamba, akabafyula abambombo bala ivintu vila nukuvibika munyumba. Akababuzya ukuti babukaye, po abambombo bala bakabuka.

²⁵ U Gehazi akinjila munyumba nukwimilila pamaso pa Elisha. U Elisha akamulalusya akati, “Wee, Gehazi, nkimba wame kwiyi?” U Gehazi akamwamula akati, “Ntabukite nakumokumo.”

²⁶ Loli u Elisha akamulalusya akati, “Fwandi utazimenye ukuti umuzimu wane ghukaba nawe bo umuntu yula akwika mungolo pakukomana nawe? Nkimba aka ko kabalilo akakupokela indalama pamo amenda na maghunda agha misyunguti na maghunda agha mampesya ni ng'ozi ni ng'ombe pamo abambombo abanavuli pamo abakolo?

²⁷ Polelo amambombo agha Naamani ghakwiza pakukumamatila awe na baluko lwako bwila na bwila.” Po u Gehazi akepapo pamaso pa Elisha bo ali na mambombo ghagho ghakaba bulo swee ngati we kabefu.